De Vorsterman Bijbel

§ Dat .xx. Capittel

1

OP dien tijt wert Ezecias doot sieck. ⁺ Ende die propheet Esaias Amos sone quam tot hem in, ende seyde tot hem. ⁺ Aldus seyt dye HERE. Beschict v huys, Want ghi sult steruen ende niet leuende bliuen.

+ ij.pa xxxij f esa. xxxviij a.

+ A

2

Hi keerde zijn aensicht ter wandt ende badt totten HERE, ende sprac.

3

Och HERE, ic bidde, ghedenct doch, dat ic ghetrouwelijc voor v gewandelt hebbe inder waerheit, ende met volmaecter herten ende heb ghedaen dat v behaecht, Ende Ezechias weende met seer grooten ghescreye.

4

Ende doen Esaias noch niet thalf deel ^* des voorhofs) wt ghegaen en was, so gheschiede des HEREN woort tot hem ende sprac.

* th. der stat

5

Keert wederom, ende segt Ezechie den leytsman mijns volcs. Aldus spreect dye HERE ws vaders Dauids God. Ic hebbe v gebet gehoort, ende uwe tranen gesien, Ende siet ^* ic hebbe v gesont gemaect) opten derden dach suldy op gaen in des HEREN huys,

* th ic sal v gesont maken.

6

⁺ende ick sal vijfthien iaer tot uwen leuen doen, ende v ende dese stadt verlossen vanden Coninc van Assyrien, ende dese stadt beschermen om minen wille, ende om mijns knechts Dauids wille.

+ B

7

Ende esaias sprac. Brenghet herwaerts een stuck vighen. Ende doen sise brachten, leyden si die op den swere, ende hi wert ghesont.

8

Ezechias sprac tot Esaiam, welc sal dat teeken wesen, dat mi die HERE ghesont sal maken

[p. y8v]

ende dat ic in des HEREN huys op gaen sal, ⁺ inden derden daghe?

+ C

9

Esaias sprac. Dat teeken suldi hebben vanden HERE dat die HERE doen sal dat hi ghesproken heeft. Wildi dat die scaduwe thien linien op climme, oft dat si so vele graden wederom keere?

10

Ende ^* Ezechias) sprac. Tis lichtelijc te ghescieden, dat die scaduwe wasse thien linien, noch dat en wil ic niet, maer dat si thien graden achterwaerts te rugghe gae.

* the. Hizekiath

11

Doen riep die prophete esaias den HERE aen. Ende hi leyde wederom die scaduwe achterwaert te rugghe thien graden aen Achas wijser, dye si nederwaerts was ghegaen.

12

Tot dier tijt sant ^* Merodach) Baladans sone, des Soons Baladan Coninc te Babilonien, brieuen ende ghiften tot ezechiam, want hy hadde ghehoort dat ezechias sieck gheweest was.

* the: Berodach

13

Ende ezechias is verblijt geweest in haer toecoemste, ende thoonde hen die gheheele apoteke, siluer gout, specerie, ende saluen, ende dat harnas huys, ende vanden vaten, al wat in zijn scatten voor handen was. Daer en was ^* niet een woort) in zijn huys, ende in zijnder geheelder heerscappie, dat hem Ezechias niet en thoonde.

* th. niet

14

⁺Doen quam esaias die prophete totten Coninc Ezechiam, ende sprac tot hem. Wat hebben dese luyden gheseyt? ende van waer zijn si tot v ghecomen? Ezechias sprac. Si zijn wt verren lande tot mi ghecomen van Babilonien.

+ D

15

Hi sprac. Wat hebben si gesien in uwen huyse? Ezechias sprac. Si hebben al gesien wat in minen huyse is, ende daer en is niet in mijn schatten, dat ick hen niet ghethoont en hadde.

16

Doen sprac esaias tot ezechiam. Hoort des HEREN woort,

17

Siet de daghen sullen comen, dattet al tot Babilonien wech ghedraghen sal worden wt uwen huyse, ende al wat uwe vaders verghadert hebben tot desen daghe toe, ende daer en sal niet ouer ghelaten worden, seyt die HERE.

18

Daer toe dye kinderen die van v comen, dye ghy winnen sult, sullen ghenomen worden, dat si gesneden camerlingen zijn souden in des Conincs van Babelonien palleys.

19

Ezechias sprack tot esaiam. Dat woort is goet dat die HEERE ghesproken heeft. Ende sprac noch. Laetet alleen doch vrede ende warachticheyt zijn in mijn daghen.

20

Wat meer van Ezechia te seggen is, ende alle zijn stercheit, ende al wat hi gedaen heeft ende hoe hi den viuer, ende die watergangen, daer mede hi water in die stadt geleyt heeft, ghemaect heeft. En is dat niet al gescreuen inden boecke der woorden der daghen der Conin-[kolom]gen van Iuda?

21

Ende ezechias ontsliep met sinen vaderen, ende Manasse zijn sone wert Coninck in zijn stede, ende regeerde voor hem.

§ Van Manasse ende zijn sonden, Ende van die dreyginge des Heeren, Ende van Ammon sinen sone, die van sinen knechten gedoot wert, in zijn stede quam Iosias zijn sone.