De Vorsterman Bijbel

§ Dat .xvij. Ca.

[p. Gg3r]

1

⁺MInen gheest des adems sal dunne worden, ende mijn daghen vercort, ende alleen blijft mi tgraf ouer,

+ A

2

Ic en heb nyet ghesondicht, ende mijn ooghe woont in bitterheden,

3

Verlost mi, ende sedt mi neuen v, ende wiens handt dat v belieft, laet teghen mi vechten,

4

Ghi hebt huere herte verre gedaen vander leeringhe, daer om en sullen si niet worden verheuen,

5

⁺Hi belouet sinen ghesellen den buete wel, maer zijnder kinderen ooghen sullen ghebreken,

+ B

6

Hi heeft mi ghestelt in een ghemeyn byspreken des volcs, ende ic ben voor huer een exempel,

7

Mijn ooghe is duyster gheworden van gramscappen, ende mijn leden zijn by na te niete,

8

Daer ouer sullen die gherechtige verwonderen, ende die onsculdige sal verwect worden teghen den hypocryte,

9

Dye gherechtige sal sinen wech behouden, ende die van suyueren handen sal hi stercheyt gheuen

10

⁺Daer omme keert v alle herwaerts, ende coemt, ende ic en sal ghenen wisen onder v vinden

+ C

11

Mine daghen zijn vergaen, mijne gepeysen zijn verstroeyt, ende hebben mijn herte ghepijnicht,

12

ende hebben den nacht inden dach gekeert ende weder om hope ic nader duysternisse licht

13

⁺Al ist dat is al verbeyde, so is doch dye helle mijn huys, ende in duysternisse heb ic mijn bedde ghemaect,

+ D

14

Ic heb geseyt den vuylen ettere ghi zijt mijn vader, ende den wormen ghi zijt mine moeder, ende mine suster,

15

Waer is dan mijn verwachtinge ende wie merct mijn lijdsaemheyt,

16

Alle dingen die mi toe behoren sullen neder dalen in dalder diepste helle, waendi dat mi daer eenige ruste sal wesen?

§ Hoe Baldath der ongodlijcken menschs verworpinge vertelt.