De Vorsterman Bijbel

[p. x5v]

§ Hier beghint dat vierde boeck der Coninghen .iiij.Regum int Latijn.

§ Van die Moabiten die voor Israel vielen, Ende hoe Ochozias cranck wert, ende van des Engels woorden tot Heliam, van Ochozia, Ende van die tweemael vijftich, die daer ghesonden werden, ende verslonden werden vant vier, Ende hoe Ochozias starf, Ende Ioram zijn broeder regeerde voor hem.

§ Dat eerste Capittel.

1

⁺ENde Moab is ouerghetreden, ende wederspannich gheuallen tegen Israhel, na dat Achab ghestoruen was,

+ A

2

Ende Ochozias viel door die tralien in zijn zale tot Samarien, ende wert cranck, ende sant boden, ende sprack tot hen, Gaet henen, ende vraecht ^* Beelsebub) den God tot Acharon, oft ic van deser crancheyt ghenesen mach ende leuen,

* theb. Baalsebub.

3

Maer die enghel des HEEREN sprack tot Heliam den Thesbijt, Staet op, ende gaet den boden des conincs van Samarien te gemoete, ende spreect tot hen, En isser dan nv gheen God in Israel, dat ghi ghaet om te vraghen Beelzebub den god van Accaron?

4

Daer om so spreect die HEERE, Ghi en sult vanden bedde niet comen daer ghi op ligt, maer ghi sult den doot steruen, Ende Helias ghinck wech

5

⁺Ende die boden zijn weder tot Ochoziam ghecomen, Ende hi seyde tot hen, Waer om coemt ghi weder?

+ B

6

Sy spraken tot hem, Ons quam een man opwaerts te ghemoete, ende sprack tot ons. Gaet wederom totten coninck die v ghesonden heeft, ende segt tot hem, Dus spreect die HERE, En isser dan nv gheen God in Israhel, dat ghy wech seyndet om raet te vragen Beelzebub, den God van Accaron? Daeromme en sult ghi vanden bedde niet comen, daer ghi op gheclommen zijt, maer ghy sult den doot steruen,

7

Hi sprac tot hen, Van wat ^* figuere ende cleeren was die man gestelt) die v gemoete, ende dese woorden tot v seyde?

* the. gedaente was dye man.

8

Si seyden tot hem ^* Het was een rouwe man) ende was aen zijn lendenen ghegort met eenen rouwen leeren gordel, Hi sprack, Het is Helias die Thisbijt.

* th. die man hadde aen een rouwe huyt

9

⁺Ende hi sant henen eenen hooftman ouer vijftich mannen metten seluen vijftigen dye onder hem waren, Ende hi quam tot hem op daer hy sadt bouen opten berch, Ende hy sprack tot hem, Ghi man Gods, die coninc gebiet, dat ghi sout af comen,

+ C

10

Helias antwoorde den hooftman ouer vijftigen, ende sprack tot hem, Ben ick een man Gods, soo vallet vier neder vanden hemel, ende verslinde v ende uwe vijftighe,

11

doen viel tvier vanden hemel, ende verslinde hem ende sine vijftighe, Ende hi sant wederom eenen hooftman ouer vijftich tot [kolom] hem, met sinen vijftighen, die antwoorde ende sprack tot hem, Ghi man Godts, So seyt die coninck, Coemt haestelic daer af,

12

Helias antwoorde, ende sprac, Ben ic een man Gods, so valle vier vanden hemel, ende verslinde v ende uwe vijftige, Doen viel dat vier ^*) vanden hemel, ende verslinde hem, ende zijn vijftige.

* the. Gods.

13

Doen sant hi weder den derden hooftman ouer vijftighe, met sinen vijftighen, ⁺ Doen dye tot hem bouen quam, buychde hy sine knien tegen Heliam, ende verbadt hem, ende sprack tot hem, Ghi man Gods en wilt niet versmaden mijn ziele, ende dye zielen uwer knechten deser vijftighen die bi mi zijn,

+ D

14

Siet, dat vier is vanden hemel geuallen, ende heeft die eerste twee hooftmannen ouer vijftigen met haeren vijftighen verslint, maer nv bidde ic v dat ghi mijnder sielen wilt ontfermen

15

Doen sprac denghel des HEREN tot Heliam Gaet met hem af, ende en vreest niet, ^*) Ende hi stont op, ende ghinck met hem af totten coninck.

* the. voor hem

16

Ende hi sprack tot hem, Dus seyt die HERE, om dat ghi boden hebt ghesonden ende laten ⁺ raet vraghen Beelzebub den god van Accaron, als ofter gheen God in Israhel en waer, den welcken hy een woort mocht vraghen, soo en suldy vanden bedde niet comen, daer ghi op gheleghen zijt, maer ghi sult den doot steruen,

+ E

17

Also starf hi na den woorde des HEREN, dat Helias ghesproken hadde, Ende Ioram ^* zijn broeder) regneerde, ende wert coninck in zijn plaetse, inden anderen iaer Ioram des soons Iosaphat des conincs van Iuda, want hi en hadde gheenen sone,

* ten is nyet int hebre

18

Wat meer van Ochosia te seggen is, ende al wat hi gedaen heeft, en is dat niet gescreuen in die boecken vanden woorden der daghen der coninghen van Israel.

§ Hoe Helias ende Helizeus tsamen wandelden, ende Helias ten hemelwaerts voer.