De Vorsterman Bijbel

§ Dat .xxiij. Capittel

[p. o4r]

1

⁺ENde na langhen tijt, doen die HERE Israel totter rusten hadde ghebracht, van allen haren vianden rontsomme, ende Iosue nv out ende wel bedaecht was,

+ A

2

riep hi alle Israel, ende hare outste, hoofden, rechters, ende officiers, ende sprack tot hen, Ic ben oudt, ende wel bedaget,

3

ende ghi hebt ghesien al wat die HEERE uwe Godt ghedaen heeft aen alle desen volcke voor v, Hoe die HEERE uwe God heeft selue voor v gestreden,

4

Ende nv want ick v dat landt ghedeylt hebbe metten lote van dye Iordanen aen, ende alle die volcken, die ick wt gheroeyt hebbe, ende aen dye groote zee, teghen der sonnen onderghanck, ende daer noch vele volcs ouerschiet,

5

ende dye HERE uwe Godt salse wt stooten voor v, ende van v verdriuen, dat ghi haer landt in nemet, soo v die HEERE uwe Godt, ^* ghelouet) heeft.

* the. gesproken

6

Alleen wordet gesterct, ende zijt sorchfuldich, ⁺ dat ghi houdet, ende doet, alle wat ghescreuen staet int wet boec Moysi,

+ B

7

dat ghi daer niet af en wijcket, noch ter rechter, noch ter slincker hant, op dat ghi niet onder dese ouergebleuenen volcken en coemt, dye met v zijn, ende niet en ghedenct, noch en sweret, by den name haerder goden, noch hen en dient, noch en aenbedet,

8

maer aen hanghet den HEERE uwen Gode, soo ghi tot desen daghe toe ghedaen hebt, ⁺

+ Deu. xxxij.

9

soo sal dye HEERE voor v verdriuen groote ende machtighe volcken, ende niemant en sal teghen v ghestaen konnen tot desen dage toe,

10

uwer een salder duysent veriaghen, Want dye HEERE uwe Godt sal strijden voor v, soo hy v ^* gelooft) heeft,

* the. gesproken.

11

Daerom bewaert dat alleen, op dalder naerstichste, dat ghi den HERE uwen Godt lief hebbet.

12

⁺Maer ist dat ghy v omme keert, ende deser ouer ghebleuenen volcke dwalinghen wilt aen hanghen, ende aen hen houden, alsoo dat ghi onder hen, ende si onder v comen,

+ C

13

soo weet, dat die HEERE uwe God alle dese volcken niet meer voor v en sal verdriuen, maer si sullen v tot stricken ende netten, ende tot stocken aen uwen siden worden, ende tot eenen prickel in uwen ooghen, tot dat hy v verniele vanden goeden lande, dat v dye HERE uwe Godt ghegheuen heeft.

14

Siet, ick gae huyden den wech alder werelt, ⁺ ende ghi sult weten van geheelder herten, ⁺ ende van geheelder sielen, dat het niet een woort gefalgeert en heeft, aen alle den goede, dat die HERE uwe Godt v belouet heeft, het is al ghecomen, ende gheen ver-[kolom]bleuen,

+ D

+ Hyer sterft Iosue.

15

Ghelijck als nv allet goet gecomen is, dat die HEERE uwe Godt ghesproken heeft, alsoo sal die HEERE oock ouer al laten comen alle quaet, tot dat hy v verniele van desen goeden lande, dat v dye HERE uwe Godt ghegheuen heeft,

16

als ghi dat verbont des HEEREN ws Gods ouertredet, dat hi v gheboden heeft, ende henen ghaet, ende anderen goden dient, ende die aenbedet, alsoo dat dye verbolghentheyt des HEEREN ouer v vergramme, ende v ter stondt verniele vanden goeden lande, dat hi v gegheuen heeft.

§ Hoe Iosue vermaent die wet te houden, Ende hoe God Abraham wt Mesopatamien gehaelt heeft, Ende hoe Iosue sterft, ende in Thamath begrauen wort.