De Vorsterman Bijbel

§ Dat .viij. Capittel

1

⁺ENde hi antwoorde tot mi segghende, Dese werelt, heeft die alderhoochste om vele menschen ghemaect, maer die toecomende om luttel

+ A

2

Esdra, ick sal voor v een ghelikenisse segghen, Hoe sult ghi die aerde gheuragen ende si sal v seggen want si sal veel meer aerden geuen, daer aerdewerck af sal worden gemaect, maer een cleyne stof waer af dat tgout wort, also is ooc die daet der teghenwoordigher werelt,

3

want daer zijnder zeer vele ghescapen, maer daer sal der weynich salich worden,

4

Ende ick antwoorde ende seyde, Aldus ziele zuypt den sin heel op, ende verslindet dat smaect

5

want ghi zijt mede ghecomen willende ghehoor ghe-[kolom]uen ende propheteren, want v ende is gheen ruymte ghegheuen, dan alleen te leuen,

6

O HEERE en sult ghi uwen knecht niet toelaten, dat wij omtrent v bidden, ende ons zaet ter herten gheuen, ende oeffeninge den sinne, daeraf v vrucht come, waer af leuen moghen alle ghescheynde, die des menschen plaetse sal draghen?

7

Want ghi zijt alleen, ende wi zijn een scheppinghe uwer handen ghelijc ghi ghesproken hebt,

8

Ende ghelijc dat lichaem in die moeder ghescapen is, ende gheuet leden, v scheppinghe wort in vier ende water behouden ende v schepsele lijdt neghen maenden uwe creatuere die in haer ghescapen is,

9

maer dat selue dat behout ende behouden wort, sullen beyde behouden worden, ende behouden zijnde gheuet die moeder weder tot eeniger tijt tghene dat in haer ghewassen is,

10

Want ghi hebt wt dien leden gheboden, dat is wt den borsten, der vruchten der borsten melck te gheuene

11

op dattet geuoeyt worde dat gheschapen is, eenen tijt lanc, ende dat ghijt daer nae uwer ontfermharticheyt bestelt,

12

ghi hebt hem gheuoeyt met uwer rechtueerdicheyt, ende ghi hebt hem gheleert in uwer wet, ende ghi hebt hem berispet met uwen verstande,

13

ende ghi sult hem dooden als uwe creatuere, ende ghi sult hem leuende maken als v werck

14

Aldus ist dat ghi hem te niet doet die met soo vele arbeyden ghescapen is mits uwen beuele, so ist lichtelijc gheoordineert te wordene, dat dat oock dat werc ghemaect behouden soude worden.

15

⁺Ende nv HEERE ic sal seggen, van allen mensche weet ghi meer, van uwen volcke daer ic smerte om lide,

+ B

16

ende om v erffenisse daer ic om rou draghe, ende om Israel, om welcken ic droeuich ben, ende om Iacob om welcken ick smertte lide,

17

hierom sal ic beginnen te bidden by v voor mi ende hen, want ic sie onse vallen, wi die op daerde woonen,

18

Maer ic heb die snelheyt des rechters gehoort die comen sal,

19

Hierom hoort mijn stemme, ende verstaet mine reden, ende ic sal voor v spreken.

20

Dat beghin der woorden Esdre eer hi op genomen wert ende ic seyde HEERE die in die werelt woont wiens oogen verheuen zijn in die opperste ende in de locht,

21

ende wiens throon onschattelijc is ende de heerlicheyt onbegripelic den welcken dat heyr der engelen bistaet, met beuinge,

22

der welcker behoudinghe in windt ende vier gekeert wort, wiens woordt warachtich is, ende gheheeten vrolicheyt,

23

wiens beuel starck is ende ghesteltenisse veruaerlijc wiens aen-

[p. Cc8r]

sicht die afgronden verdorret, ende verbolgentheit die bergen doet veruuylen, ende die waerheyt ghetuyget,

24

Verhoort dat ghebet ws knechts, ende verneemt metten ooren die bedinghe dijns scepsels,

25

Als ic leue sal ic spreken ende als ic smake sal ic antwoorden

26

Noch en aensiet die misdaden dijns volcs niet, maer dye v inder waerheyt dienen,

27

Noch en aennmercket der heydenen ongodlijcke neersticheden niet, maer die v getuygenissen met smerten bewaert hebben,

28

noch en aendenct niet die in v aenschouwen valschelijck ghewandelt hebben maer gedenct, die naer uwen wille die vreese bekent hebben,

29

Noch en wiltse nyet vernielen die beestelike manieren hebben ghehadt, maer aensietse dye v wet heerlijc gheleert hebben,

30

Noch en wort hen nyet verbolghen die quader dan de beesten geordeelt zijn, maer hebtse lief die altoos in dijne gherechticheyt ende eere betrouwen.

31

Want wi ende onse vaders in soodanige siet ten quelen, maer ghi sult om ons sondaers ontfermhertich geheeten worden,

32

⁺Want ist dat ghi begheert, dat ghi onser ontfermt, dan so sult ghi ontfermhertich geheeten worden, als wi gheen wercken der gherechticheyt en hebben

+ C

33

Want de rechtueerdige, dien vele wercken ghehoopt zijn, die sullen wt haer eygen wercken loon ontfaen,

34

Want wat is die mensche, dat ghi op hem verbolghet oft dat verganckelicke geslachte, dat ghi van hem so bitter zijt?

35

Want inder waerheit daer en is niemant vanden ghenen die gheboren zijn, die welcke niet ongoddelijck ghedaen en heuet, ende vanden belidenden, die niet misdaen en heeft,

36

want daer in sal uwe gerechticheyt vercondicht worden, ende v goetheyt HEERE, als ghi hen luyden ontfermt die welcke dat wesen der goeder wercken niet en hebben.

37

Ende hi antwoorde tot mi segghende, Ghi hebt sommighe dinghen te recht gesproken, ende het sal oock naer uwe redenen gheschieden,

38

Want ick niet warachtelic ghedencken en sal, op dat schepsel der ghenen die ghesondicht hebben, voor die doot, voor dat oordeele, voor die verdoemenis,

39

maer ick sal verblijt worden op der rechtueerdigher schepsel, ende ick sal ghedencken der elendicheyt, ende der salichmakinghe ende des loons der wederontfanginghe,

40

Also ic dan ghesproken heb, also ist ooc,

41

Want ghelijc die ackerman vele zaden op daerde zaeyt, ende plantet plantingen der menichfuldicheyt, maer si en worden niet alle behouden die ghezaeyt zijn, noch si en sullen [kolom] oock niet alle wortelen die gheplant zijn, also en sullen oock niet alle behouden worden die inder werelt ghezaeyt zijn.

42

Ende ic antwoorde ende seyde, Ist dat ic ghenade heb geuonden, so sal ic spreken,

43

Gelijc als dat zaet des ackermans, ist dat niet op en gaet, oft uwen regen niet en ontfanghet in tijts, oft ist dat verderft mits veelheyt des regens,

44

also vergatet, ende des gelijcs die mensche die met uwen handen ghemaect is, ende uwe beelt is hi ghenoemt, want ghi zijt hem ghelijc, om den welcken alle dingen gheschapen zijn, ⁺ ende ghi hebt hem ghelijct des ackermans zade,

+ D

45

En zijt op ons niet gram, maer spaert v volc, ende ontfermt uwer erffenisse maer ontfermt ghi uwer creatueren,

46

Ende hi antwoorde tot mi seggende, Die tegenwoordighe behooren den tegenwoordigen, ende die toecomende, den toecomenden,

47

Want v is noch veel ouer, dat ghi mijn creatuere bouen mi mocht lie hebben, ic heb v ende hen dicwils ghenaket, maer den onrechtueerdighen nimmermeer,

48

Maer daer inne zijt ghi ooc wonderlijc voor den alderhoochsten,

49

want ghi hebt v verootmoedicht alsoot betaemt, ende ghi en hebt v niet geoordeelt dat ghi onder de rechtueerdige zeer heerlijc gemaect sout worden,

50

Waerom hen veel kattiuicheden ende volle armoeden, sullen hen worden gemaect, die die werelt bewoonen inde laetste tijden, want si in groote hoouerdicheit gewandelt hebben

51

maer verstaet ghi voor v ende van uwen geliken versoect heerlicheyt,

52

want dat paradijs is voor v luyden open, den boom des leuens is geplant den toecomenden tijd is bereyt, die oueruloedicheyt is bereyt, die stadt is ghetimmert, die ruste is bewesen, die grootheyt is volmaect, ende de wijsheyt is volmaect,

53

Die wortele der quaetheit is van v geteekent, crancheit ende de motte is van v verborgen, ende de verderfenis is in die helle geulucht in verghetinghe,

54

Die smerten zijn doorgegaen, ende den scat der onsterffelicheyt is int eynde ghetoont,

55

Hier om en wilter niet meer toedoen te ondersoecken vander menichte der ghenen die vergaen,

56

want si ooc ontfangende die vryheyt, hebben si den alderhoochsten versmaet ende si hebben zijn wet veracht, ende si hebben zijn wegen verlaten,

57

maer si hebben noch, zijn rechtueerdige ooc vertreden,

58

ende si seyden in haer herte datter geen god en was, ende nochtans weten dat si steruen,

59

want gelijc v sullen beuaen de dingen die geseyt zijn, also sullen hen beuaen dorst ende pijninghe die bereyt zijn want hi en wilde niet, dat de mensce verloren

[p. Cc8v]

worde

60

Maer si ooc die gescapen zijn hebben sinen naem besmet, diese ghescapen heeft, ende zijn hem ondancbaer geweest, die hen dat leuen heeft bereyt,

61

Waerom mijn oordeel nv naket,

62

welke ic niet allen maer v ende weinigen ws geliken hebbe vertoont, Ende ic antwoorde ende seyde

63

Siet, HEERE nv hebt ghi mi ghetoont die menichte der teekenen die ghi inden laesten sult beginnen te doen, maer ghi en hebt mi niet vertoont, in welcken tijt.

§ Hoe Esdras den enghele vraechde waerom datter meer verdoemt worden, dan salich