De Vorsterman Bijbel

§ Dat .xxxix. Capittel.

1

⁺DIe wijse sal ondersoecken alle der ouderen wijsheit, ende hy sal hem in die propheten veronledighen.

+ A

2

Hi sal die vertellinge der vernaemder mannen onthouden, ende hi sal mede inghaen in die listicheyt der byspraken.

3

Hi sal die verborghentheden der byspraken ondersoecken, ende hi sal in die verborghentheden der ghelijckenissen conuerseren.

4

Hi sal int midden der groter van state dienen, ende hi sal in dat aenscouwen des rechters openbaren,

5

hi sal doorgaen totten lande der vremder heidenen. Want hi sal goet ende quaet proeuen.

6

Hi sal zijn herte gheuen, om inden dageraet te waken totten HEERE die hem ghemaect heeft, ende hi sal int aenscouwen des alder hoochsten bidden.

7

Hi sal sinen mont open doen in dat ghebet, ende hi sal voor sine sonden bidden,

8

Want ist dat die groote HERE wilt so sal hi hem metten geest der verstandenissen veruullen,

9

ende hi sal dye wtspraken zijnder wijsheit wtseynden als slachreghen, ende hy sal den HEERE in zijn gebet beliden.

10

Ende hi sal sinen raet ende onderwisinge stieren, ende in sine verborgentheden sal hi hem beraden.

11

⁺Hi sal die onderwisinge zijnder leeringe openbaer maken, ende hy sal in die wet des testaments des HEEREN verhuegen.

+ B

12

Vele menschen sullen sine wijsheit te gader louen, hi ende en sal inder eewicheyt niet wt ghewist worden.

13

Sine gedachtenisse en sal niet wech gaen, ende sinen naem sal van geslachte tot gheslachte versocht worden.

14

Die heydenen sullen zijn wijsheit vertellen, ende die vergaderinghe der gheloouighen sal sinen lof vercondighen.

15

Ist dat sinen naem blijft, soo sal hi daer meer dan duysent achterlaten, ende ist dat hi rust, so salt hem baten.

16

Noch sal ick [kolom] beraden worden, dat ict vercondige, want als met raserie ben ic veruult.

17

Ende in die stemme seyt hi, Gheeft my gehoore godlike vruchten, ende als een roose gheplant op die riuieren der wateren so maect vrucht.

18

Hebt ruecke der soeticheyt als Libanus.

19

Bloeyt ghy bloemen als die lelye, ende gheeft ruecke, ende brenct bladeren tot dancbaerheyt, ende prijst te gader dat liedeken, ende ghebenedijt den HEERE in sine wercken.

20

Gheeft sinen name grootmakinge, ende belijdt hem in dye stemme uwer lippen, ende in liedekens der lippen, ende herpen, ende aldus sult ghi seggen inder belidinghe.

21

Alle die wercken des HEEREN zijn zeer ghoet. ⁺

+ Gene. i.d. Mar. vij.d

22

⁺Want in sinen woorde stondt dat water, als eenen hoop steenen, ende in die redene zijns monts als in eenen watereemere,

+ C

23

want in sinen ghebode wert versoeninghe, ende in zijn salicheit en is gheen verminderinge,

24

de wercken van allen vleesche zijn voor hem, ende daer en is niet verborgen van sinen ooghen

25

Hi aenscouwet vanden eenen tijt totten anderen, ende in zijn aenscouwen en is niet wonderlic.

26

Ten is niet te segghen, wat is dat? oft wat is dit? want alle dinghen sullen in haerder tijt gesocht worden.

27

Sijn ghebenedidinge sal oueruloeyen als eenen stroom,

28

ende ghelijck een diluuie die drooghe aerde veruulde, alsoo sal zijn gramschap die heydenen die hem niet versocht en hebben beeruen.

29

Ghelijc hi die wateren in droocheit heuet ghekeert, ⁺ ende die aerde is verdroocht, ende sine weghen zijn met haren wegen beleit also zijn den sondaren aenstotinghen in zijn gramschap.

+ Gen. vij.d Exo. xiiij.c

30

Den goeden zijn die goede ghescapen vant beghinne, alsoo zijn den alderscalcsten, goede ende quade dingen gescapen.

31

Dat beginne des nootdruftigen dincx des leuens der menscen, is water, viere, ende yser, sout, melc ende wittebroot, ende huenich ende wijndruuen, ende olie, ende cleederen.

32

Alle dese geworden den heylighen int goede, ⁺ also sullen si den ongodliken, ende sondaren in quaet worden ghekeert.

+ D

33

Daer zijn gheesten die tot wraken gescapen zijn, ende in haerder raserie hebben si haer tormenten beuesticht.

34

Ende inder tijt der voleyndinghe sullen si wt storten die cracht, ende zijn raserie des gheens diese gemaect heeft, sullen si bescamen.

35

Vier. hagel, honger ende doot alle dese zijn tot wrake gescapen.

36

Tanden der beesten ende scorpioenen ende serpenten, ende dat sweert wrekende die ongodlike tot vernielinge.

37

Si sullen brassen in zijn gheboden, ende opter aerden sullen si inder noot bereyt

[p. G6v]

worden, ende in haren tijden en sullen si dat woort niet voor bi gaen.

38

Hieromme ben ick vant beginne beuesticht, ende ben beraden, ende ic hebbe ghedacht, ende ghescreuen ghelaten.

39

Alle die wercken des HEEREN zijn goet, ende alle werck sal in zijnder vren dienst doen.

40

Het en is niet te segghen, dit is scalcker dan dat, Want alle dingen sullen tot haerder tijt mede gheproeft worden.

41

Ende nv looft tsamen ende ghebenedijt den name des HEEREN in alle herten ende monden.