De Vorsterman Bijbel

§ Dat .ix. Capittel.

1

⁺ALs si wech gingen, so is Iudith in hare bidtcamer gegaen, ende heeft een haren hemde aengedaen, ende asscen op haer hooft gheleyt, Ende haer den HEERE plat neder streckende ter aerden, riep si totten HEERE seggende,

+ A

2

HEERE Godt mijns vaders Simeons, die hem tsweert gegeuen hebt tot een bescerminge der vremdelingher, die daer verderuers hebben geweest in haer beuleckinge, ende hebben de dgye der maecht tot scanden ontdect,

3

ende hebt haer wijuen tot eenen roof gegeuen, ende haer dochteren in geuangenisse, ende alle roof der deelingen uwen knechten, die uwen toorne neerstelijc wraken Ic bid v HEERE mijn god, coemt mi weduwe te hulpe,

4

Want ghi hebt de eerste dingen gedaen, ende gedacht dier die na die zijn, ende dat ghi gewilt hebt, dat is gesciet,

5

Want alle uwe wegen zijn bereyt, ende ghi hebt v oordelen in uwe voorsienicheyt gheset,

6

Aensiet nv die heyrleghers der Assiriers, gelijc ghi v doen geweerdicht hebt te sien die heyrlegers der Egypteners doen si gewapent na uwe knechten liepen, betrouwende in haer wagens ende rosuolck, ende in die menichte haerder strijtbaerder mannen

7

Maer ghi saecht op haer heyrlegers ende die [kolom] duysternissen maectense moede,

8

⁺Die afgront hielt haer voeten, ende die wateren bedectense.

+ B

9

HEERE, also moeten dese oock worden die in haer menichte betrouwen, ende in haer wagenen, ende in haer spiessen, ende gescutten, ende verhuegen in haeren glauien,

10

ende si en weten niet dat ghi selue onse Godt zijt, die doorlogen te niet doet, vant beginne, Ende uwen naem is HEERE,

11

Soo rechtet uwen arm op ghelijc vant beghin, ende worpt te neder haer cracht door uwe cracht, Haer cracht valle in uwe gramscap, die belouen uwe heylige dingen te sceynden, ende den tabernakel ws naems te besmetten, ende den horen ws outaers met haeren sweerde neder te worpen.

12

O HEERE, doet dat zijn houeerdicheyt met zijn selues sweert af worde gehouwen,

13

⁺hi worde geuangen metten stricken zijnre oogen in mi, ende ghi sult hem slaen wt den lippen mijnre liefden

+ C

14

Geeft mi stantachticheyt in minen moet dat ic hem versmade ende zijn cracht, dat ic hem omkeeren mach,

15

Want dat sal een gedenckenisse ws naems zijn, als hem die hant eens vrouwen ter neder heeft geworpen,

16

Want HEERE v cracht en is niet in menichte, noch uwen wille en is in die crachten der paerden niet, ⁺ Noch de hooueerdige en hebben v vant beghinne niet behaecht, maer der ootmoedigher ende saechtmoediger ghebet, heeft v altijt behaecht,

+ D

17

God der hemelen, scepper der wateren, ende HEERE alder creatueren, verhoort mi arme biddende, ende van uwer ontfermherticheyt vermetende,

18

HEERE ghedenct ws testaments, ende gheuet dwoort in minen mont, ende maect den raet sterc in mijnder herten, op dat uwe huys in heylichmakinge bliue,

19

ende dat alle luyden bekennen, dat ghi God zijt, ende datter gheen ander en is dan ghi.

§ Hoe Iudith inder nacht gaet na die van Assirien, ende hoese de bespieders van Assirien grepen.