De Vorsterman Bijbel

§ Dat .xi. Capittel.

1

⁺ENde ic sach eenen droom, ende siet vander zee clam eenen arent op, die twaelf vloghelen van vederen hadde, ende drie hoofden.

+ A

2

Ende ick sach, ende siet hi strecte zijn vloghelen wt ouer alle aertrijcke, ende alle dye winden des hemels waeyden op hem, ende werden verghadert,

3

Ende ick sach, dat van sinen vederen werden teghen vederen gheboren, ende si werden tot cleyne ende luttel vederkens,

4

want zijn hoofden waren rustende, ende dat halue hooft was meerder dan dander hoofden, maer die arent rustede met hen,

5

Ende ick sach, ende siet, den arent vloech met zijn vederen, ende hy regneerde opter aerden, ende ouer hen, dye daer inne woonen,

6

Ende ic sach, dat hem alle dinghen onder den hemel onderdanich waren, ende niemant en seyde teghen hem, noch niet een vander creatuere, dye opter aerden is,

7

Ende ic sach, ende siet, ende die arent stont op zijn clauwen, ende liet een stemme met zijn vederen wtghaen, segghende.

8

En wilt niet alle tsamen waken, slaept elc op zijn plaetse, ende waect eenen tijt lanc,

9

Maer die hoofden laet op dat wterste ghehouden worden.

10

Ende ic sach, ende siet een stemme en ghinc niet wt van sinen hoofden, maer vander middelt zijns lichaems.

11

Ende ick telde zijn teghen vederen, ende siet, daer wasser acht,

12

ende ic sach, ende siet, ⁺ ter rechter siden stondt een vedere op, ende regneerde ouer alle aertrijck,

+ B

13

Ende het gheschiede doen si regneerde, so quam haer dat eynde, ende haer plaetse en blijcte niet, Ende die nauolghende stont op, ende regneerde, ende si hielt veel tijts.

14

Ende het gheschiede als si regneerde, ende haer eynde quam, dat si niet en souden blijcken ghelijc die eerste.

15

Ende siet haer is een stemme wt ghelaten, segghende

16

Hoort ghi die soo langhen tijt die aerde hebt ghehouden, Dese dinghen vercondighe ick v, eer ghi beghint te verghaen.

17

Niemant na v en sal uwen tijt houden, noch ooc zijn helfte.

18

Ende die derde hief op, ende hielt dye heerscappie, ghelijc ooc die eerste, ende si en openbaerde selue ooc niet.

19

Ende also ghebuerdet van allen den anderen elck bysonder heerschappie te voeren, ende weder nieuwaerts gesien te wesen,

20

Ende ic sach, ende siet, in dien, tijt die volghende vederen werden op ghe-[kolom]recht, vander rechter siden, dat si ooc souden houden die heerscapie, ende wt desen wasser diese hielden, maer nochtans en begonsten si terstont niet te blijcken,

21

Want sommighe wt hen werden opgherecht, maer si en hielden die heerscappie niet,

22

Ende ic sach na desen, ende siet, dye twaelf vederen en waren nyet voor ooghen, noch die twee vederkens,

23

ende daer en bleef nyet ouer inden lichame des arens, dan twee rustende hoofden, ende .vi. vederkens.

24

Ende ic sach, ende siet, twee vederkens zijn ghedeylt in. vi. ende si bleuen onder thooft dat ter rechter siden was, want die vier bleuen in haer plaetse.

25

Ende ic sach, ende siet, dese pennen onder den vloghelen dachten hen op te rechtene, ende die heerschapie te houdene,

26

ende ic sach, ende siet, die eene is opgherecht, maer terstont en was si niet voor oogen,

27

Ende dye twee snelliker dan die eerste, en waren niet voor ooghen.

28

Ende ic sach, ende siet, die twee dye douerhant hadden, dachten by hen seluen, dat si selue ooc souden regneren,

29

⁺ende in dien als zijt dachten, siet een der rustender hoofden, het welcke dat middelste was, ontwaectede, want dat was dat meeste der twee hoofden.

+ C

30

Ende ic sach, dat die hoofden met hem veruult waren,

31

ende siet, dat hooft is bekeert met desen, die met hem waren, ende adt die twee pennen die onder die vloghels stonden, dye dachten te regneren,

32

Maer dat hooft veruaerde alle aertrijc, ende het heerscapte daer inne, ouer die ghene die die aerde bewoonen met veel arbeyts, ende het hielt dye heerschappie des aertrijcs, ouer alle die vlogelen die geweest waren.

33

Ende ick sach na desen, ende siet, dat middelste hooft onuersiens en was niet voor ooghen, ende dat ghelijck die vloghelen,

34

Maer die twee hoofden ghinghen te bouen, die welcke ooc desghelijcs regneerden ouer daerde, ende ouer die ghene die daer in woonen.

35

Ende ick sach, ende siet, dat hooft dat ter rechter siden was, verslijnde tghene datter slincker siden was.

36

Ende ic hoorde een stemme tot mi seggende. Besiet teghen v, ende aenmerct dat ghi siet,

37

Ende ic sach, ende siet, als een leeuwe gheweckt vander bosschagie briesschende, ende ick sach, want hi liet van hem een stemme des menschen totten arent, Ende hi seyde, seggende,

38

Hoort ghi ende ic sal tot v spreken, ende die alderhoochste sal v segghen,

39

En zijt ghi niet die te bouen zijt ghegaen vanden vier dieren, die ic dede regneren in mijne werelt, ende op dat door hen dat eynde haerder tijden souden comen?

40

Ende die vierde quam, ende verwan alle dye

[p. Dd2v]

dieren, die door waren gegaen, ende met moghentscap hielt hi tvolck des tijts met veel beuens, ende alle die werelt metten alder quaetsten arbeyt, ende hi bewoonde dat aertrijck so veel iaren met bedroch,

41

Ende ghi hebt die aerde geoordeelt, niet metter waerheit,

42

want ghi hebt die saechtmoedige ghequelt, ende ghi hebt die rustende ghequelt, ende ghi hebt dye logenachtige lief gehadt, ende ghi hebt haere wooninge bedoruen, die vrucht maecten, ende ghi wierpt die mueren neder der genen, die v nyet gedeert en hebben,

43

Ende uwe versmadinge is totten alderhoochsten opghegaen, ende v houaerdicheit totten stercken,

44

Ende die alrehoochste heeft aengesien die houaerdige tijden, ende siet, si zijn gheeyndet, ende haer sonden zijn veruult.

45

Hierom en openbaert v ghi arent niet, ende v veruaerlike vlogelen, ende v alderquaetste vederkens, ende v boose hoofden, ende uwe alderquaetste clauwen ende alle v ydele lichaem,

46

op dat alle die aerde vercoelt worde, ende wederkeere, verlost zijnde van uwer cracht, ende hopen mach dat oordeel ende ontfermherticheit des ghenen diese ghemaect heeft.

§ Hoe Esdras menigherhande gesichten sach, die hem wtgeleyt werden door den eenghel.