De Vorsterman Bijbel

§ Dat .vij. Capittel.

1

⁺ENde doen Salomon zijn ghebet voleynt hadde, soo viel een vier vanden hemel ende verslinde den brantoffer, ende den anderen offer, Ende dye heerlicheyt des HEEREN veruulde dat huys.

+ A

3

Ooc saghen alle die kinderen van Israhel dat vier af vallen, ende die heerlicheyt des HEEREN ouer dat huys, ende vielen op haer knien, metten aensichte ter aerden, opt plaueytsel, ende aenbaden, ende dancten den HEERE, dat hi ghoet is, ende dat sine ontfermherticheyt eewelic duert.

4

⁺Maer die coninc ende allet volc offerden voor den HEERE offerhanden,

+ B

5

Want die coninc Salomon offerde tweentwintich duysent runderen, ende hondert ende twintich duysent ^* rammen) ende wijden alsoo dat huys Godts, beyde te samen, die coninc ende alle dat volc.

* the. scapen.

6

Maer die priesters stonden in haer diensten, ende die leuiten met die orgelen der liedekens van die muysijc spelen des HEEREN, die die coninc Dauid hadde laten maken om den HEERE te dancken ^* want hy goet is, ende) dat sine groote ontfermherticheyt eewelijc duert ^* singende hymnen, ende psalmen Dauids) door haere hant. Ende die priesters bliesen met trompetten voor hen, ende gheheele Israel stont.

* Ten is niet int heb

* th. met Dauids psalmen

7

Ende Salomon heylichde den middelste voorhof, die voor den huyse des HEREN was, Want hi hadde aldaer brantoffer, ende vet der vreedsame offeren geoffert, ⁺ Want den metalen altaer die Salomon hadde laten maken, en conste den brantoffer spijsoffere, ende dat vet niet gheuaten.

+ C

8

Ende Salomon hielt in die selue tijt een feeste seuen dagen lanc, ende geheel Israel met hem, een seer ontallike groote menichte, vanden inghanc van Hemath aen, totter beken van Egipten toe,

9

ende hielt opten achtsten dach een vergaderinghe, Want die wijdinge des altaers hielt hi seuen daghen, ende die feeste vierde hi ooc seuen daghen,

10

Maer inden drientwintichsten daghe der seuenster maent, liet hi dat volc vrolic ende goets moets in haeren wooninghen ghaen, van alle den goede dat die HERE Dauid ende Salomon [kolom] ende alle zijn volc van Israel gedaen hadden,

11

Also voleynde Salomon dat huis des HEREN, ende thuys des conincs, ende alle dat in zijnder herten gecomen was te maken inden huyse des HEREN, ende in sinen huyse, ende hi heeft voorspoet ghehadt.

12

⁺Ende die HERE openbaerde Salomon snachts, ende sprac tot hem, Ic hebbe v gebet verhoort, ⁺ ende mi dese plaetse vercoren tot eenen offerhuyse,

+ D

+ iij.reg. xvij. ende .xvi

13

Ist dat ick den hemel toe sluyte, dattet nyet en reghent, oft heete die sprinchanen dat lant verslinden, oft late een pestilencie ouer mijn volck comen, ^*

* thebr. dat si mijn volck verootmoedighen, dat nae mijnen naem genaemt is

14

ende mijn volck hem bekeere, daer minen name ouer aengeroepen is) ende si bidden, ende si mijn aensichte soecken, ende si hen van haeren quaden zeden bekeeren, soo sal ick vanden hemel hooren, ende haer sonden vergheuen, ende haer lant genesen,

15

Ende nv so sullen mijn oogen open zijn, ende mijn ooren toe luysteren totten gebede van hem die bidden sal in dese plaetse,

16

Aldus hebbe ic nv dit huys vercoren, ende geheylicht, dat minen naem daer eewelijck zijn soude, ende mine oogen, ende mijn herte daer altoos bliuen soude.

17

⁺Ende ist dat ghi voor mi wandelt, gelijck v vader Dauid gewandelt heeft, ende dat ghi doet na al dat ick v heete, ende hout mine zeden ende rechten,

+ E

18

so sal ic den stoel ws conincrijcs beuestigen, alsoo ic gheloeft hebbe dynen vader Dauid, ende gheseyt. Daer en sal v niet ghebreken van uwen gheslachte eenen man die ouer Israhel heere si,

19

Maer keert ghi v af, ende mijn geboden ende zeden die ic v voor geleyt hebbe, verlaet, ende wech gaet, ende ander goden dient, ende die aenbedet,

20

soo sal ic v luyden wt wortelen wt minen lande, dat ic v luiden gegheuen heb, ende dit huys dat ic minen name getimmert heb, sal ic van minen aensichte worpen, ende tsal tot een gemeyn segwoort worden, ende tot eender fabulen onder allen volcken,

21

Ende voor dit huis, dattet hoochste gheworden is, sullen hen ontsetten, alle dye daer voorby ghaen, ende segghen, Waerom heeft die HEERE desen lande ende desen huyse also gedaen?

22

So salmen seggen, ende antwoorden, Daerom dat si den HERE haerder vaderen God verlaten hebben, diese wt den lande van Egypten gheleyt heeft, ende hebben hen aen andere goden gehangen, ende die aengebedet, ende hen gedient, daerom is alle dit quaet ongheluc ouer hen gecomen

§ Van die steden die welcke Salomon timmerde, Van Salomons timmeringhe ende van sinen schepen