§ Die prologhe op Ieremiam den Propheet.
DIe Propheet Ieremias, den welcken dese Prologe geschreuen wort, in die redene bi den Hebreuschen, schijnt hi slechtere te zijn, dan Esaias ende Ozeas, ende sommighe andere Propheten, Maer inden sin, is hi ghelijck, als wt eenen gheest ghepropheteert. Maer die slechtheyt der redenen, is hem aengecomen van die plaetse daer hi in gebo-[kolom]ren is, Want hi was van Anathot, dwelcke is tot opten dach van huyden een dorpken .iij. mylen van Ierusalem, verscheyden wesende Een priester vanden priesteren, ende in zijns moeders lichaem geheylicht, met sinen maechdom eenen Euangelischen man der Christelijcker kercken wijende. Dese beghonste te propheteren, noch een kint wesende, ende die gheuanghenisse der stadt ende des Ioetschen lants, niet alleen metten gheest, maer oock met vleeschelijcke oogen gesien heeft, Doen haelden die van Assyrien die .x. gheslachten ouer tot die van Meden, ende doen besaten die inwoonders der heydenen haer landt, Waerom dat hi alleen in Iuda ende in Beniamin ghepropheteert heeft, ende beclaechde den val zijnder stadt, met vierderhande A.B. dat welcke wi bi mate der veersen ghestelt hebben. Ende hier en bouen, die oordine der ghesichten, die bi den Griecken ende Latijnen verstroyt is, hebben wi naer der eerster trouwen ghecorrigeert. Maer Baruch zijns Notarijs boeck, diewelcke bi den Hebreeuschen niet ghelesen en wordt, noch en is, dien hebben wi ouer gheslagen, Hier vore verwachtende van onsen benijders, een opsprake, den welcken mi van noode is, dat ick op elcke boeck moet antwoorden, Ende dat lijde ick, want ghi dwingt mi daer toe, Maer om die cortheyt des quaets wille, soo wast beter haerder gramschap met minen swijghen een maniere ende mate te stellen dan daghelijcs wat nieus, den schriueren des nijts, tot raserije te verwecken.
IOachim Iosie sone in wiens .xiij. iaer Ieremias beghonste te prooheteren, onder den welcken die vrouwe Olda propheteerde, hi ist die anders genaemt wert Eliachin ende regeerde ouer tgheslachte van Iuda, ende Ierusalem, elf iaer lanck. In wiens rijcke volchde Ioachims sone, toeghenaemt Iechonias, die in die derde maent zijns rijcks den thiensten dage van Nabuchodonosors hertoghen gheuanghen gheleydt wert, tot Babilonien, ende in zijn plaetse wert Sedechias Iosie sone zijns vaders broeder ghestelt, In wiens .xi. iaer Ierusalem genomen ende omghekeert wert. Niemant en sal meynen den seluen in Daniels beghin Ioachin te wesen, die in Ezechiels beginsel Ioachim geschreuen wert, dese heeft in die laetste sillabe chim, maer die chin. Ende om deser sake schijnt daer in sinte Mattheus Euangelie een gheslachte te ghebreken, want dat tweede veertienste geslachte, eynt op Iosie sone,
Auteursrechtvrij