De Vorsterman Bijbel

§ Dauids .lxvij. Psalm, om hooch te singen. ⁺ § Exurg. deus.

+ int heb. den lxviij. psal

2

GOd stae op, ende zijn vianden moeten verstroyt worden, ende die hem haten voor hem vluchten.

3

Ghelijck den roock verghaet, so laetse verghaen, ghelijck dat wasch versmilt vanden viere, So moeten die ongodlicke verghaen voor gods aensichte.

4

Maer die gherechtighe moeten hen verbliden, ende vrolick zijn voor gods aenschijn, ende in vruechden ghenoechte hebben.

5

Singet gode, singet sinen naeme eenen lofsanc, maect die bane, dien die daer opclimt bouen der sonnen onderganc, sinen naem is die HERE, Verblijt v in zijn aenscijn,

6

die een vader der weesen is, ende een rechter der wedwen ⁺ Hi is god in zijn heylige wooninge,

+ B

7

god die doet deendrachtige tsamen in huis woonen.

[p. Ii7v]

Die die geuangen wt leyt in zijnder ^* crachten) des gelijcken ^* die verwiters die woonen in die grauen)

* thebre. tijt

* the. die wederspannige woonen int dorre

8

God, doen ghi voor ws volcs aenschijn wt troct, doen ghi voor bi ginct inder woestinen

9

Doen beefde die aerde, ende die hemelen dropen vanden aensichte des Gods Sinai, vanden aensichte van God die Israels God is.

10

Godt uwer erffenisse hebdi eenen ghewillighen reghen afghesneden, si is cranc gheworden, maer ghi hebtse volmaect.

11

Dine dieren sullen daer in woonen, God ghi hebt den armen in uwe soeticheyt bereydet

12

Die HERE sal dat woort geuen, ⁺ met groote ^* crachten) den genen diet euangelie leeren.

+ Mattei. x. Luce. xxi.

* the. scaren

13

Die coninghen der heyrscharen sullen onder malcanderen geurienden zijn, ⁺ ende de vercieringe des huys sal den roof wtdeelen

+ C

14

Ist dat ghi slaept tusschen die palen, soo sullen die vederen der duyuen versiluert zijn ende haer ^* achterste) in bleecke gout verwe,

* h. vlogelen

15

Als de almachtige ouer haer die coningen sal in Selmon ondersceyden, so salsi sneewit zijn

16

Den berch Godts is eenen vetten berch, Eenen gehoeuelden berch, eenen vetten berch.

17

Waeromme huppelt ghi ouer den ghehoeuelden berch? Godt heeft lust op desen berch te woonen, ende de HEERE sal daer eewelic totten eynde woonen.

18

Der waghens Gods is veel duysentmael thien duysent, die HEERE is onder hen inden heylighen Sinai.

19

Ghi zijt in die hoochte gheclommen, ende hebt die gheuanghenisse geuanghen, Ghi hebt gauen ontfangen voor die menschen, Ooc en hebben si daerenbouen niet gelooft, dat God die HEERE daer woont.

20

Gelouet si de HEERE dagelics, ⁺ die god onser salicheyt sal onzen wech geluckich maken,

+ Ephe. iiij.

21

Onse god is een god om salich te maken, ende ^{* +} den wtganc des doots is des HEEREN des HEEREN.)

* the. een heere der doot te ontlopen

+ D

22

Nochtans sal God die hoofden zijnder vianden in stucken breken, die toppen des hars der ghenen, die wandelen in haer sculden.

23

De HEERE heeft geseyt, ⁺ Ic sal Basan bekeeren, inder diepten der zee sal icken bekeeren.

+ Basan dat is die vette ram

24

Op dat uwe voet int bloet uwer vianden geuerwet worde, ende die tonghe uwer honden, vanden seluen.

25

God, si hebben gesien uwe voorgangen, die voortgangen mijns gods ende conincs, ⁺ die in die heylige plaetse is.

+ E

26

De princen zijn voorcomen vergadert met den [kolom] sanghers int midden der maechdekens die op tamboeren speelden.

27

Gebenedijt god den EEREN inder heyligher kercken vanden fonteynen van Israel,

28

daer was Beniamin die iongelinc inden ouerghanck des gheests. Die princen van Iuda zijn haer leytsmannen die vorsten van Sabulon ende van Neptalim.

29

God ghebiet uwer crachte, maect stantachtich god, dwelcke ghi in ons gewrocht hebt.

30

⁺Om uwen tempel, die in Ierusalem is, sullen v die coninghen ghiften offeren.

+ F

31

Berispt de wilde beesten des riets, die verghaderinge der stieren, onder die ^* koeyen) des volcs, dat si met ghelde souden wtsluyten, die gheproeft zijn. Vernielt die heydenen, die oorloghe willen hebben,

* theb. kalueren

32

die boden sullen comen wt Egipten dat Moorenlant sal met zijn handen tot Gode voorcomen.

33

Singhet den HEERE, ghi conincrijck der aerden lof

34

die geclommen is bouen den hemel der hemelen totten oosten. ⁺ Siet, hi sal zijnder stemmen geuen een stemme van crachte,

+ G

35

geeft Gode eere, ouer Israel is zijn groote heerlicheit, ende zijn cracht inden wolcken

36

God is wonderlijck in sine ^* heyligen), God van Israel sal zijn volck stercheyt ende crachten gheuen, ghebenedijt si God.

* the. in zijn heylichdom