De Vorsterman Bijbel

Dauids .c. ende .xxxiiij. psalm. ⁺ Laudate. Haleluya.

+ int heb. den c. ende .xxxv. Psalm.

1

LOeft den naem des HEEREN, Loeft ghi knechten ^* den HEERE.)

* h. des HEREN

2

Ghi die in den huyse des HEEREN staet In den voorhouen des huys ons Gods.

3

⁺Louet den HEERE, want die HEERE is goet, Lofsinget sinen name, want hi is soete

+ A

4

Want die HEERE heeft hem Iacob vercoren, Israel tot ^* zijnder besittinge.)

* h. eygendom

5

Want ic kenne, dat die HEERE groot is, Ende onse HEERE voor alle goden.

6

Alle wat hi wilt dat heeft hi gedaen, Inden hemel ende opter aerden, in die zee, ende in allen diepten.

7

⁺Die die wolcken laet opgaen vanden eynde der aerden, die den blixem tot regen maect Die die winden, wt sinen verborgene schatten voortbrengt.

+ B

8

Die die eerste gheboorte sloech in Egipten, beyde vanden menschen tot des vees.

9

Ende liet sine teekenen ende wonderlicheyden comen, te midden onder v Egipten lant Ouer Pharao ende alle zijn knechten.

10

⁺Die vele volcken versloech, Ende doodede machtighe coninghen.

+ C

11

Seon der Amoriten coninck, Ende Og den coninck van Basan, ende alle die conincrijc in Canaan.

12

Ende ghaf haer lant, tot een erffenisse, tot een erffenisse sinen volcke van Israel.

13

HEERE, uwen naem duert eewelijc, Vwe gedachtenisse HEERE, duert van geslachte tot gheslachte.

14

⁺Want die HEERE sal zijn volck oordeelen ende hem ouer sine knechten laten versoenen

+ D

15

Der heydenen afgoykens zijn, siluer ende [kolom] gout, Der menschen handen wercken.

16

Si hebben monden, ende en sullen niet spreken, Si hebben oogen, ende en sullen niet sien

17

Si hebben ooren, ende en sullen niet hooren Ooc so en is gheenen adem in haeren monde

18

Die dese maken moeten den seluen ooc ghelijck worden, Ende alle die op hen hopen.

19

O ghi huys van Israel gebenedijt den HERE, Louet den HEERE, ghi van Arons huis

20

Ghi vanden huyse Leui, louet den HERE. Ghi die den HEERE vreeset, louet den HEERE.

21

Gebenedijt si die HEERE wt Sion, die tot Ierusalem woont, Alleluya.