De Vorsterman Bijbel

§ Dat .iiij. Capittel.

1

⁺MAer die kinderen van Israel deden voorts quaet voor den HEERE doen ^* Aioth) gestoruen was.

+ A

* th. Ehud. i.regum. ij.a.

2

Ende die HERE ^* leuerdese) in die handen Iabin der Cananiten coninc, die tot Hazor sadt, ende sine velthooftman was Sisara, ende hi woonde tot Haroseth der heydenen,

* th. vercochtse.

3

Ende die kinderen van Israel riepen totten HEERE, Want hi hadde negen hondert yseren wagens, ende dwanc seer die kinderen van Israel met gewelt .xx. iaer, ende verdructese.

4

Tot dyer tijt was rechtersse in Israel die propheterse ^* Delbora) een huysurouwe Lapidoth,

* th. Debora.

5

ende si woonde onder den palmen boom, diemen met haeren name noemde Delbora, tusschen Rama ende Bethel, op dat geberchte Ephraim, ende die kinderen van Israel quamen voor haer op om te rechten,

6

Die selue sandt henen ende liet roepen Barach, den sone Abi Noam, van Cedes Nephthalim, ende dede hem segghen.

⁺ Die HEERE die God van Israel heuet v geboden. Gaet henen ende trect opten berch Thabor, ende neemt thien duysent mannen met v, vanden kinderen Nepthalim ende Sabulon,

+ B

7

Want ic wil Sisara den velthooftman Iabin tot v brengen aen dat water Kison, met sinen wagens, ende met zijnder menichte, ende ic sal hem in uwen handen leueren.

8

Barach sprac tot haer. Ist dat ghi met mi trect so sal ic trecken, maer en trect ghi met mi niet, so en sal ic niet trecken.

9

Si sprac, Ic sal met v trecken, maer den prijs der victorien en sal v op dese reyse niet toeghescreuen worden, die ghi doet, maer dye HEERE sal Sisara in eens wijfs hant ouergheuen. Aldus stont Delbora op, ende troc met Barach tot Kedes.

10

Doen riep Barach Sabulon ende Nephthalim tot Kedes, ende trock te voete met .x. duysent mannen. Delbora reysde ooc met hem.

11

^* Aber) dye cyneser [kolom] was vanden Cyniten, vanden kinderen Hobab Moyses maech getrocken, ende hadde zijn tenten opgeslagen bi die eycke Zaanim neffens Kedes.

* the. Heber.

12

Doen wert Sisara te kennen gegeuen dat Barach die sone Abi Noam, opten berch Thabor getrocken ware,

13

ende hy riep alle sine wagenen te samen, negen hondert yseren wagens ^* met zeysenen) ende al tvolc dat met hem was van Harozeth der heidenen, aen dat water Kison,

* ten is nyet int hebre.

14

Ende Delbora sprac tot Barach. Staet op dit is den dach, inden welcken v die HEERE Sisara in uwen handen heeft gegeuen, Siet want die HEERE sal voor v wtreysen. Aldus troc Barach vanden berch Thabor, ende die thien duysent mannen hem nae.

15

⁺Maer die HEERE veruaerde Sisara, met alle zijn waghens ende heyr, ende verscrictese voor dye scharpte des sweerts, voor Barachs oogen, Also dat Sisara van sinen waghen spranc, ende vluchte te voete.

+ C

16

Barach veruolchde die wagens na, ende dat heyr tot Harozeth der heidenen toe, ende alle theyr Sisare viel inder scarpten des sweerts, also datter niet een ouer en bleef.

17

Maer Sisara vluchte te voete in die tente Iael, des wijfs ^* Aber) des Cyniters. Want die coninc Iabin tot Hazor, ende dat huys ^* Aber) des Cyniters stonden met malcanderen in vrede.

* the. Heber.

* the. Heber.

18

Iael ginck wt Sisara te gemoete ende seyde tot hem. Wijct mijn here wijct tot my, en vreest niet. Ende hi weke tot haer in haer tente, ende si decte hem met eenen mantel,

19

Hi sprac tot haer. Lieue geuet mi een weynich waters te drincken, want mi dorstet seere, Doen dede si open eenen melcpot ende gaf hem te drincken, ende decte hem. Ende hi sprac tot haer.

20

Gaet inder tenten dueren, ende als yemant coemt ende vraecht oft yemant hier is? so segt, Niemant,

21

Doen nam Iael dat wijf ^* Aber) eenen naghel vander tenten, ende eenen hamer in haer hant ende ginc heymelic tot hem in, ⁺ ende sette hem den nagel op den slaep van sinen hoofde, ende den nagel geslagen, heeft si vast gemaect door grauende zijn herssenen totter aerden toe, ende heeft daer den slape totter doot gheuoecht, ende wert onmachtich ende sterf.

* the. heber.

+ D

22

Doen Barach Sisara veruolchde, so ginc hem Iael te gemoete daer wt ende sprac tot hem. Coemt hier ic sal v den man thoonen dien ghi soect, ende doen hi tot haer in quam lach Sisara doot, ende die nagel stack in sinen slaep

23

Also vernederde God op die tijt Iabin der Cananiten coninc voor die kinderen van Israel,

24

ende die hant der kinderen van Israel ginck ende verdructe Iabin der Cananiten coninc, tot dat si hem te niet deden.

[p. o7r]

§ Hoe Delbora ende Barach een liedt songen, na dat zij den coninc van Canaan verwonnen hadden, Ende dat lant was veertich iaer sonder oorloghe.