De Vorsterman Bijbel

§ Dat .vij. Capittel.

1

⁺TIs wel waer, ic ben oock een sterflijck mensch, allen menschen ghelijck, ende wt den eertschen gheslachte gheboren des ghenen dye eerst ghemaect is,

+ A

2

ende in mijnder moeder buyck ben ick vleesch ghebeeldet, Inden tijt van thien maenden ben ick te gader geronnen in bloet van des menschen zade, ende mits bequamen luste des slaeps.

3

Ende als ick geboren was, ontfinghe ic die ghemeyn luchte, ende des ghelijck viel ick neder op die ghemaecte aerde, ende ic liet wt die eerste stemme ghelijck allen menschen, weenende,

4

Ick ben in dye wijndelen ende met grooter sorghen opgeuoeyt,

5

Want nyemant vanden coninghen en heeft een ander begin der gheboorten ghehat,

6

Hier omme so hebben alle menschen eenen inghanc tot den leuen, ende eenen ghelijcken wtghanck.

7

Daerom begheerde ick, ende mi werden sinnen ghegheuen, ende ick aenriep, ende dye gheest der wijsheyt quam in my,

8

Ende ick voorsettese den rijcken ende den stoelen, ende ick seyde, dat die rijcdommen niet en waren by haer te ghelijcken,

9

Noch ick en ghelijcte haer gheenen costelijcken steen, want alle gout is bi haer ghelijck een cleyn sandeken, ⁺ ende siluer sal in haer aenschouwen, als slijc gheacht zijn.

+ iob. xxviij c

10

Bouen salicheyt ende ghedaente, beminde ickse, ende ick nam dye voor mi voor een licht te hebben, ⁺ want haer licht is onwtblusschelijck,

+ B

11

ende my quamen alle ghoede dinghen tsamen met haer, ende een ontallijcke eersaemheyt door haren handen,

12

ende ick ben in allen verblijt, want dese wijsheyt ghinc voor mi, ende ick en wist niet, dat si een moeder is van alle goede dingen,

13

Die welc ic sonder gheueynstheit gheleert hebbe, ende sonder nijdicheyt deelde ickse mede, ende haer eersaemheyt en verborghe ick nyet,

14

Want si is den menschen eenen oneyndelijcken schat ende die ghene dien gheorbert hebben, die zijn der vrientschappen Godts deelachtich gheworden, ghepresen om dye ghauen der [kolom] onderwisingen,

15

Want Godt heuet my ghegheuen te segghen wt der meyninghe, ende te vermeten weerdighe dinghen deser, dye welcke my ghegheuen werden, want hy is een leyder der wijsheyt, ende der wijser verbetere,

16

Want wy ende onse redenen, zijn in zijnder hant, ende alle wijsheyt, ende die onderwijsinghe der wercken der kennissen

17

⁺Hi heeft mi waerachtige kennisse der dinghen die zijn ghegheuen, op dat ick die gheschictheit des aertrijcs sal moghen weten, ende die crachten der elementen, dat beginsel, die voleyndinghe,

+ C

18

ende dat middele der tijden, dye veranderinghe der gheboorten, ende die voleyndinghe der tijden,

19

des iaers loop, ende die geschictheden der sterren,

20

dye natueren der dieren, ende die gramschappen der beesten, die crachten der winden, ende der menschen ghedachten, dye onderscheydenheden der spruyten, ende die crachten der wortelen,

21

ende ick leerde alle dinghen dye verborghen ende onuersien zijn, Want die constighe maker alder dinghen, heeft my gheleert wijsheyt,

22

In haer is die heylige gheest der verstandenissen, eenich, menichfoudich subtijl wel sprekende seech, onbesmet, seker soet, beminnende dat goede, scherp die nyet en verbiet wel te doene, vriendelijc,

23

goedertieren, ghestadich, zeker, vry, hebbende alle duecht, alle dinghen voorsiende, ende dye alle verstandige gheesten ontfaet reyn subtijl,

24

Want wijsheyt is beroerlijcker dan alle beroerlijcke dinghen, Sy reycket ouer al om haer reynicheyt.

25

⁺Sy is een wasem der cracht Godts, ende een sonderlinghe wtuloeyinghe der claerheyt des almoghenden Godts, ende si is sonder smet suyuer, daer omme en coempt niet dat besmet is in haer,

+ D

26

Want si is een schijnsel des eewighen lichts, ende een spieghel sonder vlecke der maiesteyten Gods, ende dat beelt zijnder goetheyt,

27

Ende al is si een, si vermach alle dinghen, ende in haer seluen blijuende verniewet si alle dinghen, ende si draecht haer ouer door dye gheslachten in die heylighe sielen, Sy heeft Gods vrienden ende die propheten ghestelt,

28

Want god en heeft nyemant lief, dan den ghenen dye metter wijsheyt in woont,

29

want dese is scoonder dan die sonne, ende si is bouen alle ghescictheyt der sterren, den lichte gelijct wort si die eerste gheuonden,

30

Den lichte volget den nacht, maer dye quaetheyt en verwint die wijsheyt niet.