De Vorsterman Bijbel

§ Dat .xxvij. Capit.

1

⁺IOathan was vijfentwintich iaer out, doen hi coninc wert, ⁺ ende regeerde sestien iaer te Ierusalem, Sine moeder hiet Ierusa Zadoch dochter,

+ A

+ iiij.re. xvi.

2

ende dede dat den HERE wel behaechde, gelijc ^* Ozias) zijn vader gedaen hadde, sonder dat hi niet inden tempel des HEEREN en ghinc, ende dat het volck sondichde noch,

* theb. Vsia

3

Hi timmerde de hooge poorte aen dat huys des HEEREN, ende aenden muere Ophel, timmerde hi vele,

4

Ende timmerde die steden op dat geberchte van Iuda, ende inden wouden timmerde hi sloten ende thorrens.

5

Ende hi streedt tegen den coninc der kinderen van Ammon, ⁺ ende hi verwan hen also dat hem die kinderen van Ammon op dat selue iaer ghauen hondert ponden siluers, thien duysent Choor tarwen, ende thien duysent ghersten, Also vele gauen hem die kinderen van Ammon, ooc inden tweeden ende inden derden iaer.

+ B

6

Also wert Ioathan machtich, want hi rechte sine wegen voor den HEERE sinen Godt.

7

Wat meer van Ioathan te seggen is, ende alle sine striden, ende sine weghen, siet, dat is gescreuen inden boec der coninghen van Israel ende van Iuda.

8

⁺Hi was .xxv. iaer out, doen hy coninc wert, ende regeerde sestien iaer te Ierusalem.

+ C

9

Ende Ioathan ontsliep met sinen vaderen, ende si begroeuen hem in Dauids stadt ende sine sone Achas wert coninc in zijn stede ende regeerde voor hem.

§ Hoe Achas die coninck van Iuda regeerde, ende van sinen sonden, wat hem die coninck van Israel Romelie sone dede, Van Obed den propheet wat hi propheteerde.