De Vorsterman Bijbel

§ Dat .xxvi. Capittel

1

⁺IOb antwoorde ende sprack,

+ A

2

Wiens hulper zijt ghy? dien dye ghene crachte en heeft? ondersedt ghi den arme vanden ghenen die niet sterc en is?

3

Wien geeft ghi raet? dien messchien die gheene wijsheyt en heeft ende thoont v groote voorsienicheit?

4

Wien hebdy willen leeren? den ghenen dye den adem gemaect heeft?

5

Siet de ^* ruesen suchten onder de wateren, ende die by hen woonen,

* Ruesen dat zijn die grote waluiscen ende bedieden die grote tirannen

6

⁺Dye helle is naect voor hem, ende dat [kolom] verderuen en heeft gheen decsele.

+ B

7

Hy breyt wt dat noorden op ydelheyt, ende hanghet dye aerde aen niet,

8

Hi bindet dat water te samen in zijn wolcken, dat si nyet te samen nederwaerts wt en schoren,

9

Hi hout dat aensichte van sinen stoele, ende breydet sinen neuele daer ouer,

10

⁺Hy heeft om dat water een perc ghesedt, tot dattet lichte metten duysternissen gheeyndet worden,

+ C

11

Dye pilaren des hemels beuen, ende si ontsien hen van sine schelden,

12

Van zijnder crachte wort die zee onuerhuets beroert, ende van sinen verstande, heeft hy den houerdighen gheslaghen,

13

Sinen geest heeft dye hemelen verciert, ende door dye hulpe der opheffinghe zijnder handt is dat ^* cromme) serpent wtghecomen,

* oft bedrieghelick.

14

Siet dit is een deel gheseyt van sine weghen, Ende als wi nauwe ghehoort en hebben een cleyne dropken van sinen sermoon, wie sal moghen sien den donder slach van zijnder grootheyt?

§ Van Iobs stantachticheyt, ende van des ongodlijcken deel by God.