De Vorsterman Bijbel

§ Dat .xiij. capittel.

1

⁺ENde die kinderen van Israel deden noch wederom quaet voor den HEERE, ende die HERE ghafse inden handen der Philistinen, veertich iaeren.

+ A

2

Daer was een man te Zara vanden gheslachte van Dan, geheeten ^* Manue,) ende zijn wijf was onuruchtbaer, ende en baerde nyet

* th. Manoah.

3

Ende die Engel des HEEREN openbaerde den wiue, ende sprac tot haer, Ghi zijt onuruchtbaer ende sonder vry kinderen, maer ghi sult beurucht worden, ende eenen sone baren,

4

Daeromme wacht v, dat ghi gheenen wijn, noch starcken dranc, die vroncken maken mach en drinct, ende nyet onreyns en etet,

5

Want ghy sult beurucht worden, ende eenen sone baren, dien gheen schaers opt hooft en sal comen, Want dat knechtken sal een ^* Nasereus) Gods zijn van moeders liue aen, ende hi sal beginnen Israhel te verlossen wter Philistinen hant.

* the. Nazir. Iudi. ij.d

6

Doen quam dat wijf, ende seydet haeren man ende sprac, ⁺ Het quam een man Godts tot mi, ende zijn gedaente was aen te sien, als een Engel Gods seer veruaerlick ^* als ic hem) vraechde van waer hi quam, oft waer henen hi wilde, ofte hoe sinen name genoemt was ^* so en woude hi mi dat niet segghen)

+ B

* the. dat ick hem niet en

* ten is nyet int heb.

7

Maer hi sprac tot mi, Ghi sult beurucht worden, ende eenen soon baren daerom en drinct gheenen wijn, noch oock starcken dranc, die droncken mach maken, ende en eedt niet onreyns, want dat knechtken sal een ^* Nazereus Gods zijn van moeders liue aen tot in zijn doot.

* the. Nazir.

8

Doen badt Manue den HERE, ende sprac, Och HERE, ic bidde, laet den man Gods weder tot ons comen, dien ghi gesonden hebt, dat hi ons leere, wat wi metten knechtken doen sullen, dat geboren sal worden,

9

Ende God verhoorde die stemme Manue, ende die Engel Godts quam weder totten wiue, daer si sadt opten velde, ende haer man Manue en

[p. p4r]

was niet bi haer, ^* ende als si den Engel ghesien hadde,

* ten is nyet int heb.

10

doen liep si haestelick, ende bootschaptet haeren man, ende sprac tot hem, Siet, dye man heeft mi gheopenbaert, ^* dien ic te voren gesien hadde,)

* th. die huyden tot my quam.

11

Manue maecte hem op, ende ginc sinen wiue na, ende quam totten man, ende sprack tot hem, Sijt ghi die man dye metten wiue gesproken hebt? Hy sprac, Ia,

12

Manue seyde, Alst zijn sal veruult, dat ghi ghesproken hebt, wat wilt ghi dattet kint doen sal, oft waer af salt hem moeten wachten?

13

Ende die Enghel des HEEREN sprac tot Manue, Hi sal hem wachten voor alle dat ick den wiue gheseyt hebbe,

14

Hy en sal niet eten dat wt den wijn stock spruyt, ende hy en sal gheenen wijn noch starcken dranc drincken, ende niet onreyns eten, al wat ic haer geboden hebbe, dat sal hy houden, ^* ende veruullen,)

* ten is nyet int heb.

15

Manue sprac totten Engel des HEREN, Ic bid v, dat ghi mijnen gebeden gehoor wilt geuen, ende wi sullen v een geyten bocxken bereyden,

16

Maer die Enghel des HEREN antwoorde, Manue, ist dat ghy my hier bedwinct, so en sal ic van uwen broode niet eten, Maer wildy een brantoffer doen, soo offert dat den HERE, Want Manue en wist nyet dattet een Engel des HEREN was,

17

Ende Manue sprac totten Engel des HEEREN, Hoe heet ghi dat wi v eeren, alst coemt al wat ghi ghesproken hebt?

18

Maer dye Engel des HEREN sprac tot hem, waerom vraechdy na minen naem, die doch wonderlijck is?

19

⁺Doen nam manue een geyten bocxken, ende vochtigen offere, ⁺ ende leydet op eenen steen, ende offerdet den HERE, die wonderlicheyden dede, maer Manue ende zijn wijf sagen toe,

+ D

+ genesis. xxiij.g

20

Ende doen die vlamme op voer vanden altaer ten hemel, soo voer die Enghel des HEEREN inder vlammen des altaers op, Doen dat Manue ende zijn wijf sagen, so vielen si ter aerden op haer aensicht,

21

Ende die Enghel des HEREN en openbaerde Manue ende sinen wiue niet meer, Doen bekende Manue dattet een Engel des HEREN was,

22

ende sprack tot sinen wiue, Wi moeten die doot steruen, om dat wi God ghesien hebben,

23

Sijn wijf antwoorde hem, Waert dat dye HEERE ons hadde willen dooden, so en hadde hi den brantoffer ende vochtighen offer van onsen handen niet genomen, hi en soude ons ooc al dat niet verthoont hebben, noch ons dat hebben laten hooren, ^* datter gheschieden sal

* the. soo nv geschiet is.

24

Ende dat wijf baerde eenen sone, ende hiet hem ^* Samson) ende dat knechtken nam toe, ende wies ende die HERE gebenedide hem,

* th. Simson

25

ende die gheest [kolom] des HEREN begonst met hem te zijn in den heyrlegher dan, tusschen Saraa ende Esthaol.

§ Hoe Samson een huysurouwe troude, Ende Samson doot den leeuwe, Ende geeft een raetsele, ende verslaet dertich mannen, ende zijn huysurouwe verlaet hem, ende trout eenen anderen.