De Vorsterman Bijbel

§ Dat .xxvi. Capittel

1

SAlich is eens ghoeden vrouwen man, want dat getal haerder iaren is dubbel

2

⁺Een stercke vrouwe verlusticht haren man, ende si sal die iaren zijns leuens in vrede veruullen.

+ A

3

Een goet wijf is een goet deel, In eenen goeden deele der godureesender, sal si worden gegeuen eenen man voor goede daden,

4

maer dat goede herte des rijcken ende des armen, in alle tijt is haer aenschijn vrolic.

5

Van drien dingen vreesde mijn herte, ende int vierde vreesde mijn aensicht

6

Die verradenisse eender stadt ende vergaderinge des volcx,

7

ende een logenachtige besculdinge ende si alle zijn zwaer bouen die doot.

8

⁺Een wantrouwich wijf is smerte des herten ende weenen.

+ B

9

In een wantrouwige vrouwe is een geessel der tongen, haer alle menschen gemeyn makende.

10

Ghelijc dat ioc der osschen dat geruert wort, also is ooc een scalcke vrouwe, Diese hout is als een dye een scorpioen aengrijpt.

11

Een droncachtich wijf is grote gramscap ende versmaetheyt, ende haer vulheit en sal niet bedect worden.

12

Dat leuen van een oncuysche vrouwe is in haerder ooghen verheffinge, ende si sal in haren wijnbrauwen bekent worden.

13

In een dochter die haer niet af en keert beuesticht die hoede, op dat si geen oorsaec en vinde, ende haer misbruycke.

14

Wacht v van alle oneersaemheit haerder ooghen, ende en verwondert v niet ist dat si vergetet.

15

Gelijc een dorstich ganger totter fonteynen den mont open sal doen, ende sal van alle den naesten water drincken ende sal teghen elcken stake sitten, ende sal tegen elc ghescut den koker open doen, tot dat si ghebreect.

16

Eens neerstichs wijfs gratie sal haren man verhueghen, ⁺ ende si sal zijn beenen vermaken.

+ C

17

Haer sedicheyt is een ghaue Gods.

18

Een wijs ende swijgende vrouwe en is geen veranderinghe der gheleerder sielen.

19

Een heylige ende scamel vrouwe is gratie bouen gratie.

20

Alle ghewichte en is niet weerdich eender cuyscher sielen.

21

Ghelijck dye sonne der werelt op ghaende in dat alder hoochste Gods, alsoo is dye schoonheyt van een goede vrouwe tot vercieringhe haers huys

22

Een keerse lichtende op den heylighen candelare ende een ghedaente des aensichts op stantachtich ouderdom.

23

Gouden columnen op silueren voeten, ende vaste voeten op dye platte voeten eender vast staender vrouwen

[p. G1v]

24

⁺Eewige fundamenten op eenen vasten steen so zijn die geboden gods in dat herte van een heylige vrouwe.

+ D

25

In twee dingen is mijn herte bedroeft ende int derde is mijn gramscap aen ghecomen.

26

Een crijschman gebrekende van armoede, Ende een wijs man versmaet zijnde,

27

ende die ouertreet van gerechticheyt tot sonden Godt heeft hem totten swaerde bereyt,

28

Twee gedaenten dochten mi swaer ende sorgelic zijn. Een die comenscap doet wort swaerlic wtghetoghen van versumenisse, ende een herbergier en sal niet gerechtuaerdicht worden vanden sonden der lippen.