De Vorsterman Bijbel

§ Dat .xij. Capittel.

1

⁺DOen hiet hise ingaen, daer zijn scatten gheset waren, ende hi hietse daer blijuen, ende hi beschicte wat spijse datmen haer van zijnder maeltijt soude geuen,

+ A

2

Den welcken Iudith antwoorde ende seyde, Nv en mach ic niet eten vanden ghenen, dat ghi mi gebiet te geuen, op dat die vertoorninghe op mi niet en come, Maer ick sal van dien eten, dat ick met mi gebracht heb,

3

Holofernes seyde, Ist dat v dese dinghen gebreken, die ghi met v ghebracht hebt, wat sullen wi v dan doen?

4

Ende Iudith seyde, Mijn here v ziele leeft,want v dienstmaerte al dese dinghen niet verdoen en sal, tot dat God dese dinghen in mijn hant doe, die ick gedacht heb, ⁺ Ende zijn knechten leydense in die woninge daer hijt geboden had.

+ B

5

Ende doen si daer inginc, begeerde si, dat haer snachts orlof werde gegeuen wt te gaen voor den lichte buyten totten gebede, ende den HERE te bidden

6

Ende hi geboot sinen camerlingen, dat si .iij. dagen wt ende in soude gaen om haren god te bidden alsoot haer beliefde,

7

Ende snachts ginck si wt totten dale van Bethulien ende doopte haer in die waterfonteyne,

8

Ende als si opclam, badt si totten HERE den God van Israel, dat hi haeren wech wilde stieren totter verlossinghe zijns volcx,

9

ende ingaende bleef si reyn inde woninghe, tot dat si tsauonts haer spijse nam. [kolom]

10

⁺Ende tgheschiede inden .iiij. dach dat Holofernes maecte een auontmael sinen knechten, ende seyde tot Vagao ^* sinen gesnedenen) Gaet, ende beraet die Hebreeusce vrouwe dat si willichlijc consenteer met mi te woonen,

+ C

* oft gevuerden ghelubden, ontmanden sinen camerlinck meynt hi.

11

Want het is vuyl bi die van Assyrien, ist dat een vrouwe eenen man bespottet doende, dat si ontsculdich van hem gae,

12

Doen ginck Vagao in tot Iudith, ende seyde, Die goede dochter en ontsie haer niet in te gaen tot minen heere, op dat si gheeert worde voor zijn aensichte, ende ete met hem ende drincke wijn in ghenoechten,

13

Den welcken Iudith antwoorde, Wie ben ick, dat ick minen heere wedersegghen soude,

14

⁺Al dat voor zijn oogen goet ende dalderbeste sal zijn, dat sal ick doen, Wat hem behaecht, dat sal mi dalderbeste zijn alle die daghen mijns leuens,

+ D

15

Ende si stont op, ende vercyerde haer met haeren cleede, ende ingegaen zijnde, stont si voor zijn aensichte.

16

Ende Holofernes herte wert heel beroert, want hi bernde in haer begeerlicheyt,

17

Ende Holofernes seyde tot haer, Drinct nv ende sidt ter tafelen in ghenoechten, want ghi hebt gracie bi mi vonden,

18

Ende Iudith seyde, Mijn here ick sal drincken, want mijn ziele is huyden groot ghemaect voor al die daghen mijns leuens,

19

Ende si nam ende adt, ende dranck voor hem het ghene dat haer maerte haer bereyt had

20

Ende Holofernes wert vrolijc tot haer, ende hi dranck zeer veel wijns, also vele als hi oeyt in sinen leuen ghedroncken hadde.

[afbeelding]

§ Hoe Iudith Holofernis hooft afsloech inder nacht, ende hoe si dat in die stadt brochte.