De Vorsterman Bijbel

§ Dauids .vij. psalm. Dauids onschult, daer hi den Heere afsang, om des Mooren woorden des soons Iemini. § Domine deus meus in te speraui

2

⁺HERE mijn God in v heb ic gehopet, maect mi ghesont van alle minen veruolghers, ⁺ ende verlosset mi.

+ A

+ ij.regum. xvi

3

Dat hy nyet als eenen leeuwe mijn ziele en gripe in eenigen tijt, om datter niemant en is die verlost noch salich maect.

4

HEERE mijn God, ist dat ick dit ghedaen heb, ende is onrecht in minen handen.

5

Heb ic ^* quaet geloont die mi quaet wederom gheuen, laet mi na mijnen verdiensten ydel van minen vianden vallen.)

* theb. quaet geloont de vrede met mi hebben: ofte minen vyant sonder sake ontcleet

6

So veruolghe mijn viant mine siele, ende grijpse, ende vertrede mijn leuen in die aerde, ende legghe mine eere in dat stof, Sela.

7

Staet op HERE in uwer gramschap, verheft v in die eynden mijnre vianden. Ende staet op HERE mijn God int gebot, dat ghi gheboden hebt,

8

Ende die ^* synagoge des volcs sal rontsom v staen, ende coemt om der seluer wille weder int hooghe

* die verghaderinge

9

Die HERE oordeelt dat volck, Oordeelt mi HERE na mijnder gherechticheyt, ende na mijn onnooselheyt ouer my.

10

⁺Die schalcheyt der sondaren vergae, ende ghi sult den rechtueerdigen voort bescicken, ghy Godt die die herten ende nieren ondersoect.

+ B

[p. Hh3v]

11

⁺Mine rechtueerdige hulpe is vanden HERE, die den oprechtigen van herten salichmaket,

+ C

12

God is een rechtueerdich rechter, sterc ende lijdsaem, sal hi alle dage niet gram worden,

13

Ten si sake dat ghi bekeert, soo heeft hi zijn sweert opgeheuen, ende sinen boge gespannen, ende dien bereet.

14

⁺Ende heeft daer op bereyt dootlic ^* vaten) sine pijlen heeft hi bereyt om te bernen.

+ D

* th. ghescut

15

Siet, hi draecht onrechtueerdicheit, hi heeft ontfanghen rouwe, ende heeft quaetheyden ghebaert.

16

Hi heeft eenen cuyl wtgegrauen, ende dien opghedaen, ende is in dat gadt geuallen dat hi ghemaect heeft.

17

Sijn smerte sal weder op zijn hooft comen, ende zijn boosheit op zijn sinen cop neder vallen.

18

Ick sal ^* belijden) den HERE na zijnder gerechticheyt, ende sal louen den name des alderhoochsten HERE.

* th. dancken.