De Vorsterman Bijbel

§ Dat .vij. Capit.

1

⁺NAe dese geschiedenisse int conincrijcke Artharxerxis des conincs van Persen, troc op van Babel, Esdras die sone Saraia, die sone Asaria, die sone Helcia,

+ A

2

die sone Selum, die sone Zadoch, die sone Achitob,

3

die sone Amaria, dye sone Asaria, die sone Maraioth,

4

die sone Sarahia, dye sone Osi, dye sone Bocci,

5

die sone Abisue, de sone Phineeas, die sone Eleazar, die sone Aaron, des ouerste priesters,

6

welcke een bequaem scrift geleerde in die wet Moysi was, dat dye HEERE die God Israel gegeuen hadde, Ende die coninc gaft hem al wat hi eyschte, na die hant des HEEREN zijns Gods ouer hem.

7

⁺Ende het trocken op sommige der kinderen Israel, ende der priesteren ende der leuiten, der sangers, der portiers, ende der Nathinneen tot Ierusalem, int seuenste iaer Artharxerxis des conincs,

+ B

8

Ende si quamen te Ierusalem inder vijfster maent, dat is dat seuenste iaer des

[p. Aa3v]

conincs,

9

want inden eersten dach der eerster maent began hy op te trecken van Babel, ende inden eersten dage der vijfster maent quam hy te Ierusalem, na der goeder hant Gods ouer hem,

10

Want Esdras had bereyt zijn herte te soeckene die wet des HEEREN ende te doen ende leeren in Israel zeden ende recht oordeel.

11

Ende dit is dat inhout des briefs dien die coninc Artharxexes gaf Esdre den priester, den scriftgeleerden die een leeraer was inden woorden des HEEREN, ende zijnder zeden ouer Israel,

12

Arthaxerxes coninc alre coningen, Esdre den priester ende scriftgeleerde inder wet, des Gods vanden hemel, ⁺ vrede ende gruete,

+ C

13

Van mi ist geordineert dat alle die dat behaget in minen rijcke vanden volc Israel, ende der priesteren ende der leuiten te Iherusalem te trecken, dat die met v trecken,

14

want ghi vanden Coninc, ende vanden seuen zijn raetsheeren gheseynt zijt te bosecken Iuda ende Ierusalem, na die wedt Gods die in uwe hant is,

15

ende dat ghi mede draget siluer ende gout, dwelc die coninc ende raetslieden vriwillichliken wt hen seluen gheoffert hebben den God van Israel, wiens tabernakel in Iherusalem is,

16

ende al tsiluer ende gout dat ghi geuinden cont int geheele lantscap Babel, met dien dat dat volc ende die priesters vriwillich wt hen seluen geuen totten huyse huers Gods te Ierusalem,

17

Alle dat selue neemt vrylic ende coopet met neerste vanden seluen gelde, calueren rammen, ende lammeren, ende spijsoffer, ende dancoffer, ende offert dye opten outaer des tempels ws Gods te Ierusalem,

18

Daer toe wat v ende uwen broeders met den ouerschotenen gelde belieft te doene, dat doet, naden wille ws Gods,

19

ende die vaten die v gegeuen zijn totten diensten inden huysen ws Gods, leuert ouer voor Gods aensichte te Ierusalem.

20

Ooc wat meer van noode zijn sal totten huyse ws Gods ooc hoe veel dattet van noode is dat ghi hebt wt te geuen, dat suldy geuen wt die scat camer ende geltkiste des conincs ende van mi,

21

Ic coninc Arthaxerxes heb dyt beuolen den schatmeesteren ouer geen side des waters, dat so wat Esdras van v eyschen sal, die priester ende scrift geleerde inder wet Godts vanden hemel, dat ghi dat neerstelic doet, sonder toeuen,

22

tot .c. pont siluers toe, ende tot .c. Coros tarwen toe, ende tot .c. Bat wijns, ende tot .c. Bat olijs, ende souts sonder mate,

23

⁺Al wat totter wet Gods vanden hemel behoort, salmen dat selue neerstelic doen, totten huyse Gods vanden hemel, op dat gheen gramschap en come ouer des conincs rijcke ende sine kinderen.

+ D

24

Ende v si cont dat ghi gheen macht en hebt [kolom] tzijns, tol, ende iaerlicse renten te leggen op eenighen priester Leuite, Sanger, Portier, Nathinneem, en dienaren des huys Gods,

25

Maer ghi Esdra na der wijsheyt ws Gods die onder uwe hant is, stelt rechters ende presidenten, die allet volc oordeelen, dat ouer gene side des waters is, ende alle die die wet ws Gods weten, ende die het niet en weten, dien leeret vrilic

26

Ende alle die niet met neersticheit die wet ws Gods, ende die wet des conincs doen en sal, die sal zijn oordeel om dyer daet wille hebben, het si totter doot, oft in dye verbanninghe, oft ter boeten aen goet, oft in die gheuangenisse, Ende Esdras dye scrift geleerde seyde.

27

Gebenedijt si die HEERE onser vaderen Godt, die dat den coninc in heeft gegeuen, dat hi dat huys Godts te Ierusalem soude vercieren,

28

Ende heeft tot mi ontfermherticheyt geneycht voor den coninc, ende sinen raetheren ende alle princen ende machtigen des conincs. Ende ic wert getroost nader hant des HEREE mijns Gods, die in mi was, ende ic vergaderde die princen van Israel die met mi op geclommen zijn

§ Hoe tvolc met Esdra na Ierusalem reyst