De Vorsterman Bijbel

§ Dat .xiij. Capittl

1

EEn ^* kint van eenen iare was Saul als hi begonst te regneren, ende twee iaren regneerde hi ouer Israel,

* theb. Saul was een iaer coninc gheweest, ende doen hi twee iaer ouer israel geregneert hadde vercoos hi

2

ende hi vercoos) hem drye duysent mannen wt Israel. Twee duysent waren met Saul tot Machmas, ende op dat gheberchte Bethel, ende een duysent met Ionathan tot Gabaa Beniamin, maer dat ander volc liet hy gaen elcken in zijn woenstede.

3

⁺Maer Ionathas sloech die Philistinen in haerder hoedinghe die tot Gabaa was. Dat quam voor dye Philistinen.

Ende Saul liet dye basoenen blasen inden gheheelen lande, ende segghen. Laetet die Hebreen hooren.

+ A

4

Ende alle Israel hoordet seggen. Saul heeft geslagen den legher der hoeden der Philistinen. ^* Ende [kolom] Israel heeft hem opgerecht tegen) die Philistinen. Ende hierom heeft alle dat volc geroepen na Saul in Galgala.

* the. Israel stant voor.

5

Doen vergaderden hen de Philistinen om te striden teghen Israel dertich duysent wagens, ⁺ ses duysent ruters, ende ander volc so vele als sandt aen den oeuer der zee, ende trocken opwaerts ende legerden hen tot Machmas, tegen oosten voor BethAuen.

+ B

6

Doen dat dye mannen van Israel sagen, dat hen dongeluc opten hals was (want dat volc was daer verdruct ende benaut) so verborgen si hen in die holen speluncken ende roetsen, ende gaten ende in die putten

7

Maer die Hebreen gingen ouer die Iordane int lant Gad ende Galaad. Ende doen Saul noch was in Galgala, so was alle tvolck achter hem veruaert.

8

Doen verbeyde hy seuen daghen tot dien tijt van Samuel gheordineert. Ende doen Samuel niet en quam tot Galgala, so verstroeyde tvolc van hem.

9

⁺Doen sprac Saul. Brenget mi herwaerts brantoffer ende vreedsaem offer, ende offerde brantoffer.

+ C

10

Als hi den brantoffer voleyndt hadde siet, doen quam Samuel. Doen ginc Saul wt hem te gemoete, om hem te groeten.

11

Samuel sprac. Wat hebdi gemaect? Saul antwoorde Ic sach dat dat volc hem van mi verstroyde, ende ghi en quaemt niet ter rechter tijt, ende die Philistinen waren verghadert tot Machmas.

12

Doen sprac ic. Nv sullen die Philistinen tot mi afcomen tot Galgale, ende ic en heb dat aensicht des HEREN niet verbeden, ende ^* bedwongen door nootsakelicheyt) heb ick den HERE eenen brantoffer geoffert.

* th. gesterct wesende

13

Samuel sprac tot saul. Ghi hebt sottelijc gedaen, ende en hebt die gheboden des HEREN ws Gods niet gehouden, die hi v gheboden hadde, want en haddy dit niet gedaen hi soude v rijck voorspoedich gemaect hebben ouer Israel, voorder ende voorder.

14

Maer nv en sal v rijc niet voorder staen. Die HERE heeft hem eenen man wtgesocht na zijnder herten, dien heeft die HERE gheboden prince te zijn ouer zijn volc, want ghi en hebt des HEREN gebot niet gehouden.

15

Ende samuel maecte hem op ende ginc van Galgala op tot Gabaa Beniamin.

^* Ende dat ander volc is mede opghetrocken na saul tegent volc, ⁺ dat si beuochten, comende van Galgala tot Gabaa inden hoeuel Beniamin) Ende saul ouertelde dat volc dat by hem geuonden was, omtrent seshondert mannen,

* ten is nyet int heb.

+ Genesis iij.d. ij.pa. xvi.a

16

Ende saul ende zijn sone Ionathas, ende dat volc dat bi hen geuonden is, was in Gabaa Beniamin. Maer die Philistinen hadden hen gelegert ende waren opgetrocken tot Machmas

[p. q8r]

17

Ende wt den legher der Philistinen trocken drie heyren om te ^* strijden) Deen keerde hem om die strate tot Ephraim int lant ^* Saul)

* the. verderuen

* the. Sual

18

Dat ander keerde hem op die strate Bet Horon. Dat derde keerde hem op de strate die daer strect aen dat dal Zeboim teghen aen die woestine.

19

Maer daer en wert geen smidt geuonden in dat gheheele lant van Israel. Want die Philistinen dachten, die Hebreen mochten swaerden ende spiesen maken.

20

Ende alle Israel moeste neder trecken totten Philistinen als yemant een ploechyser, houweel, bijle oft zeysen hadde te scarpen,

21

oft wat aen die zeysenen, houweelen, gaffelen ende bijlen afgearbeyt was, ende die oorden bot geworden waren

22

Als nv den strijtdach quam, so en werter noch zweert, noch spiese geuonden in alle des volcx hant, dat met Saul ende Ionathas was. Voor Saul ende sinen sone wert wat geuonden.

23

Ende der Philistinen hoedinghe trock wt voor Machmas ouer,

§ Hoe Ionathas met sinen sciltknecht die Philistinen slaet ende niet wetende van zijns vaders gebot, proefde den huenich, waerom die vader hem wilde dooden, maer wert vanden volcke verlost.