De Vorsterman Bijbel

§ Dat .vij. Capittel.

1

⁺WAt ist den mensche van noode dingen te soecken die bouen hem zijn, aengesien, dat hi niet en weet in sinen leuen int getal der daghen zijnder pelgrimagien, ende den tijt die ghelijck der schaduwe voorbi ghaet, wat hem profitelijc is, oft wie sal hem moghen segghen, Wat na hem onder die sonne ghescieden sal?

+ A

2

Een goeden naem is beter dan goede salue, ende den dach des doots, dan den dach der geboorten,

3

☞ Het is beter in een lijchuys te ghaen, dan in dat huys des brassens. Want int ghene wort vermaent dat eynde alder menschen, ende die leuende nemet ter herten, ende ouerdenct wat gheschieden sal,

4

^* Die gramscap) is beter dant lachen, want doort trueren des aensichts wort, dat herte [kolom] des misdadigen verbetert,

* th. trueren

5

Dat herte der wisen is ^* daer droefheyt is) Ende dat herte der sotten int huys daer blijschap is.

* the. indat claechhuis

6

Het is beter te ontfaen dat schelden des wisen, ⁺ dan door het pluymstriken ende smeeken der sotten bedroghen te worden,

+ B

7

Want dat lachen der sotten is ghelijck dat craken der bernen der doornen onder den potte, Ende dat is ooc ydelheyt.

8

Luegenachtighe beclappinge verstoort den wijsen, ende vernielt die crachte zijnder herten.

9

Dat eynde des ^* gebets) is beter dan zijn beginsel. Een verduldige is beter dan een beroemende.

* the. dincs

10

En zijt niet snel van moede om toornich te worden.

Want toornicheyt rust inden scoot eens sotten.

11

En segget niet wat sake ist, dat die voorledene tijden beter waren dan dese nv zijn? Want sulcke vrage is sottelijc luydende.

12

Die wijsheyt met rijcdomme is profiteliker ende baet te meer den ghenen die die sonne sien,

13

want ghelijc wijsheyt beschermet, alsoo beschermt oock ghelt, maer dat hebben meer die onderwijsende leeringhe ende wijsheyt, dat si tleuen gheuen den ghenen diese besitten.

14

Aensiet die wercken Godts dat nyemant dien beter ghemaken en can, ende onderwijsen dien hi versmaet heeft,

15

⁺Inden goeden dage gebruyket goet, ende schout doch ende wacht v voorden quaden dach, Want desen maecte God ghelijc als dien, Daerom, op dat die mensche niet en soude vinden teghen hem rechtueerdighe clachten.

+ C

16

Dese dinghen hebbe ic ooc gesien ter tijt van mine ydelheyt, Een rechtueerdich vergaet in zijnder rechtueerdicheyt, Ende een ongodlijcke leeft langhe tijt in zijnder boosheyt

17

En wilt niet te vele rechtueerdich zijn ende en smaect niet meer dan van noode en is

18

En zijt niet verbaest, op dat ghi niet vele onduechdelijck en doet, ende en wilt niet sot zijn, op dat ghi in uwen ontijt niet en sterft,

19

het is goet dat ghi den rechtueerdighen onderhout, ende en ontrect v hant van hem niet, ☞ want die God vreest en versuymt niet.

20

⁺Die wijsheyt sterct den wijsen meer dan thien machtighe princen der stadt,

+ D

21

Want al daer en is gheen mensce rechtueerdich opter aerden, die goet doet ende niet en sondiget,

22

Ende en neemt ooc niet ter herten al watmen seyt, op dat ghi messchien niet en hoort uwen knechte v vloecken,

23

want v consciencie weet dat ghi ooc ander dicwils geuloect hebt.

24

Alle dinghen hebbe ick in wijsheyden ondersocht, Ick dachte seggende, Ick

[p. D6r]

sal wijs zijn, Maer si ghinc verder van m

25

Ende meer dan si te voren was, Diep is die diepte, Wie salse vinden?

26

Ick hebbe in minen moet alle dinghen doormerct, op dat ick weten soude, ende aenmercken ende ondersoecken de wijsheyt ende reden ende dat ick onderkennen soude die ongodlicheyt des sotten ende dwalinge der onwisen,

27

☞ Ende ic vant een vrouwe bitterder, dan die doot die eenen strick des iagers is, Ende haer herte is een nette, Ende haer handen zijn banden Wie God behaget, die sal haer ontloopen, Maer die sondaer sal worden door haer handen gheuangen.

28

Siet, dat heb ick beuonden, seyt ^* Ecclesiastes) Deen na den anderen, dat ick die redene soude onderuinden,

* h. predicant

29

Die mine siele nacht soeket, ende ic en hebs niet geuonden, Onder duysent hebbe ick eenen man geuonden, Maer ick en hebbe onder allen niet een wijf geuonden.

30

Alleen hbbe ick dat gheuonden, dat God, den mensche oprecht ghemaect heeft, Maer ^* hi heeft hemseluen onderwonden met ontallike vele vraghen, Wie is soodanige als die wijse, ende wie bekent dat ontbijnsele des woorts.)

* h. si sochten vele consten Wie is also wijs, ende wie kan dat wtleggen.

§ Van des wijsen kennisse, Ende dat die gheest niet en mach bedwonghen worden, van des menschen quaet, vanden sonden