Logo DBNL
De Vorsterman Bijbel (ca. 1528-1531)

De Vorsterman Bijbel

(ca. 1528-1531)–Anoniem Vorsterman Bijbel–rechtenstatus Auteursrechtvrij

Vorige Volgende

§ Dat .xxij. Capittel

1

+ENde Dauid sprac voor den HERE dye woorden dees liets, inder tijt doen hem die HERE verlost hadde van alder zijnder vianden hant, ende van Sauls handt,

2

ende seyde.

Die HERE is minen steen, ende mijn * crachte) ende mijn * salichmaker).

3

God die HERE is mijn stercheyt, ic sal op hem betrouwen, minen scilt, ende hoorne mijnder salicheyt, mijn verheffere, ende mijn toeulucht, mijn behouder, vander boosheit suldy my verlossen.

4

Ic sal den loeffeliken HERE met lof aenroepen, + so sal ic van minen vianden verlost worden.

5

Want bruecken des doots hebben mi omuaen, ende die beken Belial hebben my verscrict.

6

Stricken der hellen hebben mi omuaen, ende nettten der doot hebben mi verrascht

7

Als ic benaut ben, so sal ic den HERE aenroepen, ende tot minen God sal ic aenroepen, so sal hi mine stemme verhooren, van sinen heiligen tempel, ende mijn gecrijsch sal comen voor sinen ooren.

8

Die aerde heeft haer beweecht, ende gebeeft, ende die fundamenten der * bergen) hebben hen gescuddet, ende tsamen gestooten, want hi is toornich.

9

Roock ginc van zijnder nuesen, ende verslindende vier van sinen aensichte, kolen zijn van hem aengesteken.

10

Hi heeft den hemel genijcht ende isser af gedaelt, + ende donckerheit was onder sine voeten

11

Ende hi is op * Cherubin gheclommen) ende heuet geulogen, ende hi is * geuallen) op die vederen des wints.

12

Ende hy sette om hem duysternisse, tot eene tente, * ende siftende wateren vanden wolcken der hemelen)

13

Vanden schijnsel voor hem ontstaken dye viercolen.

14

Die HERE sal donderen vanden hemel, + ende die alderhoochste sal sine stemme gheuen.

15

Hi heeft sine pijlen gescoten, ende die verstroyde blixemen, ende hi heeftse ver-[kolom]teert)

16

Ende die * wtstortinghen) der zee openbaerden hen, ende die fundamenten des aertrijcx openden hen, door dat straffen des HEREN ende door den adem des geests zijns toorns

17

Hi sandt vander hoochten, ende ontfinc my ende wt vele wateren nam hi mi tot hem.

18

Hi heeft mi verlost van minen aldermachtichsten vianden, ende van die, die my hateden want si zijn mi te machtich gheweest.

19

Hi is mi voor gecomen inder tijt mijns ongeuals, ende die HERE is mijn stuensel gheworden.

20

Ende hy heeft my wtgheleyt in dye breetheyt, hi heeft mi verlost, want ick hem behaecht hebbe.

21

Die HERE sal mi weder geuen naer mine gerechticheyt, + ende sal mi betalen na die reynicheit mijnder handen.

22

Want ic hebbe die weghen des HEREN ghehouden, ende en hebbe niet ongodlijc gedaen teghen minen God.

23

Want alle sine vonnissen zijn voor mijne ooghen, ende sine geboden en hebbe ic niet van mi verworpen.

24

Daer om sal ic met hem volmaeckt zijn, ende sal mi wachten voor mine misdaet.

25

So sal mi die HERE weder geuen nae mijnder gherechticheit ende na mijnder handen reynicheyt in sinen ooghen.

26

Bi die heilighen suldy heylich zijn, ende biden * stercken) volmaect.

27

Ende metten wtuercoren suldy wtuercoren wesen, + ende biden verkeerden sult ghi verkeert zijn.

28

Want ghi sult dat allendich volck salich maken, ende met uwen ooghen die hooghe vernederen.

29

Want HERE ghi zijt mijn licht, ende ghi die HERE sult verlichten daermede mine duysternissen.

30

Want door v wil ic ghewapent opgescort loopen, + ende door minen God ouer die mueren springhen.

31

Gods weghen die zijn onbeulect des HEREN redenen zijn door dat vier beproeft, hy is eenen schilt allen den gheenen die in hem betrouwen.

32

Want wie is een God anders dan die HERE? + ofte wie is een stercke God sonder onse God?

33

God heeft mi * opgeschort) met crachte, ende heeft mi eenen volmaecten wech geeffent.

34

Hi heeft mine voeten gelijcket den hertte, ende hi heeft my op mijn hoochten ghestelt

35

hi leert mine handen strijden, ende maket als den stalen booghe mijn armen.

36

Ghi hebt mi ghegeuen eenen schilt uwer salicheyt, ende * mine) sachtmoedichede heuet mi vermenichfuldicht.

37

Ghi hebt mine gangen onder mi breet gemaect, ende mijne knokelen en sullen nyet slibberen.

38

+Ick sal mijne vianden veruolghen, ende dye verdoen, ende ick en wil nyet wederomme keeren, tot dat ickse verniele

39

Ic salse verslinden ende in stucken slaen, dat si niet op en comen, maer sullen voor myne voeten vallen.

40

Ghi hebt mi met cracht gegordet totten strijt, ghy hebt ghecrommet onder my, die hen teghen my op rechten.

41

Ghi hebt mi mine vianden * totten rugge) gegeuen, die my haten, ende ick salse verslaen.

42

Si sullen roepen, maer daer en is gheen salichmaker, totten HEERE, maer hy en salse niet verhooren.

43

Ic salse * wtwissen) als stof opter aerden, ende als slijck opter straten wil ickse dunne maken, ende * breken)

44

Ghi sult mi verlossen vanden twist mijns volcs, + ende sult my behoeden tot een hooft onder die heydenen, een volck dat ic niet en kende, dat sal mi dienen.

45

Die vremde kinderen sullen mi * wederstaen) Si sullen mi ghehoorsaem zijn, als si hooren sullen metten ooren.

46

Die vremde kinderen zijn * afgeuloeyt,) ende sullen * ontstucken ghewreuen worden in haer luyden banghicheden)

47

Die HEERE leeft, ende gebenedijt si mijn God, ende die starcke Godt mijnder salicheyt worde verhoocht.

48

+Godt die mi wrake geeft, ende worpt ter neder die volcken onder my.

49

Ghy dye mi wt leyt van minen vianden, Ende vanden ghenen die hen teghen mi op rechten, verhefte ghi my, ende vanden onrechtigen man suldi mi verlossen.

50

Daerom sal ick v dancken HERE onder die heydenen, ende uwen name lof singhen

51

Die daer groot maect die salicheyt van sinen Coninck, ende ontfermherticheyt doet aen sinen ghesalfden Dauid, ende aen sine zaet inder eewicheyt.

§ Van Dauids laetste woorden, Ende van die namen van sinen gheweldighen.


Vorige Volgende