De Vorsterman Bijbel

§ Dat .xvij. Capittel.

1

⁺INden twaelfsten iaer Achas des Conincks van Iuda, wert Coninc van Israel te Sa-[kolom]marien Ozee Ela sone, negen iaer,

+ A

2

ende dede dat den HERE mishaechde, nochtans niet ghelijc die Coningen van Israel, die voor hem waren.

3

Teghen den seluen troc op Salmanassar dye Coninc van Assyrien. Ende Ozee wert hem onderdanich, alsoo dat hy hem tribuyt gaf.

4

Maer doen die Coninc van Assyrien merckede, dat Ozee af soude vallen, ende hem wederstaen, ende boden ghesonden hadde tot Sua den Coninc van Egipten, ende niet alle iaer den Coninck van Assyrien tribuyten ouer en reycte, so hi plach te doen, so belegherde hy hem ende leyde hem ghebonden in die gheuanckenisse.

5

Ende der Assyrien Coninc troc door dat geheele lant, ende te Samarien, ende belegherde .iij. iaer.

6

Ende inden neghenden iaer Ozee, wan die Coninc van Assyrien Samarien, ende voerde Israel wech in Assyrien, ende settese tot Haila ende tot Habor, aent water Gosan, ende inden steden der Meden.

7

⁺Want tis ghesciet doen die kinderen van Israel teghen den HEERE haeren God sondichden, diese wt den lande van Egipten gheleyt hadden, ende wt Pharaos handt des Conincs van Egipten, dat si eerden ander goden,

+ B

8

ende wandelden na den zeden der heydenen, die die HERE voor die kinderen van Israel vernielt hadde ende ^* des ghelijcs voor die Coningen van Israel)

* th. gelijc de coningen van israel deden

9

ende want si des ghelijcs deden ende verwecten hem tot gramscappen, met woorden, die niet recht en waren, te wetene, dat si dye hoochten timmerden in allen steden, beyde van ghesloten ende vasten steden, totten wakers toornen,

10

ende rechteden calomnen op, bosselkens op allen hooghen houelen, ende onder alle groene boomen,

11

ende wierpen aldaer wieroock op allen altaren, ghelijck die heydenen die die HEERE voor hen wech ghedreuen hadde, ende bedreuen quade stucken daer si den HEERE mede vertoornden,

12

ende dienden den onsuyuerheden, daer af die HEERE tot hen gheseyt hadde, dat si dat woort niet doen en souden.

13

⁺Ende die HERE getuychde in Israel ende Iuda, door alle propheten ende sienders, ende liet hen seggen, keert omme van uwen boosen wegen, ende hout mine geboden ende zeden, na alle wette die ic uwen vaderen geboden hebbe, ende so ic v gheseynt hebbe door die hant van mijnen knechten die propheten.

+ C

14

So en hoordent si niet, maer verherden haere necken, ghelijck dye necken haerder vaders, die niet en wilden ^* ghehoorsaem) zijn den HEERE haeren God.

* the. gheloouich

15

Daer toe verachten si sine zeeden, ende zijn verbondt,

[p. y6v]

dat hie met haeren vaderen gemaect hadde ende sine ghetuyghenisse dat hi onder hen dede, maer wandelden na haer ydelheit, ende werden ydel, ende volchden na die heydenen dye om hen woonden, van welcken hen die HERE verboden hadde, dat si niet en souden doen als die deden,

16

Maer si verlieten alle die gheboden des HEREN haers Gods, ende maecten hen .ij. gegoten calueren, ende boschkens, ende aenbaden alle dat heyr des hemels, ende dienden Baal,

17

ende lieten haere sonen ende dochteren door tvier gaen, ende gingen met waerseggen ende touerien om, ende gauen hen ouer quaet te doen dat den HEERE qualic beuiel, om hem te vertoornen.

18

Doen wert die HERE seer toornich ouer Israel, ⁺ ende dedese wech van sinen aensichte, also datter niet ouer en bleef dan dat geslachte van Iuda alleen.

+ D

19

Daer toe en hielt Iuda die geboden des HEREN haers Gods ooc niet, maer wandelde na den zeden van Israel, die si gedaen hadden,

20

Daerom verwerp die HERE alle dat zaet van israel, ende queldese met plagen, ende gafse ouer in die handen des roouers, tot dat hise van sinen aensichte wierp,

21

Want vanden tijd af dat Israel wert van Dauids huyse ghescoert, ende dat si maecten Ieroboam Nabaths sone tot eenen Coninck, Want die selue keerde Israel achterwaerts af vanden HERE, ende dede dat si swaerlijc sondichden,

22

wandelden dye kinderen van Israel in allen Ieroboams sonden die hi op ghestelt hadde, ende en gingen daer niet af,

23

tot dat die HEERE Israhel van sinen aensichte dede, soo hy ghesproken hadde, door dye handt van alle sinen knechten, dye Propheten. Also wert Israhel wt sinen lande wech gheuoert in Assyrien, tot op desen dach. ⁺

+ Iere. xxv

24

⁺Die Coninc van Assyrien dede wt comen van Babelonien, van Cutha, van ^* Ahiath) van Hemath, ende van Sepharuaim, ende sette dye in die steden van Samarien, in die stede der kinderen van Israel. Ende si namen Samarien in, ende woonden in haer steden,

+ E

* th. Aua

25

Maer doen si daer begonsten te woonen, so en vreesden si den HERE niet, ende hi sandt leeuwen onder hen, die doodense.

26

Ende het is den Coninc van Syrien geseyt, ende ghebootscapt. Die heydenen die ghi hier hebt ghebracht, ende die steden van Samarien daer mede beset, en weten vander manieren des Gods vanden lande niet, daerom heeft hi daer leeuwen ghesonden, ende siet, die selue doodense, om dat si die manieren des Gods van dien lan-[kolom]de niet en weten.

27

Dye Coninck van Assyrien gheboot, ende sprac. Leyt een vanden priesters derwaerts, die ghi van daer hebt gheuoert, dat hy gae, ende woone aldaer, ende leerse dye wijse des Gods van dien lande.

28

Doen quam een vanden priesteren die van Samarien wech geleit waren, Ende woonde te Bethel, ende leerdese hoe si den HERE souden ^* dienen)

* the. vreesen

29

Maer elc volc maecte sinen God, ende steldense in de huysen op die hoochten, die de Samaritanen maecten, elc volc in zijn steden, daer si inne woonden.

30

Dye mannen van Babelonien maecten Sochoth Benoth. Die van Chuth maecten Nerghel. Die van Hemath maecten Asima.

31

Dye van Auen maecten Nibahas, ende ^* Tachan). Die van Sepharuaim verbranden haere sonen metten vier Adramelech ende Anamelech, den Goden dyer van Sepharuaim.

* theb. Thacchack

32

⁺Ende niet te min ^* dienden) si den HERE ooc. Ende si maecten hen priesters opten hoochten, wt den ondersten onder hen, ende dedense inden huysen opten hoochten.

+ F

* th. vreesden

33

Also ^* dienden) si den HERE, ende si dienden ooc den afgoden, na elcs volcs wise, van daer si gebracht waren.

* th. vreesden

34

Ende tot op desen dach doen si nae der ouder wisen, dat si noch den HEERE en vreesen, noch haer zeden ende recht en doen, nae die wet ende gheboden die die HERE Iacobs kinderen gheboden heeft,

35

den welcken hi den naem Israel gaf, ende maecte een verbondt met hen, ende geboot hen, ende sprac, en vreest gheen ander goden, ende en aenbeetse nyet, ende en dient hen niet, noch en doet hen geen offerhanden,

36

maer den HEERE, dye v wt den lande van Egipten gheleyt heeft, met grooter cracht ende wtgherecten armen, dien vreest, dien aenbedet, ende dien offert,

37

⁺ende die zeden, rechten, wet, ende gheboden, die hi v heeft laten schriuen, dye houdet, dat ghy daer altijt na doet, ende niet ander goden en vreest.

+ G

38

Ende des verbonts dat hi met v ghemaect heeft, en verghetet niet, dat ghy nyet ander goden en ^* eert)

* the. vreest.

39

maer vreest den HERE uwen God, dye sal v verlossen van allen uwer vianden handen.

40

Maer dese en hoordent niet, maer si deden na haere voorledene wijse.

41

Also vreesden dese heydenen den HEERE, ende nyet te min dienden si oock haeren afgoden. Alsoo deden oock haere kinderen, ende kijnts kijnderen, ghelijck haere vaders ghedaen hebben tot op desen dach toe.

§ Hoe Ezechias regeerde die wel leefde. Ende zijns ghe-

[p. y7r]

lijc ende was na noch voor hem niet in Iuda, ende Moyses metalen serpent brack bi, ende meer andere desgelijcs, Ende Salmanasae quam tegen hem die tvolck van Israel in Assyrien brochte