De Vorsterman Bijbel

§ Dat .xvij. Capittel.

1

⁺MAer doen Dauid in zijn huys woonde sprac hi totten prophete Nathan. ⁺ Siet ic woone in een cederen huys, ende die arcke des verbonts des HEREN is onder die vellen.

+ A

+ ij.regum. vij.

2

Nathan sprac tot Dauid. Al wat in uwer herten is dat doet, want God is met v.

3

Hierom gebuerde inder seluer nacht dat woort Gods tot Nathan, ende sprac.

4

Gaet henen ende segt Dauid minen knechte. Dit seyt de HERE, Ghi en sult mi gheen huis timmeren tot eender woonighen,

5

Want ic en hebbe in geen huys gewoont, van dien dage aen doen ic die kinderen van Israel wt dat lant van Egipten voerde, tot op desen dach, maer ic ben gheweest, daer den tabernacule gheweest is, ende in die tente

6

bliuende met geheel Israel. Heb ic ooc tot eenigen vanden rechters in Israel oyt geseyt, dien ic ghebode te voeden minen volc ende gesproken? Waeromme en timmerde ghi my niet een cederen huys?

7

Hierom spreect nv aldus tot minen knechte Dauid. Aldus seyt de HERE der heyrscharen, ⁺ Ic heb v ghenomen als ghi inder weyden achter die scapen volchdet, dat ghi een vorste soudet zijn ouer mijn volc van Israel,

+ B

8

ende ben met v gheweest werwaerts ghi henen ghereyst zijt, ende hebbe uwe vianden verslaghen voor v, ende hebbe v eenen name ghemaect, als een van die groten, die opter aerden heerlijcke namen hebben.

9

Ende ic heb minen volcke van Israel een plaetse ghegeuen, ende tsal gheplant worden, ende daer inne woonen, ende ten sal niet meer beweeghet worden. Ende die kinderen der boosheit en sullent niet meer vermoeden, als te voren vanden beghinne,

10

ende inden tiden doen ic die rechteren stelde ouer mijn volc van Israel. Ende ic hebbe alle uwe vianden verootmoedicht ende vercondighe v nv, dat die HERE v een huys timmeren sal.

11

Maer als ghi uwe dagen sult veruult hebben, dat ghi wech gaet tot uwen vaderen, so sal ic v zaet na v verwecken, dat van uwen sonen een sal zijn, die sal ic zijn conincrijc vast maken,

12

die sal mi een huys timmeren, ⁺ ende ic sal sinen conincliken stoel beuestigen inder eeuwicheyt.

+ C

13

Ic sal hem een vader

[p. aa3r]

zijn, ende hi sal mi tot eenen sone zijn, Ende ic en sal mijn ontfermherticheyt niet van hem wech nemen, ghelijc icse van dien genomen hebbe, die voor v was,

14

Ende ic sal hem setten in mijn huys, ende in mijn conincrijc tot inder eewicheyt, ende sinen stoel sal aldaer stantuastich wesen inder eewicheyt.

15

⁺Na alle dese woorden ende na dit selue visioene, sprack Nathan tot Dauid,

+ D

16

Ende als die coninc Dauid quam, ende stelde hem voor den HERE, so sprac hi, Wie ben ic HEERE Godt? ende wat is mijn huys? dat ghi mi sodanige dingen doen sout?

17

Ende dat heeft v noch te weynich gedocht voor uwen ooghen, maer hebt ouer dat huys ws knechts noch van verren toecomende ghesproken, Ende hebt my edel ende heerlijc ghemaect bouen alle menschen, HEERE mijn Godt,

18

Wat sal Dauid meer tot v segghen, dat ghi nv uwen knecht soo heerlijc verheuen hebbet, ende hem gekennet?

19

HEERE om ws knechts wille, nae uwer herten hebdi al soodanighe groote dinghen ghedaen, ende ghy woudet hebben, dat bekent souden wesen alle grootheden,

20

HERE ws gelijc en is niet, ende daer en is gheen God dan ghi, wt dien allen, van welcken wy met onsen ooren ghehoort hebben,

21

Ende waer is een volc opter aerden, ghelijc v volc van Israhel, daer een God toe gheghaen si, om hem een volc te verlossen, ende te maken door zijn grootheyt ende veruaerlike dingen, wtworpende die geslachten van sinen aensichte, dye hy wt Egypten verlost hadde?

22

Ende ghi hebt v volc van Israel v tot eenen volcke ghestelt, tot inder eewicheyt, ende ghy HERE zijt zijn God gheworden.

23

⁺Nv dan HEERE dat woort dat ghi ghesproken hebt tot uwen knechte, ende ouer zijn huys, worde geuesticht tot inder eewicheyt, ende doet alsoo ghy ghesproken hebt,

+ E

24

ende uwen name bliue ende worde grootelijc verheuen tot inder eewicheyt, op datmen segge dye HEERE der heyrscharen is dye Godt van Israel, ende dat huys zijns knechts Dauids, is stantuastich blijuende voor hem,

25

Want ghi HERE hebt die oore ws knechts gheopent, dat ghi hem een huys timmeren sout, Daeromme heeft v knecht een betrouwen gheuonden, om dat hi voor v soude bidden,

26

Nv dan HERE ghi zijt God, ende hebt alsoo groote weldaden tot uwen knechte gesproken,

27

ende hebt begonst te ghebenedien dat huys ws knechts, dat voor v altoos si, Want als ghijt HERE ghebenedijt, so salt inder eewicheyt ghebenedijt zijn.

[kolom]

§ Van Dauids strijden, ende van die tribuyten der heydenen Ende van Dauids amptluyden ende officiers