De Vorsterman Bijbel

§ Dat .vi. Capittel.

[p. Aa3r]

1

⁺DOen beual die coninc Darius, ende men sochte in die camer der boecken, die te voren was in Babilonien

+ A

2

doen vantmen in Egbathanis slot, dat in Meden leget, een boeck, ende daer stont also in een gedenckenisse gescreuen,

3

Int eerste iaer des conincs Cyri, beual die coninc Cyrus dat huys Gods te Iherusalem te timmeren in die plaetse daermen offert offerande, ende dat fundament leggen, dragende dye hoochte tsestich ellen, ende ter breetheyt ooc tsestich ellen,

4

ende drie van ongeeffenden steenen, ende so ordenen van nieuwen houten, ende den cost sal vanden huyse des conincs gegeuen worden,

5

Daer toe die gulden ende silueren vaten des huys Gods, die Nabuchodonosor wt den tempel te Ierusalem ghenomen, ende tot Babel gebrocht hadde, laet weder geuen, dat weder gebrocht worde inden tempel te Ierusalem op haer plaetse inden tempel Gods

6

⁺Dus maect v nv verre van hen ghi Thathanai president dees side des waters, ende Sthar Busanai, ende haeren raet van Apharsach ghi die aen gene side des waters zijt

+ B

7

Laetse arbeyden aen den huyse Gods, dat der ioden president ende huer ouders dat huys Gods timmeren op zijn stede,

8

Oock ist van mi beuolen, watmen den ouders van Iuda doen sal, om te timmeren dat huys Gods, te weten, datmen wt des conincs goeden vanden renten aen gheen side des waters met neersticheit opheffe, ende geeftse den lieden datmen hen niet en belette

9

⁺Ende oft si behoeuen calueren lammeren of ionge boecxkens totten brantoffer den Gode vanden hemel, taruwe, soute, wijn, ende olie nader costumen des priesters te Ierusalem salmen hen dagelicx geuen sine behoorte, om dat gheen clachte en geschiede in eenige dingen,

+ C

10

ende dat si mogen offeren offeranden den Godt vanden hemel, ende bidden voor des conincs leuen, ende zijnder kinderen,

11

Van mi is sulcken beuel gesciet, Ende welc mensche dese geboden verandert van dies huis salmen eenen balck nemen, ende oprechten ende hem daer aenhangen, ende zijn huys sal vercocht worden om dier daet wille.

12

Ende God die sinen naem daer heeft doen woonen doe te niet ende bederue alle conincrike ende tvolc dat sine hant wt steect om te rebelleren, ende te breken dat huse Gods in Iherusalem, Ic Darius heb dit beuolen, dattet met neersticheit gedaen worde.

13

Doen deden met neerste Thathanai die president aen gene side des waters ende Star Busanai met haren raet na dat hen die coninc Darius beuolen hadde,

14

Ende dye ouders der Ioden timmerden, ende het gelucte door die prophecie des propheten Aggei ende Sacharie des soons [kolom] Addo, ende timmerdent, ende rechtent op nae dat beuel des Gods Israel, ⁺ ende na dbeuel Cyrij, Darij, Artharxexzes, der coningen van Persen,

+ D

15

Ende volbrachten dat huys tot aenden derden dach der maent Adar, dat was dat seste iaer des conincrijcs des conincs Darij.

16

Ende die kinderen Israel die priesters, die leuiten, ende die ander kinderen der geuangenissen hielden in wijdinge des huys Gods met bliscapen,

17

ende offerden op die wijdinghe des huys Godts .c. caluers .cc. rammen .cccc. lammeren, ende voor die sonde van geheel Israel .xij. bocken na dat getal der stammen Israel,

18

ende stelden die priesters in huer ordine, ende die leuiten in huer behoorte ouer die wercken Gods in Ierusalem, soot ghescreuen staet in Moysi

19

Ende die kinderen van Israel die weder comen waren in die ouerreysinge van Babilonien hebben hehouden thoochtijt van paesschen inden xij. dage der eerster maent,

20

Want die priesters ende Leuiten hadden hen gereynicht, dat si alle reyn waren, als een man, om te offeren dat paeschlam voor alle die kinderen der geuangenissen ende voor huer broeders die priesteren, ende voor hen seluen,

21

Ende die kinderen Israel die wt tgeuangenisse waren weder gecomen, ende al die hen afgesceyden hadden vander onreynicheit der heyden des lants, om den HEERE Godt Israel te soecken aten

22

ende hielden de feeste der ongedesemder brooden seuen dagen met bliscapen Want die HEERE hadse vrolic gemaect, ende dat herte des conincs te Assur, tot hen waerts gekeert, dat hi huer handen helpen soude int werck aent huys Gods, die Godt Israel is.

§ Hoe Esdras na Iherusalem reyst.