De Vorsterman Bijbel

§ Dat .viij. Capittel.

1

⁺EN kijft niet teghen eenen machtighen mensch, op dat ghi messchien niet in sinen handen en valt,

+ A

2

En strijdet niet teghen eenen rijcken man, ⁺ op dat hi v messchien niet daer weder teghen een ghedinghe en make,

+ Nyemant en sal hem stellen teghen een de machtiger is dan hi is

3

Want dat gout ende dat siluer heeft vele menschen bedoruen, ende heeft hem wtghestrect totter coninghen herte toe, ende keerde dat omme,

4

En kijft nyet met eenen ghetongden mensche, ende en stoket in zijn viere gheen houten,

5

En hebt gheen ghemeynschap met eenen ongeleerden mensche, dat hi niet quaet spreke van uwen geslachte,

6

En versmadet den mensch niet die hem af keert vander sonde, ⁺ noch en verwijtse hem niet, maer gedenct dat wy alle in ghebrekelicheyt zijn,

+ B

7

En versmaet den mensche nyet in zijnder outheyt, wantse oock wt ons out worden. [kolom]

8

⁺En wilt niet verblijden van uwen dooden viant, ⁺ weteude dat wi alle steruen, ende wi willen in dye blijschap comen,

+ C

+ Datmen in den doot van zijn viandt nyet en behoort te verbliden

9

En versmadet niet die vertellinge der wijser ouderen, ende verkeert in hare bedecte woorden,

10

want van hen sult ghi leeren wijsheyt ende leeringhe der verstandenisse, ende te dienen den grooten van state, sonder clachte,

11

Die vertellinghe der ouderen en sal v niet voorby gaen, want si hebbense van haren vaders geleert,

12

Want van hen sult ghi verstandenisse leeren, ende inder tijt der noot sult ghi antwoort gheuen.

13

⁺En ontsteect die colen der sondaren niet, hen berispende, op dat ghi niet en wort ontsteken metter vyer vlammen haerder sonden,

+ D

14

En staet nyet teghen dat aensicht des gheens die versmaetheyt doende is, op dat hy uwen monde niet en sitte, als een dye laghen leyt,

15

En wilt nyet te woecker leenen, eenen mensche, die starcker is dan ghi, maer ist dat ghi hem te woeckere leent, so houdet als verloren,

16

En gelouet niet bouen v crachte, maer ist dat ghi belouet, so denct al dat te betalen,

17

Ghi en sult niet oordeelen tegen den rechtere, want hy oordeelt nae dat recht is,

18

Metten stouten en gaet nyet ouer wech, op dat hy messchien zijn quaet niet en versware teghen v, Want hy ghaet na sinen wille, ende ghi sult tsamen met zijnder sotheyt vergaen,

19

met den toornigen en maect gheen gheschil, ende met eenen stouten en gaet niet in die woestine, want dat bloet is voor hen als niet, ende daer gheen hulp en is, daer sal hy v daer neder stooten.

20

Metten sotten en hebt gheenen raet, want si en mogen niet lief hebben, dan die dingen die hen behaghen,

21

Voor eenen van buyten en maect gheenen raet, want ghi en weet niet wat hi voort brengen sal,

22

En openbaert elcken mensche v herte niet, op dat hy v messcien gheenen valschen danck en doe, ende v dan verwite.