De Vorsterman Bijbel

§ Dat .xiij. Capittel.

1

⁺INden drientwintichsten iaer Ioas, des soons Ochosie des Conincs van Iuda, wert Ioathas Iehu sone Coninc ouer Israel tot Samarien seuenthien iaer,

+ A

2

ende dede quaet dat den HEERE qualick beuiel, ende wandelde nae Ieroboams sonden, Nabaths sone, dye Israhel dede sondighen, ende en ghinc daer niet af.

3

Ende des HEREN gramscap verbolch ouer Israel, ende gafse onder die handt Hasael des Conincs tot Sirien, ende Benadab Hasaels sone, haer leef-[kolom]daghe lanck.

4

Maer Ioachas badt des HEREN aengesicht, ende die HERE verhoorde hem, ⁺ want hy aensach dat iammer ende bangicheyt van Israel, hoe haer die Coninc van Syrien benaude

+ B

5

Ende die HERE gaf Israel eenen salichmaker, ende is verlost wt der macht des Conincs van Syrien. Ende die kinderen van Israel woonden in haeren wooninghen, ghelijc te voren ghisteren ende eerghisteren.

6

Nochtans en ghingen si niet af vander sonden des huys Ieroboams, die Israel dede sondigen. Maer si wandelden daer inne. Ooc bleef dat boschken te Samarien staen.

7

Ende Ioachas en zijn niet meer gelaten vanden volc, dan vijftich rosuolcs, thien wagens, ende .x. duysent voetuolcs. Want die Coninc van Syrien haddese vernielt, ende haddese ghemaeckt ghelijck dorschstof.

8

Wat meer van Ioachas te segghen is, ende al wat hi gedaen heeft, ende sine stercheit, en is dat niet gescreuen inden boecke der woorden der dagen der coningen van Israel,

9

ende Ioachas ontsliep met sinen vaderen, ende men begroef hem te Samarien, ende sine sone Ioas wert Coninck ende regeerde in zijn plaetse.

10

⁺Inden seuendertichsten iaer Ioas des conincs van Iuda, wert Ioas Ioachas sone coninc, ende regeerde ouer Israhel, tot Samarien sestien iaer,

+ C

11

ende dede qualijck, dat den HEERE qualic behaechde, ende en liet niet af van alle Ieroboams sonden Nabath sone, die Israel dede sondighen, maer hi wandelde daer inne.

12

Wat meer van Ioas te seghen is, ende wat hi gedaen heeft, ende zijn macht, hoe hi teghen Amasia den Coninc van Iuda gestreden heuet, en is dat niet ghescreuen in den boeck der woorden vanden daghen der Coninghen van Israel?

13

Ende Ioas ontsliep met sinen vaderen ende Ieroboam sadt op sinen stoel. Maer Ioas wert begrauen te Samarien by dye Coninghen van Israhel.

14

Ende Helizeus wert cranck vander siecte, waer af hi sterf. Ende Ioas dye Coninc van Israel quam tot hem neder, ende weende voor hem, ende sprac, Mijn vader mijn vader, den waghen van Israel, ende zijn voerman.

15

Ende Helizeus sprac tot hem. Haelt den boghe ende pijlen Ende doen hi den boghe ende die pijlen tot hem ghebracht hadde,

16

so sprac hi toten Coninc van Israel ^* Legt v hadt op) den boghe, ende doen die Coninc ^* zijn hant op den boge geleyt) had, Doen leyde Helizeus zijn hant op des Conincs hant,

* th. spant met uwer hant

* th. met zijnder hant den boghe gespant.

17

end sprack. Doet die veynster oostwaerts open, ende hi dede

[p. y4v]

die open. Ende helizeus sprac. Schiet eenen pile Ende hi schoot. Ende helizeus sprac. Eenen pijle der salicheit vanden HERE, eenen pijle der salicheit teghen dye Siriers, ende ghy sult dye Syriers slaen tot Apheck, tot dat ghyse verslindt

18

⁺Ende hi sprac. Neemt die pijlen, ende doen hise nam, sprac hi totten Coninc van Israel, slaet met een gescutte die aerde. Ende hi sloech driewerf, ende stont stille.

+ D

19

Doen wert dye man Gods gram op hem, ende sprac. Hadt ghi ses of seuenmael geslagen, so sout ghi die Siriers geslagen hebben tot dat si al verteert waren Maer nv sult ghijse driemael slaen.

20

Ende helizeus is gestoruen, ende si hebben hem begrauen, ende die ^* roouers) der Moabiten quamen int lant int selue iaer.

* the. crijschluyden

21

Ende het gesciede dat sommighe eenen man begroeuen, doen si die ^* roouers) sagen, werpen si den man in helizeus graf, ende doen hi daer innen quam ende hi Helizeus gebeenten raecte, wert hy leuendich, ende stont op sine voeten.

* the. crijschluyden

22

So quelde ende pinichden nv Hasael de Coninc van Sirien Israel also langhe als Ioachas leefde

23

Maer de HERE dede hen genade, ende ontfermde haerder, ende keerde hem tot hen om zijns verbonts wille met Abraham, Isaac, ende iacob, ende en wildese niet verstroyen, ende en verwerpse van sinen aensichte niet, tot desen teghenwoordighen tijt toe.

24

Ende Hasael die Coninck van Sirien sterf, ende zijn sone Benadab wert Coninc in zijn stede.

25

Maer Ioas Ioathas sone nam die steden wt der hant zijns vaders Ioachas genomen had met den recht van stride, Ioas sloech hem driewerf, ende hi leuerde die steden van israel weder ouer.

§ Hoe Amasia Ioas sone coninck van Iuda verwant ende regeerde.