De Vorsterman Bijbel

§ Dat .xxxvij. Capittel.

1

⁺HIer af is mijn herte veruaert, ende is beroert van zijnder plaetsen,

+ A

2

hi sal hooren de hooren inden anxte zijnder stemmen gheluyt, ende die sprake die van sinen monde wtgaet

3

Hi aenmerct bouen alle hemelen, ende zijn licht schinet op die eynden der aerden.

4

Na hem sal een gheluyt briesschen, ende hi sal donderen met een stemme zijnder grootheit alsmen sine stemme gehoort heeft, en salmense niet doorgronden,

5

God sal donderen met sine stemme wonderlic die groote dingen doet ende onbegripelijc,

6

Hi ghebiet den snee ^* dat hi nedercome) opter aerden, Ende totten reghen des winters, ende den plasregen ^* van zijnder stercte)

* the. ende hi comet terstont.

* the. is daer mede ghemaect.

7

⁺Diet beteekent in die handen van allen menschen, op dat elckerlijc bisonder zijn wercken bekennen souden.

+ B

8

Dat wilt diere gaet in die holen, ende sal woonen in zijn plaetse,

9

Vant ^* binnenste) sal comen onweder, ende van noorden coude,

* th. zuyden

10

Als God waeyet, soo wast die vorste te samen, ende wederom worden die wateren alder breedste ghestort. ^*

* the. door den neuel brect zijn lichte.

11

Die tarwe begheert die wolcken), ende dye wolcken spreyden wt haer licht,

12

dat alle dinghen rontsom gaet, doormercken daerse den wille des regeerders hebben wil, dat zijt beschicken, al wat hi hen ghebiet op daertrijcke,

13

het si ouer een geslachte, oft in haer lant oft in wat stede zijnder ontfermherticheyt, hi ghebiet datse gheuonden souden worden.

14

Iob hoort hier na, staet ende merct die wonderlicheden Gods,

15

weet ghi wanneer Godt den reghen beual dat hi verthoonen soude dlicht van sinen wolcken?

16

weet ghy ooc dye groote papen der wolcken? ende kendy dye volcomen consten?

17

⁺En zijn v cleederen nyet heet als het aertrijc bewaeyet is vanden zuyden wint?

+ C

18

Ghi hebt ter auontueren met hem die hemelen getimmert, die alderuaste zijn [kolom] recht oftse van metaele gheghoten waren,

19

Thoont ons wat wi hem seggen sullen, want wy worden beuonden in duysternisse,

20

Wie sal hem vertellen dat ic spreke? Ist ooc dat yemant spreket, die sal worden verslonden,

21

Maer nv en sien si dat lichte niet.

Haestelijck sal die locht verandert worden in wolcken, ⁺ ende eenen doorghaenden windt salse veriaghen,

+ D

22

Van noorden coemt het ⁺ gout, ^* ende van God vreesachtighe louinghe)

+ gout dat is claer weder so claer, als fijn gout

* th. ten loue voor den veruaerlijcken God

23

want wi en moghen hem niet weerdelike vinden Hy is groote van stercheit, ende in oordeel ende rechtueerdicheit, ende hi en mach hem nyet wt sprekende vertellen.

24

Daer omme sullen hem dye mannen vreesen, ende alle dye hen seluen laeten duncken, dat si wijs zijn, en sullen hem nyet dorren aenscouwen.

§ Hoe God zijn wonderlicheden Iob vertelt, die hi vant beghinne ghedaen heeft.