De Vorsterman Bijbel

§ Dat .xxiij Capittel

1

⁺HIerom Dauid oudt zijnde, ende vol dagen, settede hi Salomon sinen sone coninc ouer Israel,

+ A

2

Ende vergaderde alle dye ouerste princen van Israel, ende die priesters, ende die Leuiten,

3

Ende die Leuiten zijn ghetelt van twintich iaren ende daer ouer, ende haer ^* ghetal) is gheuonden achtendertich duysent mannen,

* the. ghetal van hoofde tot hoofde starcke mannen.

4

Wt den welcken werden wt ghecoren vier ende twintich duysent ende zijn ghedeylt totten dienste van den huise des HEREN, ende ses duysent officiers, ende rechters,

5

ende vier duysent doorwachters, ende vier duysent lof sangers des HEREN, met orghelen, snaren, ende muysijc spelen, die ^* hi gemaect heeft) om lof te singen.

* the. ic ghemaect heb.

6

Ende Dauid maecte die oordinancie bi gebuerten onder Leui kinderen, ⁺ te wetene, onder Gerson, Cahath, ende Merari,

+ B

7

Dye Gersoniten waren Laadan ende Semei,

8

Laadan kinderen, dye princen Iehiel, ende Sethan, ende Ioel, die drie.

9

Semei kinderen waren, Salomith ende Hasiel, ende Aran die drie, dese waren dye vorsten der huysghesinnen der vaderen van Laadan,

10

Ooc waren dese Semei kinderen Iahath, Siza, Iaus, ende Baria, dese vier waren ooc Semei kinderen,

11

maer Iahath was deerste, Siza die twede, Maer Iaus ende Baria en hadden niet vele kinderen, daerom werden si voor een huysghesinne, ende huys gherekent.

12

Cahath kinderen waren Amram, Izahar Hebron ende Vsiel dye viere,

13

⁺Amram kinderen waren Aaron ende Moyses, ⁺ Maer Aaron wert afghescheyden, dat hi dienen soude [kolom] in die alderheylichste plaetse, hy ende sine sonen eewelijck te ontsteken wierooc ende branden ruecwerc na zijnre maniere voor den HERE, ende te dienen, ende te gebenedien ^* den) name des HEREN eewelijc,

+ C

+ Exodi. vi.a

* the. in den:

14

Ende Moises des mans Godts kinderen werden ghenoemt onder der leuiten gheslachte,

15

Moyses kinderen waren Gerson ende Elieser.

16

Gersons kinderen, die eerste was Subuhel.

17

Eliezers kinderen, Rohabia was die eerste, Ende Elieser en hadde gheen ander kinderen, Maer der kinderen Rohabia waren vele daer ouer

18

Iahar kinderen waren, ⁺ Salomith die eerste.

+ Exo. xx.

19

Hebron kinderen waren Ieharu die eerste, Amarias die tweede, Iehasiel dye derde, ende Iecmaan die vierde.

20

Vsiel kinderen waren, Micha die eerste, ende Iesia dye tweede.

21

Merari kinderen waren, Mahali ende Musi. Mahali kinderen waren, Eleazar ende Cis,

22

maer Eleazar sterf, ende en hadde geen sonen maer dochteren. Cis kinderen haere broeders namensi.

23

Musi kinderen waren Mahali, Eder, ende Ieremuth, die drie.

24

Dat zijn Leui kinderen, onder haerder vaders huysen, ende haer maesschap ende dye ouerste der vaderen die gerekent werden, elc na zijn oordine na der namen ghetal, bi die hoofden van elcken bisonder, die die wercken des dienst deden inden huyse des HEREN, van twintich iaer ende daer ouer,

25

⁺Want Dauid sprac Dye HERE die Godt van Israhel heeft sinen volcke ruste ghegheuen, ende Iherusalem tot een wooninghe tot inder eewicheyt,

+ D

26

Ende ten sal ooc der Leuieten ambacht nyet meer toebehooren dat si voort aen draghen sullen den tabernakel met sinen vaten, om te dienen,

27

Ende nae den laetsten gheboden Dauids, salmen tellen dat ghetal der kinderen Leui, van twintich iaeren ende daer ouer,

28

ende si sullen staen onder die hant der kinderen Aaron, om te dienen inden huyse des HEEREN, inden voorhouen, ende totten offerkisten, ende totter reyninghe, ende tot alderley heylighe plaetsen, ende tot allen wercken des dienst inden huyse Gods,

29

Maer die priesters zijn ouer die thoonbrooden, totten bloemen van meele, totten offer totten ongheheefden vladen, totten pannen tot tgherooste, ende tot allen ghewichte ende mate,

30

Ende dye Leuieten om te staen des morghens, om den HEERE te dancken, ende te louen, te singhen, Des auonts oock alsoo,

31

soo wel in alle brantoffer, om dien den HEERE te offeren, ghelijck op die sabbotthen, nieuwe maenden, ende andere feesten,

[p. aa5v]

na dat ghetal ende behoorte, altoos voor den HEERE,

32

ende dat si der bewaringen gaey souden slaen aenden tabernacule des verbonts ende des heylichdoms, ende Aarons kinderen haerder broeders, om te dienen in den huyse des HEREN.

§ Hoe Aarons kinderen ghetelt ende geoordineert werden, Vanden vier ende twintich ouersten priesteren.