De Vorsterman Bijbel

§ Dat .xij. Capittel.

1

⁺GHedenct ws scheppers, in die daghen uwer ioncheyt, eer die daghen uwer quellinghen comen, ende die iaren genaken, daer ghi sult segghen, Si en behaghen mi niet,

+ A

2

Eer dan die sonne ende dat licht, mane ende sterren duyster worden, ende die wolcken weder comen na den regen,

3

Ter tijt als die bewaerders int huys sullen beuen, ⁺ ende die starcke hen crommen, ende die muelenaers ledich staen dat haerder ghetal weynich geworden is, ende die sienders voor die gaten duyster sullen worden,

+ § Ter tijt, Hier bescriuet hi des menscen ouderdom

4

ende si die dueren opter straten sullen sluyten, malende in een nedere stemme, ende sullen ^* staen) tot der stemmen des voghele sancs, ende sullen ^* doof worden) al die dochteren des sangs,

* th. wachten

* th. hen buyghen

5

⁺dat oock die hooghe vreesen ende ontsien op den wege, als de amandelboom sal bloyen, ende die sprinchaen ^* vet sal worden, ende dat verdoruen sullen worden die capperen) want die mensche sal varen derwaerts int huys, daer hi eewelic blijft, ende die claghers sullen omme gaen op die strate,

+ B

* th. beladen wort, ende aflaet van alle welust

6

Eer dan die silueren coorde onstucken getrocken worde, ende de gulden ^* huyue) verloope, ende den eemer onstucken gestooten worde aen die fonteyne, ende dat dat rat breke aen den putte.

* th. fonteyne

7

Ende den stof weder totter aerden come daer hi af geweest is, ende die gheest weder tot Gode die hem ghegeuen heeft.

8

⁺ ☞ Het is al gheheelic ydel, sprac ^* Ecclesiastes) ende alle dinck is ydelheyt,

+ C

* h. predicant

9

Ende doen Ecclesiastes die dalder wijste was, leerde hi tvolc ende vertelde, wat hi gedaen hadde, ende ondersocht, ende stelde veel byspraken. Hi socht dat hi aengenaem worden soude vinden, ende schreef die rechte woorden vol van waerheyt.

10

Die woorden des wijsen zijn als prickelen ende nagelen vast gemaect in die hooghe plaetsen,

11

die door die meesters des ghemeynen raets, ende van eenen herdere gegeuen zijn,

12

⁺Mijn sone en eyscht niet meer dan dit. Want vele boecken te maken en is gheen eynde, ende dicwils te ^* ouerpeysen,) is quellinghe des vleeschs.

+ D

* th. prediken

13

Laet ons alle te ghader hooren dat eynde des prekens, Vreest Godt, ende houdt sine geboden, want tbehoort allen menschen toe,

14

Want God sal alle wercken die gescieden voor dat oordeel brengen, dat verborghen is, het si goet ofte quaet.

§ Hier eyndt dat boeck Ecclesiastes Dat is, dat boeck des Predicants