De Vorsterman Bijbel

§ Dat .xviij. Capittel

1

⁺ENde Dauid ouermerckende dat volc dat bi hem was, stelde hi hen hooftluyden ouer hen, ouer duisent ende ouer hondert,

+ A

2

Ende bestelde dat derdendeel des volcs onder Ioabs handen, Ende des volcs een derdendeel onder Abisai Seruie sone, Ioabs broeder handen, Ende een derden deel onder Iethai, die van Geth was, Ende die coninc sprac totten volcke, Ic sal ooc met v wt trecken,

3

Maer dat volc seyde, Ghi en sult niet wt trecken, Want al ist dat wi al vluchten, daer en sal niet veel aen ons lig-

[p. t2r]

gen, oft dye helft verslagen wort van ons, so en sullen si hen onser niet aen nemen. Want ghi zijt alleen getelt, oft onser thien duysent waren. ⁺ So ist nv beter, dat ghi ons inder stat voor een toeulucht weest.

+ B

4

Dye Coninc sprac tot hen. Wat v behaecht, dat sal ic doen. Ende die Coninc ginc staen aen die poorte, ende alle tvolc trock wt in zijn scaren bi hondert ende duysenden.

5

Ende die Coninc gheboot Ioab ende Abisai, ende Ethai, ende sprac. Behoudt my den iongelinc Absalom. Ende alle dat volc hoordet dat die Coninck gheboot allen den hooftluyden van Absalom.

6

Ende doen dat volc wt quam opt velt tegen Israel, so verhief hem den strijdt inder warande Ephraim.

7

Ende dat volc van Israel wert aldaer gheslagen voor Dauids knechten, also dat opten seluen dach eenen grooten slach ghesciede van twintich duysent mannen,

8

ende den strijt was aldaer verstroyet op alle dat lant. Ende dat wout verslinde des daechs veel meer volcx dan dat sweert verslinde.

[afbeelding]

9

⁺Ende Absalom gemoete Dauids knechten, ende reedt op eenen muyl. Ende als den muyl onder een grote dicke eycke quam, verhinc zijn hooft aen die eycke, ende hi hinc ende weyfelde tusscen hemel ende aerde, ende sinen muyl liep onder hem wech.

+ C

10

Doen dat een man sach, soo bootscapte hijt Ioab ende sprac. Ic sach Ablom aen een eycke hangen.

11

Ende Ioab sprac totten man diet hem geboetscapt hadde. Saecht ghi dat? Waeromme en sloechdy hem aldaer niet ter aerden? so soude ic v van minent weghen [kolom] thien silueren penningen, ende een gordel gegeuen hebben.

12

Die man sprac tot Ioab. Al haddi mi duysent silueren penningen in mijn hant gewegen, so en wilde ic nochtans mijn hant aen des Conincs sone niet geslagen hebben Want die Coninc gheboot v, ende Abisai, ende Ethai voor onse ooren ende sprac. Bewaert mi den iongelinc Absolom.

13

Oft waert dat ic yet valschs gedaen hadde, op mijnder sielen pericule, want voor den Coninc niet verborgen en sal bliuen, soude ghi selue tegen mi gestaen hebben.

14

Ende Ioab sprac. Also niet als ghi segt Ic sal hem slaen voor uwe aensichte.

⁺ Doen nam Ioab drie spiesen in zijn handt ende stietse Absolom in zijn herte, doen hy noch leefde daer hi hinc aen die eycke.

+ D

15

Ende thien iongelingen Ioabs sciltknechten liepen toe ende sloegen hem doot.

16

Doen blies Ioab die trompette, ⁺ ende bracht dat volc weder, op dattet Israel niet voorder na en soude iagen, want Ioab wilde dat gemeyne volc sparen,

+ Ioan. vij.d

17

Ende si namen Absalom ende wierpen hem in dat wout in eenen groten gracht, ende droegen eenen grooten hoop steenen op hem. Ende geheel Israel vluchte, elc in zijn tente.

18

Absolom hadde hem een calomne opgerecht doen hi noch leefde, die daer staet in des Conincs dal. Want hi sprac, ic en heb ghenen sone, daer om sal dit mijns naems gedenckenisse zijn. Ende hiet die calomne na sinen name. Ende heet oock tot op desen dach, Absaloms beroeminge.

19

Achimaas Zadochs sone sprack. Laet my loopen ende den Coninc vercondighen, ⁺ dat die HEERE hem recht gedaen heeft van zijnder vianden handen,

+ E

20

Ioab sprack tot hem. Ghi en sult huyden gheen goede bootscap dragen, op eenen anderen dach suldy bootscap brengen, ende huyden en wil ic niet dat ghi tijdinge brenget, want des Conincks sone is doot.

21

Maer tot Chusi sprac Ioab. Gaet henen ende bootscapt den Coninc dat gheene, dat ghi ghesien hebt. Ende Chusi badt Ioab aen ende liep.

22

Achimaas Zadochs sone seyde weder tot Ioab, Hoe, oft ic ooc Chusi na liepe? Ioab sprack. Wat wildi loopen mijn sone? Coemt herwaerts ghi en sult geen goede bootscap brengen.

23

Hy antwoorde. Want, wat scadet, oft ic liepe? Hy sprac tot hem. So loopt ooc. Also liep Achimaas op eenen toe pat, ende voorliep Chusai.

24

⁺Dauid sadt tusschen twee poorten. Ende die wachter ginc bouen op die poorte, aen den muere, ende hief zijn oogen op, ende sach eenen man alleen loopen,

+ F

25

ende riep, ende gaft den Coninc te kennen. Die Coninc sprac. Is hi alleen so is een goede bootschap in sinen monde. Ende doen de selue ginc ende daer quam,

26

sach

[p. t2v]

die wachter eenen anderen man loopen, ende riep in die poorte ende sprac. My vertoont hem noch een ander man ende loopt alleene. Die Coninc sprac. Dat is ooc een goede bode.

27

Die wachter sprac. Ic sie des eersten loop als den loop Achimaas Zadochs sone. Ende die Coninck sprac. Het is een goet man, ende coemt ende brengt een goede bootscappe.

28

⁺Maer Achimas riep ende sprac totten coninc ^* Weest gegroet o Coninc) ende aenbadt voor den coninc op zijn aensicht ter aerden, ende sprac Geloeft si die HERE v God, die de luyden die haer handen tegen minen heere den coninc op hieuen ^* besloten) heeft.

+ G

* theb. vrede

* h. geleuert

29

Die Coninc sprack. Is ooc vrede den kinde Absalom? Achimaas sprac. Ic sach een groot getuymel, doen des Conincs knecht Ioab, mi uwen knechten sandt ende en weet niet wat het was.

30

Die coninc sprac Gaet daer ouer ende staet hier. Ende als hi ginc daer ouer ende stont aldaer,

31

Doen quam Chusai ende sprac. Ic brenge een goede bootscappe mijn Heere Coninc, Want die HEERE heeft v huyden recht ghedaen vander hant alder ghenen die hen tegen v oprechten.

32

Die Coninc sprac tot Chusai. Heeft dat kint Absalom ooc vrede? Chusai sprac. Het moet alle den vianden des conincs mijns heeren gaen, so het den kinde gaet, ende allen die hen tegen v oprechten om quaet te doen.

33

Doen wert die Coninc bedroeft, ende ginc opwaerts opter salen inder poorten ende weende, int gaen sprac hi aldus. Mijn sone Absolom mijn sone, mijn sone Absalom, wildet Godt dat ick voor v moeste steruen. O Absalom mijn sone ^* mijn sone Absalom)

* th. mijn sone mijn sone.

§ Hoe Ioab tot Dauid sprac, doen hi Absalom beweende dat hi gedoot was, Ende hoe die Coninc in die poorte sadt, Ende van des conincs gebot aen die ouerste van Iuda, ende tot Amasa.