De Vorsterman Bijbel

§ Dat .vij. Capittel.

1

⁺DAerom Ierobaal, die ooc Gedeon genoemt is, des nachts opstaende, ende al tvolc dat met hem was, quam aen die fonteyne Harad, Den heyrleger der Madianiten was in die valeye aen die noortside des hooghen hueuels.

+ A

2

Ende die HEERE sprac tot Gedeon, des volcs is te vele met v, ⁺ ende Madian en sal niet geleuert worden in zijn handen dat Israel teghen mi ter auentueren hem niet en beroeme, ende segge. Ic ben door mijn craht verlost.

+ Deu. xx.d.

3

Dus spreect tot den volck daer zijt alle hooren, so segt ouerluyt. Die sorghe heuet, ende is veruaert, die gae wederom. Ende vanden berch ^* Galaad) zijn si gegaen, ende vanden volcke zijn wederom ghekeert .xxij. duysent mannen, ende daer en bleuen maer .x. duysent mannen ouer.

* th. Gilead.

4

Ende die HEERE sprac tot Gedeon Des volcs is noch te vele, leitse neder aent water, ende aldaer sal icse proeuen, ende van welcken ic v seggen sal, dat hi met v trecke, die sal met v trecken, ende die ic verbieden sal te gaen die keere wederom.

5

Ende als dat volc aen twater quam, doen sprac die HERE tot Gedeon Die met zijnder tonghen wter hant dat water lecket, als die honden plegen te lecken, dien stelt bysonder, des gelijcs die op haer knien drincken, sullen aen dander side zijn.

6

Doen was dat

[p. o8v]

ghetal der genen die ghelect hadden dat water, wter hant totten monde worpende drie hondert mannen,

7

Ende die HERE sprac tot Gedeon, door die drie hondert mannen die dat water ghelect hebben, sal ic v verlossen, ende die Madianiten sal ic in uwen handen leueren Maer dat ander volck latet alle tot zijnder plaetse gaen.

8

Ende als si namen voor haer getal spijse ende trompetten, ⁺ so gheboot hi alle die ander ^* menichte) wech te gaen tot haere wooninge, Ende hi ghaf hem seluen metten driehondert mannen om te strijden. Ende theyr der Madianiten lach daer onder inden valleyen

+ C

* th. Israeliten

9

Ende die HERE sprack inder seluer nacht tot hem. Staet op, ende gaet af inden heyrleghere, Want ick hebt in uwen handen ghegheuen,

10

Maer vreesdy af te ghaen alleen, so laet uwen knape Phura met v af ghaen int heyr.

11

Ende als ghi hoort wat si spreken, dan sullen dijn handen gesterct worden, int heyr te gaen. Doen ginc hi met Phura sinen knape af, aen die plaetse des heyrlegers, ⁺ daer die wake der ghewapender mannen lach,

+ D

12

Ende die Madianiten ende Amalekiten, ende alle ^* die vant) oosten, hadden hen neder geleyt in die valeye, als een menichte der sprinchanen, ende haer kemelen en waren niet te tellen, om der menichten wille, als dat zant aenden oeuer der zee.

* th. kinderen vant

13

Doen Gedeon quam, doen vertelde deen den anderen sinen droom, die hi ghesien hadde, ende sprac. Siet ic hebbe eenen droom ghesien, My dochte dat een ghersten broot, ^* onder die asschen ghebacken), wentelde hem totten heyr der Madianiten, ende doent aen die tente quam so sloecht die selue, ende werpse neder, ende heeftse ghelijck ghemaect der aerden int neder worpen.

* the. geroost Roma .iiij. ende .vij.

14

Doen antwoorde die ander, daer hi teghen sprac, Dat en is niet anders, dan dat zwaert Gedeon des soons Ioas des Israeliten, Want God heeft dye Madianiten in sinen handen ghegheuen, met alle den heyrleghere.

15

Doen Gedeon dien droom hoorde, ende sine wtlegghinghe, ⁺ so aenbede hi, ende quam weder int heyr van Israel ende sprac. Maect v op, want die HEERE heeft dat heyr der Madianiten in onsen handen gegeuen,

+ E

16

Ende hi deelde die drie hondert mannen in drie deelen, ende ghaf elcken een basoen in zijn handt, ende ledighe flesschen, ende lampen daer inne,

17

ende seyde tot hen, Wat ghy my siet doen, doet ooc also. Ick sal gaen aen dat een deel des heyrleghers, volcht dan nae, [kolom] dat ic voor doe,

18

Als die trompette gheluyt slaet in mijn hant, so slaet dan ooc uwe trompetten inden omganc des heyrlegers, ende roept tsamen den HEERE ende Gedeon. Als ic die basoenen blase, ende alle die met mi zijn so suldy ooc die basoene blasen om tgeheele heyr ende seggen. Hier tswaert des HEREN ende Gedeon.

19

⁺Alsoo quam Gedeon, ende die drie hondert mannen die met hem waren aen die plaetse des heyrs, ontrent den tijt als die middelste wake beghint, ende als die vachters gewect waren, bliesen si met basoenen, ende sloeghen die flesschen in haeren handen te samen.

+ F

20

Ende als si rontomme in drie plaetsen die trompette bliesen, ende si die flesschen ghebroken hadden, hielden si die lampen in haeren slincker handen, ende die basoenen in haeren rechte handen, dat si bliesen ende riepen. Hier tswaert des HEREN ende Gedeons,

21

ende elck stont op zijn plaetse rontomme inden ommeganc des heyrleghers der vianden.

Doen wert alle dat heyr verstoort, ende riepen, ende vluchten al huylende.

22

Ende niet te min, die drie hondert mannen stonden euen stijf, ende bliesen die basoenen. Ende die HEERE sandt een yeghelijcs swaert in alle die heyrlegeren, ende si versloegen malcanderen,

23

ende die heyrlegeren vluchteden tot Betsa toe, ende tot ^* den zercke van Elmeula in) Tebath. Ende die mannen van Israel van Nepthalim, van Aser, ende van alle Manasse riepen te samen, ende veruolchden die Madianiten.

* th. bethsita zereratha, tot aen dye breyde Mehalabby.

24

^* Ende die HEERE gaf Israel victorie in dien daghen) Ende Gedeon sandt boden op alle dat gheberchte Ephraim seggende. ⁺ Coemt af den Madianiten teghen, ende onderloopt hen dat water tot Bet Bara, ende den Iordanen toe.

* ten is nyet int hebr.

+ G

25

Doen riepen alle die van Ephraim waren, ende voorcoemende onderliepen hen dat water tot Bet Bara, ende die Iordane, ende vinghen twee princen der Medianiten, Oreb, ende Seb, ende dooden Oreb opten steen Oreb, ende Seb in die perse Seb, ende si veruolchden die Madianiten, ende brachten die hoofden Oreb ende Seb, tot Gedeon ouer die vloet der Iordane.

§ Hoe die mannen van Ephraim teghen Gedeon opstonden, Ende hoe Gedeon vanden mannen van Socoth broot begeerde, ende hem dat weygherden, Ende Gedeon dat loonde, Ende van die afgoderien die Israel aen Gedeons Ephoth bedreef, ende met baal.