De Vorsterman Bijbel

§ Dat .xvi.Ca.

1

MAer dat woort des HEEREN quam tot Iehu Hanani sone teghen Baasa ende sprac.

2

⁺Om dat ic v wt tstof verheuen hebbe ende tot eenen vorste ghestelt ouer mijn volck van Israel, ende ghi gewandelt hebt inden weghe Ieroboam, ende hebt mijn volc van Israel doen sondigen, op dat ghi mi soudet vertoornen door haer sonden.

+ A

3

Siet, so sal ick Baasa nacomelingen, ende zijns huys nacomelingen wech nemen, ende sal v huys setten, gelijc Ieroboams Nabaths sone.

4

Wie van Baasa sterft in die stat, dien sullen die honden eten, ende wie van hem sterft inden velde, dien sullen die voghelen des hemels eten.

5

⁺Maer wat meer van Baasa te seggen is, ende wat hi gedaen heeft, ende zijn striden, en is dat niet gescreuen inden boeck der woorden, der daghen der Coninghen van Israel?

+ B

6

Ende Baasa ontsliep met sinen vaderen, ende wert begrauen tot Thersa, ende zijn sone Hela werdt Coninc, ende regeerde in zijn plaetse.

7

Maer als dat woort des HEREN quam door den prophete Iehu, Hanani sone ouer Baasa ende zijn huys, ende teghen alle dat quaet dat hi dede voor den HERE, om hem te vertoornen door die wercken zijnder handen, dattet soude worden ghelijc Ieroboams huys, om dese sake doode hi hem ^* dat is Iehu Hanani sone den prophete)

* Ten is nyet int he.

8

Inden ses ende twintichsten iare Asa des Conincs van Iuda, wert Hela Baasa sone Coninc, ende regeerde ouer Israel tot Thersa twee iaer.

9

Maer zijn knecht Sambri die ouerste hooftman ouer dye helft ^* des rosuolcs) was, die viel wederspannich tegen hem.

Want Hela was te Thersa, ende hy dranck ende was droncken in Arza des Prouoests huys tot Thersa.

* the. der wagnen

10

Ende Sambri quam in, ende sloech hem doot int seuen ende twintichste iaer Asa des Conincs van Iuda, ende wert Coninc, ende regeerde in zijn stede.

11

Ende

[p. x1r]

doen hi coninc was, ende op sinen stoel sadt, so sloech hi tgehele huis Baasa, ende en liet niet ouer bliuen, ooc dien aen die want pisset, daer toe sinen ^* naesten) ende zijn vrienden,

* theb. bloetwreker

12

Also vernielde Sambri dat gheheele huys Baasa, naden woorden des HEEREN dat hi ouer Baasa gesproken hadde, door die hant vanden prophete Iehu,

13

om alle der sonden wille van Baasa ende zijns soons Hela, die si deden, ende deden Israel sondighen, om den HERE den God van Israel te vertoornen, door haer ydelheyt,

14

Wat meer van Hela te seggen is, ende wat hi gedaen heeft, En is dat niet gescreuen inden boeck der woorden der dagen der coninghen van Israel?

15

⁺Inden seuen ende twintichsten iare Ase des conincs van Iuda, wert ^* Sambri) coninc, ende regeerde seuen dagen te Thersa, Want tvolc lach voor ^* Gebbethon) der Philistinen stat

+ D

* theb. zimri

* th. Gibbethon.

16

Maer doen dat volc inden leger hoorde seggen, dat Sambri een verbont gemaect hadde, ende wederspannichlijc wederstaen hadde, ende den coninc ooc verslagen hadde, doen maecte geheel Israel inden seluen daghe, Amri den velthooftman tot eenen coninc ouer Israel inden legere,

17

Ende Amri trock op, ende geheel Israel met hem, van Gebbethon, ende beleyden Thersa.

18

Maer doen Sambri sach, dat die stadt gewonnen soude worden, ghinc hi in dat palleys, in des conincs huys, ende verbrande hem met des conincs huys, ende sterf,

19

om zijnder sonden wille die hi ghedaen hadde, doende dat den HEERE qualic behaechde, ende wandelde Ieroboams wech, ende in zijn sonden, die hi dede, dat hy Israel dede sondighen.

20

Wat meer van Sambri te segghen is, ende hoe hi een verbont maecte ende lagen leyde, ende zijn tyrannie, ⁺ en is dat niet ghescreuen inden boec der woorden der dagen der coningen van Israel?

+ E

21

Doen ter tijt deelde hem tvolck in twee deelen, deen helft hinc aen Thibni den sone Ginath, dat si hem tot eenen coninck souden stellen, Maer die ander helft hinc aen Amri

22

Ende dat volc dat aen Amri hinck, wert stercker dan dat aen Thibni Gineths sone hinck, ende Thibni sterf, doen soo wert Amri coninc.

23

Inden eenendertichsten iaer Asa des conincs van Iuda, wert Amri Coninck ouer Israel, twaelf iaer, ende regeerde te Terza ses iaer.

24

Hi cocht den berch van Samarien van ^* Somer) om twee pont siluers, ende timmerde opten berch ende hiet die stadt die hi timmerde na den name Somer des Heeren vanden berch van Samarien,

* th. Semer.

25

Ende Amri dede dat den HEERE qualijc behaechde, ende was arger, dan alle die voor hem geweest waren,

26

Ende hi wandelde [kolom] ooc in alle Ieroboams Nabaths soons weghen, in zijn sonden, daer hi Israel mede dede sondigen, op dat si den HERE den God van Israel souden vertoornen in haer ydelheden.

27

⁺Wat meer van Amri te segghen is, ende al wat hi gedaen heeft, ende zijn strijden die hi gestreden heeft, En zijn dye niet gescreuen inden boecke der woorden der dagen der coninghen van Israel?

+ F

28

Ende Amri ontsliep met sinen vaderen, ende wert begrauen tot Samarien, ende Achab zijn sone wert coninc, ende regeerde in zijn stede.

29

⁺Inden achtendertichsten iare Ase des conincs van Iuda, wert Achab, Amri sone coninc ouer israel, ende regeerde ouer Israel tot Samarien twe ende twintich iaer,

+ G

30

Ende Achab Amri sone, dede dat den HEERE qualijck behaechde, bouen alle die voor hem gheweest waren,

31

ende het was hem cleyn dat hi wandelde, in Ieroboams Nabaths soons sonden, ende nam daer toe Iezabel ^* Methabaal,) des conincs tot Zidon dochter tot eenen wiue, Ende ginc henen, ende diende Baal, ende aenbadt hem,

* the. Ethbaal

32

Ende rechte Baal eenen outaer op, ⁺ in Baals ^* tempel dien) hi hem timmerde te Samarien,

+ iiij.reg. x.d

* theb. huys dat

33

ende maecte een boschken, Soo dat Achab meer dede om den HERE den God van Israel te vertoornen, dan alle die coninghen van Israel, die voor hem gheweest waren.

34

Ter seluer tijt timmerde Ahiel van Bethel Iericho, Het coste hem sinen eersten sone Abiram, ⁺ dat hi dat fundament leyde, ende sinen ioncsten sone Segub, dat hy die poorten sette na des HEREN woort, dat hi ghesproken hadde door Iosue Nuns sone.

+ Iosue. vi

§ Hoe Helias tot Achas quam, ende den hemel sloot dattet niet regenen en soude. Ende hoe Helias vanden rauens ghespijst wert, Ende hoe hi daer na van die weduwe van Sarepten geuoet wert.