De Vorsterman Bijbel

§ Dat .xxxv. Capittel.

1

⁺ENde noch sprac Heliu dese redenen voort

+ A

2

Achtet ghi uwe ghedachten rechtuaerdich dat ghi segghet, Ic ben rechtuaerdiger dan God?

3

Want ghi hebt gheseyt, V en behaecht nyet dat rechtuaerdich is, ofte wat salt v baten ist dat ic sondighe?

4

Hieromme soo sal ick dan antwoorden uwen woorden, ende uwen vrienden met v,

5

Siet opwaerts, ten hemel, ende aenmercket, ende aenschouwet dye wolcken dat hi hoogher dan ghi is

6

⁺Sondicht ghi, wat suldi hem letten? ende ist dat uwe boosheden vermenichfuldicht zijn wat sulde ghi teghen hem doen?

+ B

7

Ende ofte ghy rechtuaerdelijck doet, wat suldy hem gheuen, ofte wat sal hy van uwen handen nemen?

8

Eenen mensche ghelijck als ghy zijt, dyen sal v boosheyt letten, ende eens menschen kinde sal uwe rechtuaerdicheyt helpen.

9

Dye selue sullen roepen ende crijsschen, om die menichte der ouerdadiger clappers ende roepen ouer dat gewelt der armen vanden tyrannen,

10

Ende hy en seyde niet, ⁺ Waer is God mijn schepper, die den sanck gaf inder nacht,

+ C

11

die ons leerde bouen dat vee opter aerden, ende onderwijst ons, bouen dye voghelen des hemels,

12

Sy sullen daer roepen, ende hi en salse niet verhooren, om dye houaerdicheit der booser,

13

Want God en sal te vergeefs niet verhooren, ende die almachtighe en sal nyet aensien dye saken van een yeghelijcken.

14

⁺Ooc als ghi segget, hi en merckes niet, laet v oordeelen in zijn teghenwoordicheit, ende verwacht hem,

+ D

15

Want nv en brenghet hy zijn toornighe gramschap nyet toe, noch hi en wreect niet seer dye groote sonde,

16

daeromme doet Iob sinen mont te vergeefs op, ende vermenichfuldicht dye woorden, sonder conste.

§ Hoe Heliu weder bewijst, waerom dat god straft, ende berispt.