De Vorsterman Bijbel

§ Dat .xi. Capittel.

1

⁺DOen seyde haer Holofernes, Sijt wel gemoet, ende en wilt niet verzaget zijn in uwer herten, want ic en heb noyt man gescadet, die den coninc Nabuchodonosor wilde dienen,

+ A

2

Waert dat v volc mi niet versmadet en hadde, ick en soude mijn glauie ouer hen niet opgeheuen hebben,

3

Maer nv segt mi, om wat saken sidi van hen gegaen ende heuet v behaecht tot ons te comen?

4

Ende Iudith seyde hem, Ontfanct die woorden uwer dienstmaecht, want ist dat ghi die woorden uwer dienstmaecht volcht, Godt sal een volcomen dinc met v doen,

5

Want Nabuchodonosor coninc der aerden leeft, ende zijn cracht die in v is, tot een straffinge alre dwalender zielen die leeft, dat hem niet alleen de menscen, en sullen dienen door v, maer de beesten des ackers zijn hem te wille,

6

⁺Want de cloecheyt dijns verstants wort allen luyden vercondicht ende het is alle der werelt kenlic gemaect, dat ghi alleen goet ende machtich zijt in alle zijn rijck ende v beleeftheyt wort allen landen vercondicht

+ B

7

Noch dat en is niet verborgen dat Achior gesproken heeft, noch dat en is niet ombekent dat ghi beuolen hebt hem toe te comen,

8

want het is kenlic dat onse god also midts den sonden vertoorent is, dat hi door zijn propheten ontboden heeft totten volcke, dat hise ouer sal leueren om haer sonden,

9

Ende want die kinderen van Israel, weten, dat si haeren god vertorent hebben so is v vreese ouer hen,

10

Hier en bouen heeftse den honger beuaen, ende vander dorheyt des waters worden si nv onder die dooden getelt

11

Voort ordineren si dit dat si haer beesten dooden, ende haer bloet drincken,

12

Ende die heylighe dingen des HEEREN haers gods, ⁺ die hi geboden heeft niet aen te roeren, dese dingen hebben si gedacht te hangen aen coren, wijn ende olie ende si willen de dingen verteren, die si met handen ooc niet aen en souden roeren, Hierom want si dese dingen doen, so ist seker dat si tot verderuinghe sullen worden ghegheuen.

+ C

13

Dwelc ic v dienstmaecht bekennende, ben van hen geulucht, ende die HEERE heeft mi gesonden v dese selue dingen te bootscappen,

[p. Ee7r]

14

Want ick uwe dienstmaerte diene mijnen God, oock nv bi v, ende v dienstmaerte sal wtgaen, ende ick sal God aenbidden,

15

ende hi sal mi segghen, wanneer hi hen haer sonden sal betalen, ende ick sal comen ende bootscappent v, also dat ick v te midden door Ierusalem sal leyden ende ghi sult al dat volck van Israel hebben, als schapen, die gheenen herder en hebben, ende daer en sal niet eenen hont teghen v bassen,

16

Want dese dingen zijn mi geseyt door die voorsienicheyt Gods,

17

⁺Ende want God op hen gram is, so ben ick ghesonden, om dese dinghen v te bootschappen,

+ D

18

Ende alle dese woorden behaechden voor Holoferne, ende voor zijn knapen Ende si verwonderden aen haer wijsheyt, ende deen seyde totten anderen,

19

Daer en is sulcken vrouwe niet op aerden, int aensien, in scoonheyt, ende in sinne der woorden.

20

Ende Holofernes seyde tot haer, God heuet wel ghedaen, die v voor dat volc heeft ghesonden, op dat ghi dat in onsen handen sout gheuen,

21

Ende want v belofte goet is, ist dat mi v God dat doet, so sal hi mijn God ooc zijn, ende ghi sult groot in Nabuchodonosors huys zijn, ende uwen name sal in alle die werelt ghenaemt worden.

§ Hoe Iudith oorlof van Holoferne vercreech te gaen bidden, ende van haer eyghen spijse te eten Ende hoe si gheroepen wort om met Holoferne te eten.