De Vorsterman Bijbel

§ Dat .xxi. Capittel.

1

⁺ENde Iosaphat ontsliep met sinen vaderen ende wert begrauen bi zijn vaders in Dauids stat. Ende zijn sone Ioram wert Coninc in zijn stede.

+ A

2

Ende hi hadde broeders Iosaphaths sonen, Asariam, Iahiel, Sachariam, Michael Hariam, Saphatiam, dese waren alle Iosaphats des Conincs van Iuda kinderen.

3

Ende haer vader gaf hen vele gauen van siluer, gout, ende cleynodien met vasten stercke steden in Iuda. Maer dat conincrijc gaf hi Ioram, want die was die eerste geboren.

4

Ende Ioram stont op ouer dat conincrijc zijns vaders, ende doen hy hem seluen gheuesticht hadde, doode hi zijn broeders alle metten swaerde, Daer toe ooc sommige vanden ouersten princen van Israel.

5

Ioram was twee ende dertich iaer oudt, doen hi coninck wert, ende regeerde acht iaer te Ierusalem, ⁺

+ iiij.re. viij.c

6

ende wandelde in dye wegen der coningen van Israel, gelijc Achabs huys ghedaen hadde. Want Achabs dochter was zijn wijf, ende dede quaet dat den HERE mishaechde.

7

Maer die HERE en woude Dauids huys niet verderuen om des verbonts wille ⁺ dat hi met Dauid gemaect hadde, ende so hi ghelouet hadde, hem een keersse te geuen ende sinen kinderen inder eewicheyt.

+ B

8

Tot zijnder tijt vielen die Edomiten af, ende wederstonden, om dat si onder Iuda niet staen en souden, ende maecten ouer hen eenen Coninc.

9

Ende als Ioram was door ghetrocken met sinen vorsten, ende alle dat rosuolc met hem, ende so stont hi des nachts op, ende heeft die Edomi-[kolom]ten gheslagen, die hem omringt hadden, ende alle die leytsmannen der wagenen,

10

Nochtans vielen die Edomiten al van Iuda, tot op desen dach. Ter seluer tijt viel Lobna ooc van hem af, dat si onder zijn handt niet zijn en souden, Want hi verliet den HERE zijnder vaders God.

11

Ooc maecte hi hoochten op die bergen van Iuda, Ende dede die van Ierusalem hoererie bedriuen, ende verleyde Iuda, om ouer te tredene.

12

Maer tot hem werden brieuen gebrocht vanden prophete Helia, daer in ghescreuen stont. ⁺ So spreect die HERE die God ws vaders Dauids. Om dat ghy niet ghewandelt en hebt in Iosaphats ws vaders wech, noch inden wech Asa des Conincs van Iuda,

+ C

13

maer wandelt inden wech der Coninghen van Israel, ende doet dat Iuda ende die te Ierusalem afgoderie bedriuen, nauolghende die hoererie van Achabs huys. Ende hebt daer toe uwe broeders ws vaders huys ghedoot, die welcke beter waren dan ghi.

14

Siet, so sal v die HERE met eender groter plagen slaen met uwen volcke, met uwe kinderen, met uwe wiuen ende met alle uwen goeden,

15

Maer ghy sult vele crancheden hebben, van een seer quade cranchede des buycs suldy sieck zijn, tot dat v inghewant van crancheit wt ghae, van daghe tot daghe.

16

⁺Aldus verwecte die HEERE tegen Ioram den geest der Philistinen der Arabers die neffens die Mooren ligghen,

+ D

17

ende trocken op int lant van Iuda, ende verdoruent, ende si roofden ende voerden al die haue wech, die voorhanden geuonden was in des Conincs huys. Daer toe zijn sonen ende zijn wiuen, also dat hem geen sone ouer en bleef, dan Ioachab zijn ioncste sone.

18

Ende nadat al, so plaechde hem die HEERE in zijn ingewant met sulcker crancheit inden buyc, die niet te ghenesen en was,.

19

Ende doen den eenen dach na den anderen volchde, ende dat ouerlijden des tijts omliep, so is veruult den loop van twee iaren, ende hi is verteert met een lange verdwininge, so dat hi zijn inghewant van achter wt dronge. Ende hi sterf in zijn boose crancheden.

Ende dat volck en maecte gheenen brant ouer hem, soot sinen vaderen ghedaen hadden.

20

Hi was twee ende dertich iaer oudt, doen hi coninc wert, ende regeerde acht iaer te Ierusalem, Ende wandelde dat niet recht en was, ende si begroeuen hem in Dauids stat, maer nyet inder coninghen grauen.

§ Hoe Ochosie regeerde, ende hoe hi ende Ioram coninc van Israel van Hieu gedoot zijn.