De Vorsterman Bijbel

§ Dat .xxi. Capittel

1

⁺MAnasses was twaelf iaer oudt, doen hy Coninc wert, ⁺ ende regeerde vijf ende vijftich iaer te Ierusalem. Sijn moeder hiet Haphiziba.

+ A

+ ij.pa. xxxiij b.

2

Ende hi dede dat den HERE mishaechde na die afgoden der heydenen, die de HERE voor die kinderen van Israels aensichte verdreuen hadde,

3

ende verkeerde hem, ende timmerde die hoochten, die zijn vader ezechias hadde vernielt, ende rechte Baals outaer op, ende maecte boschkens ghelijck Achab die Coninc van Israel ghedaen hadde. Ende aenbadt alderhande heyr vanden hemel, ende diende hen,

4

Ende timmerde outaren in des HEEREN huys, daer af dat die HERE gheseyt hadde. Ic sal minen naem te Ierusalem setten.

5

Ende hi timmerde alle den heyr des hemels outaren in beyde voorhouen van des HEREN huys,

6

ende liet sinen sone door dat vier ghaen, ende hadde acht op der voghelen sanck ende teekenen, ende hielt waersegghers ende tekenbedieders, om dat hi quaet voor den HERE dede, ende hem tot gramscappen soude verwecken.

7

⁺Hi sette ooc den afgod des boschkens, den welcken hi ghemaect hadde in des HEREN tempel, vanden welcken die HERE tot Dauid ende tot Salomon sinen sone gheseyt hadde In desen huyse ende te Ierusalem, die ic vercoren hebbe wt alle geslachten van Israel, sal ick minen naem setten eewelijc,

+ B

8

ende ic en sal Israels voet voortaen niet meer laten beweghen vanden lande dat ic haeren vaderen gegeuen hebbe. Ist nochtans also, dat si houden ende doen metten wercken alle dat ic hen geboden hebbe, ende na alle die wet, die hen mijn knecht Moyses geboden heeft.

9

Maer si en hoordender niet nae, maer si zijn verleyt van Manasse, dat si argher deden dan die heydenen, die de HERE voor der kinderen van Israel aensichte vernielt hadde.

10

⁺Doen sprac die HERE door zijn knechten die propheten, segghende.

+ C

11

Om dat Manasses die Coninck van Iuda, dese grouwelijcheden heeft ghedaen, die argher zijn dan alle die grouwelicheden die die Amoriten ghedaen hebben, die voor hem gheweest zijn, ende heeft Iuda ooc doen sondighen aen zijn onsuyuerheden.

12

Daeromme seyt die HEERE die God van Israel aldus. Siet ic sal quaet ongheluc ouer Ierusalem ende Iuda brengen

[p. z1r]

dat so wie, dat hooren sal, dien sullen beyde die ooren tuyten,

13

ende sal ouer Ierusalem, dmeetsnoer van Samarien trecken, ende tgewichte van Achabs huys, ende sal Ierusalem wt ⁺ schrabben, gelijcmen schrijftafelen plach wt te veghen, Ick salse wtuegende omwenden ende ick sal mijn griffie dicwils ouer haer strijcken,)

+ h. scudden soomen scotelen verschudt, ende salse omstorten,

14

Ende ick sal sommighe van minen erfdeele ouer laten bliuen, ende die gheuen in haerder vianden handen, alsoo dit si eenen roof ende plucke worden alder haerder vianden

15

Om dat si quaet gedaen hebben dat mi mishaechde, ende hebben volhert ende mi vertoornt van dien daghe aen, doen ic haer vaders wt Egypten leyde, tot desen dach toe.

16

Hier en bouen storte Manasses veel onschuldichs bloets, tot dat Ierusalem totten monde vol wert, behaluen die sonde daer hi Israel mede dede sondigen, om dat ^* hi quaet doen soude) voor den HEERE.

* th. si quaet doen souden

17

⁺Wat meer van Manasse te segghen is, ende al wat hi gedaen heeft, ende zijn sonden die hi dede, Siet, en is dat niet geschreuen inden boeck der woorden der dagen der coningen van Iuda.

+ D

18

Ende Manasses sliep met sinen vaderen, ☞ ende wert begrauen, inden hof, aen zijn huys, te weten, inden hof ⁺ Oza,) Ende zijn sone Amon wert coninc ende regeerde in zijn stede

+ thebr. Vza

19

Amon was twee ende twintich iaer out, doen hi coninc wert, ende regeerde twee iaer te Ierusalem, Sijn moeder hiet Messulemet, Haruz van Iatba dochtere,

20

Ende dede dat den HEERE mishaechde, gelijc zijn vader Manasses ghedaen hadde,

21

ende wandelde in alle den wege dien zijn vader gewandlt hadde ende diende den ^* onsuyuerheyden,) den welcken zijn vader gedient hade, ende aenbadtse

* th. afgoden

22

ende verliet den HEERE zijnder vaderen God ende en wandelde niet, in den wech des HEEREN.

23

Ende zijn knechten leyden hem laghen, ende dooden den coninck in zijn huys,

24

Maer dat volck des lants versloech, alle die dat verbont metten eede teghen den coninck Amon ghemaect hadden. Ende si stelden Iosiam sinen sone coninck, in zijn plaetse.

25

Alle dinck wat Amon meer gedaen heeft, En is dat niet geschreuen, in den boeck der woorden der daghen der Coninghen van Iuda?

26

Ende men begroef hem in zijn graf inden hof ^* Oza,) Ende zijn sone Iosias wert coninck in zijn plaetse, ende regeerde voor hem.

* thebr. Vza

§ Hoe Iosias regeerde, Ende dboeck vander tweeder wet gheuonden wert, Ende hoe Iosias sandt, om den HEERE raet te vraghen, Wat woorden dat Olda die prophetersse sprac door de welcke dat si den HEERE raet vraechden.