De Vorsterman Bijbel

§ Dauids .v. psalm. Voor die erffenisse. § Verba mea.

2

⁺HEERE verneemt mijn woorden, met uwen ooren, verstaet mijn roepen.

+ A

3

Hebt achtinghe op die stemme mijns ghebets, mine coninc ende mijn God

4

Want ic sal tot v beden, HERE smorgens suldi mine stemme verhooren,

5

des morgens sal ic bistaen ende aenschouwen, Want ghi en zijt niet een God, dien boosheit behaecht

6

Noch gheen quade mensche en sal bi v woonen, Noch gheen onrechtueerdige en sullen blijuen voor uwen ooghen.

7

⁺Ghi haet alle die ghene die quaetheit wercken. Ghy sult verdoen alle die lueghenen spreken. Die HERE sal verachten den bloetghierigen ende bedriechliken man.

+ B

8

Maer ick sal in v huys ghaen in menichfuldicheyt van dijn bermherticheyt, ende sal aenbeden tot uwen heylighen tempel in uwer vreesen.

9

HERE leyt mi in uwe gherechticheyt, om mijnder vianden wille, schicket rechte uwen wech voor minen ghesichte.

10

⁺Want in hueren mont en is gheen waerheyt, huere herte is ydel,

+ C

11

huere kele is een open graf, met hueren tonghen deden si bedroch God oordeeltse, si moeten vallen van hueren voornemen, stoetse wt om huerder menichte der boosheyt wille, want si v tot gramschappen verwect hebben HERE

12

Laetse hen verblijden alle dye in v hopen, inder eewicheit sullen si vrolijc wesen, ende ghi sult in hen woonen. Ende si sullen al in v glorieren die uwen name lief hebben,

13

Want ghi sult den rechtueerdighen ghebenedien. HERE ghi hebt ons ghecroont, als met den [kolom] schilt dijns goeden wille.