De Vorsterman Bijbel

[kolom]

§ Hier begint dat derde boec Esdre.

§ Hoe Iosias Paesschen houdt binnen Ierusalem, ende daer na die coninck van Egipten teghen hem streedt, ende hoe die coninck van Babilonien Ierusalem verstoorde ende die heylighe vaten wech nam.

§ Dat .I. Capittel.

1

⁺ENde Iosias vierde den HERE een hoochtijt van paesschen te Ierusalem, ⁺ ende offerde tpaeschlam, in die veertienste mane der eerster maent,

+ A

+ § Dese .ii. laetste boeken Esdre en zijn niet int he. noch onder den Regule.

2

stellende die priesters bi gebuerten der dagen, met priester cleederes ghecleedt, in den Tempel des HEEREN, ⁺

+ iiij.Regum. xxxiij.e ij.Paralip xxxv.a.

3

ende seyde den Leuiten den gheheylichden knechten Israels, dat si hen den HEERE souden heylighen, in die settinghe der heyligher Arcken des HEEREN int huys dat Salomon Dauids sone die coninck timmerde,

4

Ghi en sultse niet op uwe schouderen draghen. Ende nv dient uwen HEERE, ende draecht sorghe voor zijn volc Israel wt den deele naer uwe dorp, ende uwe geslachten

5

naer die scriftuere Dauids des conincs Israel, ende naer die heerlike mildicheyt Salomons zijns soons alle inden tempel, ende naer uwe vaderlike deelen der heerschappien, der ghenen die int aenschouwen der broederen der kinderen van Israel staen,

6

Offert tpaeschlam, ende bereyt uwen broederen offerhanden, ende doet naer dat ghebot des HEEREN dwelcke Moysi gegheuen is,

7

Ende Iosias ghaf int volck, dat beuonden is der schapen lammeren, ende bocken, ende gheyten, dertich duysent, ende drie duysent kalueren.

8

⁺Dese zijn vanden conincliken goeden gegeuen, den volcke nae die belofte ende den Priesteren, totten hoochtijt van paesschen, twee duysent schapen int ghetal, ende hondert calueren,

+ B

9

Ende Iechonias ende Semeias ende Nathanael ghebroeders, ende Sabias, ende Ochiel, ende Ioram, offerden totten hoochtide van paesschen, vijf duysent schapen, ende vijf hondert kalueren,

10

Ende als dese dinghen heerlijcken gheschieden, soo stonden die priesters ende Leuiten, ongheheeft broot hebbende bi gheslachten,

11

Ende naer die deelen der prinschap der vaders int aenschouwen des volx offerden si den HEERE naer tghene dat in Moyses boeck gheschreuen is,

12

ende si brieden tpaeslam met viere, alsoot behoorde, ende si coocten die offerhanden in koperen potten ende in andere potten met goetwillicheyt,

13

ende brochtense, allen den ghenen die wt den volck waren, ende daer na bereyden si voor henseluen, ende den priesters,

14

Want die priesters offerden rueck, tot dat die vre gheeyndet was, Ende die Leuiten bereyden hen en-

[p. Bb3v]

de haeren broederen den kinderen Aarons

15

Ende die heylighe sanghers die kinderen Asaph waren staende bi behoorten naer Dauids ghebot. Ende Asaph ende Zacharias ende Ieddinus die naest den coninc was,

16

ende die duerwachters bi elcke duere, alsoo dat een yeghelijck die sine niet ouer en tradt, want haer broeders bereydent hen,

17

Ende alle die dinghen die tot des HEEREN offerhande behoorden zijn voleynt.

18

In dien daghe hielden si dat hoochtijt van paeschen, ⁺ ende offerden offerhanden ouer des HEEREN spijsoffer, naer tgebot des conincs Iosie,

+ C

19

Ende die kinderen van Israel die in dien tijde gheuonden zijn, hielden thoochtijt van paeschen, ende den hoochtijdeliken dach der ongeheefder brooden seuen dagen,

20

Ende daer en is alsulcken paesdach niet geuonden in Israel, van des propheten Samuels tijden aen,

21

ende alle die coningen van Israel en hielden alsulcken scoonen feeste van paescen niet, als Iosias hielt ende die priesters ende die Leuiten, ende die Ioden, ende alle Israel, die in die wooninghe te Ierusalem geuonden zijn,

22

Int achtienste iaer, als Iosias regneerde, is dat paeschen gehouden,

23

Ende die wercken Iosie zijn wel voortgegaen int aenschouwen zijns HEEREN in een volle ontsiende herte

24

ende die bi hem geschreuen zijn in voorleden tijden, van hen die gesondicht hebben, die ongheestelijck hebben geweest, teghen den HEERE, bouen alle volck, ende die die woorden des HEEREN ouer Israel niet ghesocht en hebben,

25

Ende na alle dese daet Iosie, so ghinck Pharao die coninck van Egypten op, ⁺ comende in Charchamis vanden weghe Euphraten, ende Iosias ghinck wt hem te ghemoete,

+ iiij.Regum. xxiij.f. ij.paralip. xxxv.c.

26

Ende die coninck van Egypten sandt tot Iosiam, segghende, Wat heb ick met v te doen, coninc van Iuda?

27

Ick en ben vanden HEERE niet ghesonden, dat ick tegen v vechten soude, want mijn oorloge is ouer Euphraten, Gaet haestende neder.

28

⁺Ende Iosias en is niet weder ghekeert opten waghen, maer hi pijnde hem beuechtende te verwinnen, niet aenmerckende des propheten woort wt den mont des HEREN

+ D

29

maer hi stelde den strijt tot hem in dat velt Magedo, Ende die princen quamen af tot den coninck Iosiam,

30

Ende die coninc seyde sinen knapen, Doet mi wech vanden strijt want ic ben alte cranc, Ende zijn knapen deden hem ter stont wech vander bataelgien,

31

ende hi clam op sinen tweesten waghen, ende [kolom] als hi te Ierusalem quam, soo sterf hi, ende hi wert in zijn vaderlick graf begrauen,

32

Ende si beweenden Iosiam, in alle dat ioetsche lant, ende die ouerste met haeren huysfrouwen beclaechden hem tot op desen dach, Ende tis ghegheuen, dattet soude gheschieden altoos in al tgeslachte van Israel,

33

Maer dese dinghen zijn voorgheschreuen in dat boeck der hestorien der coninghen van Iuda, ende alle dat bedrijf Iosie, ende zijn heerlicheyt, ende zijn verstant in des HEEREN wet, ende die welcke van gesciet zijn, ende die niet en zijn gheschren int boeck der coninghen van Israel ende van Iuda.

34

Ende die wt den volck waren, namen tot hen Ieconiam, ⁺ den sone Iosie, ende stelden hem coninck voor Iosia sinen vader, als hi driendertich iaer out was,

+ E

35

Ende hi regneerde drie maenden ouer Israel, Ende die coninc van Egipten dede hem wech, dat hi in Ierusalem niet regneren en soude,

36

ende hi schatte dat volck, op hondert ponden siluers, ende een pont gouts,

37

Ende die coninc van Egipten maecte sinen broeder coninc van Iuda ende Ierusalem,

38

ende hi bandt die wethouders Ioachim ende Zaracelem sinen broeder, ende hi ghreepse ende leydese weder in Egypten,

39

Ioachim was vijf ende twintich iaren out, doen hi begonst te regneren int ioetsche lant ende Ierusalem, ende hi dede quaet int aenschouwen des HEEREN.

40

Na desen ghinck Nabuchodonosor op, ⁺ ende bandt hem met eenen metalen bant, ende brocht hem tot Babilonien.

+ F

41

Ende Nabuchodonosor nam die heylige vaten des HEREN ende hi namse ende hi heylichdese in sinen tempel in Babilonien.

42

Van zijn onreynicheyt ende ongheestelicheyt is geschreuen int boeck der tijden der coningen,

43

Ende Ioachim zijn sone regneerde voor hem, Ende als hi coninck ghestelt was, was hi .xviij. iaer out

44

Hi regeerde .iij. maenden, ende .x. dagen in Ierusalem, ende hi dede quaet in des HEREN aenscouwen,

45

ende na een iaer sandt Nabuchodonosor, ende voerde hem ouer in Babilonien te gader metten heyligen vaten des HEEREN,

46

Ende hi stelde Sedechiam coninc des Ioedtschen lants ende Ierusalem, als hi .xxi iaer out was, Ende hi regneerde elf iaer,

47

Ende hi dede quaet int aenscouwen des HEEREN, ende hi en ontsach hem niet vanden woorden die van Ieremia den propheet geseyt zijn, wten monde des HEREN,

48

Ende ten eede gedwongen vanden coninc nabuchodonosor meyneedelic swerende, is hi wech gegaen

[p. Bb4r]

ende sinen neck ende zijn hert verhert zijnde trat hi ouer die wetlicheden des HEEREN Gods Israels,

49

Ende die leytsluyden des volcs deden veel dinghen onrechtuaerdelijck, ende deden ongodlijck, bouen alle die onreynicheyt der heydenen, ende besmetteden des HEREN tempel die heylich was in Ierusalem.

50

⁺Ende die God haerder vaderen sant door sinen Engel, om die weder te roepen, ende om welcke hijse sparen soude, ende zijn tabernacule

+ G

51

Maer si schimpteden op zijn Engelen, ende in den daghe, in welcke die HERE ghesproken heeft, waren si bespottende zijn Propheten.

52

Die welcke tot gramschapen toe verwect is ouer zijn volck, om haer ongodlicheyt. Ende hi gheboot der Chaldeen Coningen op te gaen,

53

Dese dooden haer ionghen met den swaerde, inden omghanck haers heylighen tempels, ende si en spaerden den ionghen ende den ouden niet, noch der maghet, noch den ionghelinck,

54

maer si zijn al geleuert in haer handen, ende alle die heylighe vaten des HEREN, ende die coninclijcke tresoren nemende voerden sijse in Babylonien,

55

ende staken des HEEREN huys aen, ende bedoruen die mueren van Ierusalem, ende si staken haer torrens met vyere,

56

ende si verdeden alle haer eerlicheden, ende dedense te nyet, ende die ouer waren bleuen vanden swaerde, leydense in Babylonien,

57

Ende het waren zijn knechten, so langhe dat die van Persen regneerde, in die veruulinghe des woorts des HEREN inden mont Ieremie,

58

so langhe als dat lant sine vyerdaghen goedertierlijck hielt in alder tijt haerder verwoestheyt, so hielt hi den vyerdach in die tsamen voeginghe der .lxxvij. iaren

§ Hoe Cyrus die coninck van Persen die heylighe vaten die die coninck van Babylonien ghenomen hadde van Ierusalem, offerde sinen afgoden. Ende hoe veel datter waren, ende hoe hi verboot den tempel weder op te maken.