De Vorsterman Bijbel

§ Dat .x. Capittel.

1

ENde het geschiede doen mijn sone in was ghegaen in zijn slaepcamer, viel hi ende sterf,

2

⁺ende wi keerden alle die lichten om, ende alle mijn medeborgers stonden op, om mi te troosten, ende ic ruste tot opten anderen dach, tot snachts toe,

+ A

3

Ende het is gheschiet doen si alle gherust hadden dat si my souden troosten, dat ic soude rusten, ende ic stont snachts op ende vloot, ende quam in dit velt, ghelijc ghy siet,

4

ende ick dencke nv niet weder in die stadt te keeren, maer hier te blijuen staen, ende niet te eten noch te drincken, maer sonder ophouden [kolom] te weenen, ende te vasten, tot dat ick sterue,

5

Ende ic liet die redenen daer ic in was, ende ic antwoorde met gramschap tot haer, seggende,

6

Ghi sotte bouen alle vrouwen, en siet ghy niet onse droefheyt, ende die dinghen die ons ghebueren?

7

Want Syon onse moeder wort met alle droefheyt bedroeft, ende si is mits ootmoedicheit vernedert, ende si is alder sterclicste droeuich in rouwe

8

Ende nv want wi alle weenen en droeue zijn, so zijn wi alle mede bedroeft, maer ghi wort alle bedroeft om eenen sone,

9

Vraget die aerde, ende si sal v segghen, dat zijt is die soude beweenen den valle van so veelen die bouen haer spruyten,

10

Ende wt haer vant beghin, zijn si alle gheboren ende dander sullen comen, ende siet si wandelen byna alle in verdoemenis, ende haer menichte wort een verderffenis,

11

Ende wie sal dan meer weenen dan dese, die so grooten menichte verloren heeft, meer dan ghi dye om eenen droeue zijt? Maer ist dat ghi my segt

12

mijn screyinghe en is niet ghelijc der aerden, want ic heb die vrucht mijns buycs verloren, den welcken ick met smerten ghebaert heb, ende met smerten ghewonnen heb,

13

maer daerde na den wech der aerden, ende die tegenwoordige menichte is in haer wech gegaen, ghelijc si daer wt quam, Ende ic segghe v,

14

Ghelijc ghi met arbeyt baerde, also geeft daerde haer vrucht oec den mensche vant begin ter eeren, den ghenen diese gemaect heeft,

15

Aldus hout nv v smerte by v seluen, ende draecht sterckelic die gheuallen die v ghebuert zijn,

16

want ist dat ghi den tijt die v God oordineert rechtuerdicht, so sult ghi sinen raet oec inder tijt ontfaen, ende in soodanige sult ghi mede gepresen worden,

17

Hier omme gaet in dye stadt tot uwen man

Ende si seyde tot mi,

18

Ick en sals niet doen, ⁺ noch ic en sal niet in die stadt gaen, maer ick sal hier steruen,

+ B

19

Ende ic heb mi gestelt noch te spreken tot haer, ende seyde,

20

En wilt dese redenen niet doen, maer zijt gewillich den ghenen die v raet, Want hoe veel gheuallen heeft Syon Wort vertroost om Iherusalems smerte?

21

Want ghi siet dat onse heylichmakinge verwoest is, ende dat onsen outaer vernielt is, ende dat onsen tempel verdoruen is,

22

ende onsen psalter is wernedert, ende den lofsanc heeft geswegen, ende onse verblidinge is ontbonden, ende dat licht ons candelaers is wt gebluscht, ende die arcke ons testaments is gerooft, ende onse heylige dingen zijn besmet, ende den name die ouer ons aengeroepen is, is bi na geheel ontheylicht, ende ons kinderen hebben versmaetheyt

[p. Dd1v]

geleden, ende onse priesters zijn verbernt, ende onse leuiten zijn in die gheuanckenisse ghegaen, ende onse maechden zijn gescheynt, ende onse vrouwen zijn vercrachticht, ende onse rechtueerdighe zijn ontrucket, ende onse cleyne kinderkens die zijn verdaen, ende ons lieden ionghen dienden, ende onse stercke zijn onmatich gheworden,

23

Ende dat alremeeste teeken is Syon, want si is ghescheyden van hare heerlicheyt, want si is gheleuert inden handen der ghenen die ons haten,

24

Hier om schudt v grote droefenisse wt, ende legt af die menichte der smerten op dat v die stercke ghenadich si, ende die alderhoochste sal v rust maken, rustinghe des arbeyts,

25

Ende het gheschiede als ic tot haer sprack, haer aensicht blincte onuersiens, ende haer ghesichte wert een blinckende ghedaente, alsoo dat ic zeer scroemende wert tot haer, ende dat ic dachte wat ic ware,

26

ende siet, onuerhuets gaf si een groot gheluyt der stemmen wt, vol vreesen dat daerde beweghet wert van des wijfs geluyt, ende ic sach,

27

ende siet, dye vrouwe en was mi nyet meer voor ooghen, maer dye stadt wert ghetimmert, ende die plaetse wert ghethoont van grooten fundamenten, ende ic vreesde ende riep met grooter stemmen, ende seyde,

28

Waer is Vriel die Enghel die vant beghin tot mi quam? want hi dede mi comen in die menichte inden wtganc mijns moets, Ende mijn eynde is tot verganckelicheyt geworden, ende mijn ghebet tot lachter

29

Ende also ic dit sprekende was, so quam hy tot mi, ende sach mi,

30

ende siet ic was gestelt als een doode, ⁺ ende mijn verstant was verureemt, ende hi hielt mine rechter handt, ende hy stelde my op mijn voeten, Ende hy seyde my,

+ C

31

Wat is v, ende waer om is v verstandt verstoort ende den sin ws herten, ende waer om sidi verstoort? Ende ic seyde

32

om dat ghi mi verlaten hebt, ende ic dede na uwe redenen ende ghinc wt int velt, ende siet, ic sach ende ick sie dwelck ic niet vertellen en can, Ende hi seyde tot mi,

33

Staet als een man, ende ic sal v bewegen, Ende ic seyde,

34

Mijn HEERE spreect ghi in mi, en wilt mi niet verlaten, op dat ic niet te vergeefs en sterue,

35

want ic sach welc ic niet en wiste, ende ic hoorde, dat ic nyet en weet,

36

Oft en wort minen sin niet bedrogen, ende mijn siele is op haer eynde?

37

Hier om soo bid ic v nv, dat ghi uwen knecht van desen wtganc verthoont, ende hi antwoorde tot mi seggende

38

Hoort mi, ende ic sal v leeren, ende ic sal v seggen van welcken ghi vreest, want die alder hoochste heeft v veel verholentheden geopenbaert, [kolom]

39

Hi sach uwen rechten wech, want ghi waret sonder ophouden bedroeft voor v volck, ende ghy weende ouerzeer om Syon,

40

Dit is dat verstandt des ghesichts, welc v voor een weynich tijts is ghopenbaert,

41

Die ghi weenende saecht die ghi begonst te troosten,

42

maer nv en siet ghi dan die gedaente des wijfs nyet maer v heeft gheopenbaert dat dye stadt ghetimmert wort,

43

ende want si v vanden gheualle haers soons vertelde, dit is dontbindinge,

44

dat wijf die ghi saecht, dese is Syon ende want si v seyde welck ghi oec nv sien sult als een ghetymmerde stadt,

45

ende want si v seyde datse onuruchtbaer heeft geweest .xxx. iaer, waer om het .xxx. iaren waren doen in haer noch gheen offerhande en was geoffert

46

⁺Ende het is gheschiet na .xxx. iaren, timmerde Salomon die stadt, ende offerde offerhanden, doen wast dat die onuruchtbaer eenen sone baerde,

+ D

47

Ende dat si v seyde dat si hem met arbeyt op gheuoet heeft, dat was die wooninghe in Ierusalem,

48

Ende want si v seyde dat mijn sone comende in zijn slaep camer sterf ende hem eenen val gebuerde, dat was Ierusalems val die gheschiet is,

49

Ende siet ghi hebt haer ghelijckenis ghesien, ende want si den sone beweende begonst ghijse te troosten, Ende dese dinghen waren v te openen vanden ghenen die gebuert zijn,

50

Ende nv siet dye alderhoochste, want ghi wt der herten bedroeft zijt, ende want ghi wt geheelder herten voor haer lijdt, so heeft hi v verthoont dye claerheyt zijnre heerlicheyt, ende dye schoonheyt zijnre fraeyheyt,

51

Daer omme hebbe ic v gheseyt dat ghi in een velt soudt bliuen, daer gheen huys ghetimmert en is,

52

want ick wiste dat die alre hoochste v dese dinghen begonst te toonen,

53

daer om seyde ic v, dat ghi inden acker soudt comen daer gheen fundament der timmeringhen en is,

54

Want dat werc der timmeringhe eens menschen en mocht niet onthouden worden in die plaetse daer des alrehoochsten stadt begonst wort verthoont te worden,

55

Hier omme en wilt niet vreesen, noch v hert en verscricke niet, maer gaet in ende siet dat schijnsel, ende die grootheyt der timmeringhen soo veel alst v ontfanckelic is metten ghesichte der ooghen te sien,

56

ende daer nae sult ghi hooren soo veel alst tghehoor uwer ooren ontfancklick is te hooren,

57

Ghy zijt salich voor veel, ende ghy zijt byden alrehoochsten gheroepen, ghelijck oock luttele,

58

Ghy sult den nacht dye morghen toecoemende is, hier bliuen,

59

ende dye alrehoochste sal v thoonen dese ghesichten der alder o-

[p. Dd2r]

uerster die die alderhoochsten doen sal den ghenen die opter aerden woonen vanden wtersten dagen.

60

Ende ic sliep dien nacht ende den anderen, also hi my gheseyt hadde.

§ Hoe Esdras den arent ende den leeuwe inden droom sach.