De Vorsterman Bijbel

§ Dat .vij. Cap.

1

⁺ALdus ghinghen die coninc ende Aman in ter maeltijt, dat si metter coninghinne drincken souden,

+ A

2

Ende doen sprac die coninck des anderen daechs, als hi vanden wijn verwermt was, Wat is v begheerte Hester? op datment v geue, ende wat eyscht ghi? al waret oock mijn halue conincrijc ghi sullet verweruen,

3

Tot welcken si antwoorde, ende sprac, Heb ic genade voor v gheuonden, O coninck, ende behaget v, so geuet my mijn leuen om

[p. Ff3v]

mijnder beden wil, ende mijn volck daer ic om bidde,

4

Want ic ende mijn volc zijn geleuert dat wi ontwee gewreuen, bedoruen, gedoot, ende vernielt souden worden, ⁺ Ende oft God wilde, dat wi tot knechten ende maerten werden vercocht, soo waert quaet datmen verdraghen mochte, ende al suchtende wilde ic swigen, maer nv isser een onse viant, wiens wreetheyt wederuloeyt totten coninc toe.

+ B

5

Die Coninc Asswerus antwoorde, ende sprac, wie is die? oft ^* van wat machte) is hi, dat hi dese dingen derre doen?

* thebre. oft waer

6

Hester sprac, de viant ende wederpaertijder is dese boose Aman, Aman dese woorden hoorende, versloech hi hem voor den coninc ende voor die coninginne, ende en dorste haer gramlic aensicht niet verdragen,

7

⁺Ende die coninc stont op vander maeltijt, ende vanden wijn in zijnder verbolgentheyt, ende ginc inden hof ^* die met boomen besedt was) Ende Aman stont ooc op, om te bidden die coninginne Hester, om zijn leuen, Want hi sach dat hem nv een ongheluc vanden coninc bereyt was.

+ C

* thebr. aent huys

8

Ende doen die coninck weder keerde wt den boomgaert ^* die met boomen omsedt was) inder camere der maeltijt, heeft hi beuonden dat Aman geuallen was ^* opt bedde) daer Hester op ^* lach) ende hi sprac, wilt ghi ooc die coninginne vercrachten in mijnder tegenwoordicheyt. Dat woort en was nauwelic wt des conincs monde gegaen, si en bedecten ter stont Amans aensicht,

* thebr. aent huys.

* the. op dye bancke

* theb. sadt.

9

ende Arbona een vanden camerlingen, die in sconincs dienst stont sprac. ⁺ Siet daer staet eenen boome inden huyse Aman .l. ellen hooch, voor Mardocheo bereyt (die goet voor den coninc ghesproken heeft) Die coninck sprac, Hanct hem daer aen.

+ D

10

Also is Aman ghehangen aen die galge die hi Mardocheo bereyt hadde, Doen lach sconincs gramschap

§ Hoe Mardocheus vanden coninck verheuen wert, ende hoe Hester nieuwe brieuen vanden coninc verwerf, waer af die Ioden verblijt worden