De Vorsterman Bijbel

§ Dat .xvi. Capittel.

1

⁺ENde doen Dauid een weynich vander hoochten des berchs voorby ghegaen

+ A

[p. t1r]

was, siet, doen ontmoete hem Siba Mephiboseths knape met een paer ezelen ghesadelt, daer op waren twee hondert brooden, ende hondert stucken rosinen, ende hondert stucken vygen, ende ^* twee flesscen) wijns,

* th. een flessche

2

Doen sprac die coninc tot Siba, Wat willen dese dinghen beteekenen? Siba antwoorde, ende sprac, ^* Mijn Heere coninc) die ezelen sullen voor dat ghesin des conincs zijn, om daer op te rijden, ende die brooden ende die vighen voor die knapen te eten, ende den wijn te drincken, als si moede worden inder woestinen,

* ten is nyet int heb

3

Ende die coninc sprac, Waer is ws Heeren sone? Siba sprac totten coninc. Hi bleef te Ierusalem, Want hi sprac, Huyden sal mi dat huys Israhel mijns vaders rijck wedergeuen,

4

Dye coninc sprac tot Siba, Het si al uwe, dat Mephiboseth toe heeft behoort, Siba sprac met aenbidden, Ic bidde v, laet mi genade vinden voor v, minen Heere die coninc.

5

Hier na quam die coninc Dauid tot Bahurim, ende siet, ⁺ daer ghinck een man wt vanden gheslachte des huys Sauls, ⁺ die hiet Semei, Geras sone, die ghinck wt, ende vloecte,

+ B

+ iij.reg. ij.b.

6

ende wierp tegen dauid met steenen, ende tegen alle dauids des conincs knechten, Want alle tvolc ende al die machtige strijtbarige mannen waren tot zijnder rechter ende slincker siden,

7

Maer aldus sprac Semei doen hi den coninc vermaledide, Gaet wt, ghaet wt ghy man dye bloetstorter, ghy Belials man,

8

die HEERE heeft v ghehouden, alle dat bloet van Sauls huys, dat ghy in zijn plaetse dat conincrijcke inghenomen hebt, Nv heeft die HEERE dat rijck ghegheuen in Absoloms ws soons handt, ende siet, nv druct v uwe ongheluck, want ghy zijt een bloetstorttende man.

9

⁺Maer Abisai Seruie sone sprac totten coninc, Waerom vloect dese hont die steruen sal, minen Heere den coninc? Ic sal ghaen henen, ende hem den cop af houwen,

+ C

10

Die Coninc sprac, Ghi kinderen Seruie wat heb ic met v te doen? Laet hem vloecken Want die HEERE heeft hem geheeten, Vloect Dauiden, Wie mach nv seggen? Waerom doet ghi also?

11

Ende Dauid sprac tot Abisai ende tot alle zijn knechten, Siet, Mijn sone die van minen liue gecomen is, staet na mijn leuen, Waerom nv oock te meer niet Ieminis sone ^* sal mi vermaledien?) Laet hem geworden dat hi my vloecke naden gebode Gods, Want die HERE heuet hem geheeten,

* ten is nyet int hebre

12

Messchien die HERE sal mijn allendicheit aensien, ende mi voor dese vloecken met goet loonen,

13

Also ginc Dauid met sijn luyden ouer den wech, Maer Semei ginc aen die side des berchs neffens hem henen, ende hi vloecte, ende wierp met steenen tot [kolom] hem, ende besprengden met aerden clotten.

14

Ende die coninc quam moede in met alle den volcke dat bi hem was, ende hi vermaecte hem aldaer

15

⁺Maer Absalom ende alle tvolc der mannen van Israel quamen te Ierusalem, Ende Achithophel met hem,

+ D

16

Doen Chusai die Arathiter Dauids vrient tot Absalom in quam, so sprac hi tot Absalom, Weest ghegruet Heere Coninc, geluc Heere coninc,

17

Absalom sprac tot Chusai, Is dat uwe dancbaerheyt aen uwen vrient? waerom en sidi niet met uwen vrient getrocken?

18

Chusai sprac tot Absalom, Also niet want ick sal dien toe behooren, dien die HERE verkiest ende dit volc, ende alle man in Israel, diens wil ic zijn, ende bi hem bliuen,

19

Ten anderen ^* op dat ick dat ooc segge) Wien soude ick dienen? En soude ic niet des conincs sone dienen? so ic uwen vader ghehoorsaem geweest hebbe, so wil ic ooc voort aen v gehoorsaem zijn.

* ten is nyet int heb.

20

Ende Absalom sprac tot Achithophel Houdet tesamen raet, wat sullen wi moeten doen?

21

Achithophel sprack tot Absalom, Beslaept ws vaders bislaperssen, die hi hier gelaten heeft, om dat huys te bewaren, Soo sal alle Israel hooren, dat ghi uwen vader ^* besmet gemaect hebt,) so sal alle der ghenen hant dye bi v zijn, coender worden,

* thebr. hebt doen stincken

22

Hierom sloegen si Absalom een tente op den soldere, ende Absalom besliep zijns vaders bislapersse, voor die oogen des geheelen Israels,

23

Want den raet van Achithophel die hi ghaf in dien daghen, was gelijckerwijs oft yemant God om raet geuraecht hadde So was alle Achithophels raet, ende als hi met Dauid was ende als hi was met Absolom.

§ Hoe Achithophels raet te niet wert door Chusi raet. Van Ionatha ende Achimaas die den raet tot Dauid brachten: ende hoe si totten put gingen: ende hoe Achithophel hem seluen verhinc. Ende hoe Absalom Amasa voor Ioab stelt.