De Vorsterman Bijbel

§ Dat .xxij. Capittel.

1

⁺DOen antwoorde Eliphas van Theman, ende sprac,

+ A

2

Meynt ghi dat een man Gode gelijc si, al waer hi ooc volmaect van consten?

3

Wat batet Gode dat ghi rechtuaerdich zijt, oft wat gheeft ghi hem dat uwe leuen al sonder vlecke is?

4

Meynt ghi dat hi sal vreesen v te straffen, ende met v voor tgerechte te comen,

5

Ende uwe boosheit is oock vele, ende uwer misdaet en is gheen eynde,

6

ghy hebt voortijts uwen broeder een pant ghenomen, sonder sake, Ghi hebt den naecten die cleederen wt getrocken,

7

Ghi en hebt die vermoeyde niet ghelaeft met water, ende hebt den hongerigen dbroot ontrocken,

8

Ghi hebt in uwer armen gewelt tlant beseten, ende ghi die alder machtichste hebtse ingehouden,

9

Die weduwen hebt ghi ydel laten ghaen, ende die armen der weesen hebt ghi gebroken,

10

Daerom zijt ghi met stricken omuaen, ende vreese heeft v onuerhoets verscrickt,

11

Ende ghi meyndet die duysternis niet te sien, ende met die water vloet niet bedect te worden.

12

Meynt ghy om dat God hoogher is dan den hemel, ⁺ ende siet den toppe des hoofts der sterren hooge,

+ B

13

Wilt ghi daerom seggen, wat weetet God? Ende oordeelet hi dwelc in duysternis is?

14

Die wolcken zijn sine scuylcamer, ende en siet niet onse dingen aen, ende wandelt inden omghanck des hemels.

15

Wilt ghi der werelt loop achten dien die onrechtuaerdighe ghetreden hebben?

16

die vergaen zijn eer dan het tijt was, ende dye vloet heeft haer fundamenten om gheworpen,

17

⁺Die tot Gode seyden, Gaet van ons, ende si achten den almachtighen recht oft hi niet doen en mochte

+ C

18

daer hi nochtans haer huysen met goeden veruult hadde, Maer der ongodliker raedt si verre van my,

19

Die gherechtighe sullen sien ende hen verbliden, ende die onschuldighe salse bespotten,

20

Is haer opboringe nyet afgehouwen, ende haer ouerblijfsel heeft

[p. Gg4v]

dat vier verslonden?

21

Dus vereenicht v nv met hem, ende hebt vrede, ⁺ ende door dese dinghen suldi die beste vruchten hebben.

+ D

22

Neemt die wet van sinen monde, ende stelt sine redenen in v herte.

23

Bekeert ghi v wederom totten alder machtichsten, so sult ghy ghesticht worden, ende ghi sult die onduecht verre van uwer wooninghen doen,

24

So sal hi voor aerde steenen gheuen, ende voor die steenen guldene beken,

25

Ende die almachtighe sal teghen uwe vianden zijn, ende tsiluer sal v toe gehoopt worden, ⁺

+ pro. xxix.a.

26

Dan sult ghi oueruloeyen van wellusticheit, tot den almachtighen, ende v aensicht tot Gode opheffen,

27

So suldi hem bidden, ende hi sal v verhooren, ende sult uwe gelofte betalen,

28

Wat ghi voor sult nemen dat sal v soo gheschieden, ende dat licht sal op uwen weghe schijnen,

29

want die verootmoedighet is, sal zijn in eere, ende wie sine oogen neder slaet, dye sal ghenesen worden,

30

die onschuldighe sal behouden worden. Maer hy sal behouden worden om zijnder handen reynicheits wille.

§ Hoe Iob antwoort dat hi des rechters oordeel ontsiet.