De Vorsterman Bijbel

§ Dat .xxij. Capittel.

1

⁺DOen riep Iosue dye Rubeniten, ende Gadditen, ende dat halue gheslachte Manasse,

+ A

2

ende sprack tot hen, Ghy hebbet alle ghedaen, dat v Moyses die knecht des HEREN gheboden heeft, ende ghi hebbet my in allen dinghen onderdanich geweest,

3

Ghi en hebt uwe broeders niet verlaten eenen langen tijt, tot op desen dach, ende hebt ghehouden aen dat gebot des HEEREN [kolom] ws Godts,

4

Want die HEERE uwe Godt, uwe broeders tot rusten heeft ghebracht, so hi hen gelouet hadde, soo keert v nv wederomme, ende trect henen tot uwe wooningen, inden lande uwer besittingen, dat v die knecht Godts Moyses ghegheuen heeft op ghenen side des Iordaens.

5

Doet slechts naersticheyt, dat ghi doet na dat ghebot ende wet, die Moises die knecht des HEEREN gheboden heeft, dat ghi den HEERE uwen Godt beminnet, ende wandelt op alle sine weghen, ende sine geboden houdet, ende hem aenhanget, ende hem dienet, van gheheelder herten, ende van gheheelder sielen,

6

Alsoo ghebenedidese Iosue ende lietse ghaen, ende si ghinghen tot hare wooninghen.

7

Den haluen gheslachte Manasse heeft Moyses gegeuen tot eenen erfdeele Basan, ⁺ Dye andere helft ghaf Iosue onder haeren broederen, ouer dese side des Iordaens, teghent westen, Ende doen hise liet ghaen tot haeren wooninghen, ende hen ghebenedijt hadde,

+ B

8

soo sprack hi tot hen, Ghy coemt weder thuys met grooten goede tot uwen wooninghen, met seer veel beesten, siluer, gout metael, yser, ende cleederen, so deelt nv den roof uwer vianden wt met uwen broederen

9

Aldus soo keerden die Rubeniten, Gadditen ende dat halue gheslachte Manasse wederomme, ende ginghen van den kinderen van Israhel wt Silo, dye inden lande Canaan leyt, op dat si int landt ^* Galaad) souden trecken, totten lande haerder besittinghen, dat si besitten wt den beuele des HEEREN door Moysen.

* the. gilead.

10

Ende doen si quamen aen dye hoopen aen dye Iordane, die inden lande Canaan leydt, ⁺ timmerden dye Rubeniten, Gadditen, ende dat halue geslachte Manasse, aldaer aen die Iordane eenen grooten schoonen altaer ^* van onghemeten hoocheyt)

+ C

* ten is nyet int heb.

11

Maer doen dye kinderen van Israel hoorden segghen, ^* ende seker boden dat ghebootschapt hadden,) dat dye kinderen Ruben, die kinderen Gad, ende dat halue gheslachte Manasse, hadden eenen outaer ghetimmert teghen dat landt Canaan, aen dye hoopen aen dye Iordane, op dye side der kinderen van Israel,

* ten is nyet int heb.

12

Doen vergaderden si hen met der gheheelder ghemeynten tot Silo, op dat sy teghen hen op souden trecken met een heyr, ende teghen hen strijden,

13

Ende sonden daerentusschen tot hen int lant ^* Galaad) Phinehes den sone Eleazar des priesters,

* the. gilead.

14

ende met hem thien

[p. o3v]

vanden ouersten vorsten, onder den huisen haerder vaderen, wt elcken gheslachte van Israel eenen,

15

Ende doen si tot hem quamen, int landt ^* Galaad) spraken si tot hen, ende seyden.

* th. Gilead

16

⁺Aldus doet die gheheele ghemeynte des HEEREN seggen, ende ontbiet v, wat is dat ouertreden, dat ghy v aenden Godt van Israhel vergripet? ende v huyden achter den HEERE afkeeret, daer mede dat ghi v eenen altaer timmert, dat ghy af vallet vanden HEERE,

+ D

17

Is v te weynich aen dye misdaet ^* Beelphegor?) van de welcke wi noch op desen dach niet ghereynicht en zijn, ende daer quam een plaghe onder die gemeynte des HEEREN,

* th. Peor.

18

ende ghy keert v huyden achterwaerts vanden HERE, ende zijt huyden afuallich gheworden van den HERE, ⁺ dat ghy huyden oft morghen ouer dye gheheele gemeynte gram soude worden,

+ Nv. xxv.c.

19

Maer meynt ghy, dattet landt uwer besittinghen onreyn is, soo coemt hier ouer int landt, dat dye HERE besidt, daer dye wooninge des HEREN staet, ende neemt besittinghe onder ons, ende en wort niet afuallich vanden HERE, ende van ons, v eenen altaer timmerende, buyten den altaer des HEREN ons Godts,

20

En vergreep hem nyet Achan die soone ^* Sare) ende ouertrede aen dat verbande, ende die gramschap quam ouer dye gheheele ghemeynte van Israel? ^* ende hy en was maer een man, ende och oft hi om sine misdaet alleen verghaen hadde.)

* th. Zerah.

* th. hi en ginc niet alleen onder zijn misdaet.

21

⁺Doen antwoorden die kinderen Ruben, ende die kinderen Gad, ende dat halue gheslachte Manasse, ende seyden totten hoofden ende vorsten van Israel,

+ E

22

Die starcke Godt die HERE dye starcke Godt die HEERE weet, ende also sal ooc weten Israel, ende verstaen Ist ouertreden oft vergrepen aen den HERE so en helpe hi ons huyden niet,

23

Ende ist dat wijt daerom gedaen hebben, om dat wy ons achter den HEERE souden af keeren, ende brantoffer ende spijsoffer, daer op souden offeren, oft vreedtsaem offer daer op souden doen, soo eysche dye HERE dat,

24

Ende ist dat wijt nyet veel meer ghedaen en hebben, wt sorghen des dincs, ende spraken, Huyden of morghen mochten uwe kinderen tot onsen kinderen segghen, Wat ghaet v die HERE die Godt van Israel aen?

25

Die HERE heeft dye Iordane tot eenen pale gheset tusschen ons, ⁺ ende die kinderen Ruben ende Gad, Ghi en hebt gheen deel aen den HEERE, daer mede souden uwe kinderen onse kinderen van [kolom] dye vreese Gods doen ^* varen, ende af keeren.

+ Leui. i.d.

* the. vieren

26

^* Daer omme meynden wy beter te wesen, ende seyden) Laet ons voor onse kinderen eenen altaer maken, ⁺ niet tot offer, noch tot brantoffer,

* theb Doen seyden wy

+ F

27

Maer dat hy een ghetuyge, tusschen ons ende v, ende onsen nacomelingen si, dat wi den HEERE dienst doen moghen, voor hem, met onse brandtofferen, vreedtsaem offeren, ende ander offeren, ende dat uwe kinderen huyden ofte morghen niet segghen en derren, tot onsen kinderen, Ghi en hebt gheen deel aen den HERE,

28

Maer als si alsoo tot ons willen segghen, ^*) huyden oft morgen soo sullen si segghen, Siet, dye ghelijckenisse des altaers des HEREN, dye onse vaderen ghemaect hebben, nyet totten offere, noch totten brantoffer, maer totten getuyge tusschen ons ende v.

* the. oft tot onsen nacomelinghen

29

Dat lelijcke stuck ende sonde si verre van ons, dat wi afuallich souden worden vanden HEERE, dat wi ons huyden achterwaerts van hem souden keeren, ende eenen altaer timmeren totten offer, totten brantoffer, ende totten geschencke buyten den altaer des HEEREN ons Gods, die voor zijn wooninghe staet,

30

Maer doen Phinees die priester, ende die ouerste der ghemeynten, die princen van Israel die met hen waren dese woorden hoorden, die dye kinderen Ruben, Gad, ende Manasse seyden, beuielense hen wel,

31

ende Phinees die sone Eleazar des priesters, sprac totten kinderen Ruben, Gad, ende Manasse, Huyden bekennen wy dat dye HEERE onder v is, dat ghy v aen den HEERE nyet vergrepen en hebt, in dese daet, Nv hebt ghy Israhel verlost wt dye handt des HEEREN.

32

⁺Doen trock Phinees Eleazars sone, ende dye ouersten wt den lande ^* Galaad,) van den kinderen Ruben ende Gad, weder in dat landt Canaan, totten kinderen van Israhel ende seyden hen weder die sake alsoo si ware,

+ G

* the. gilead.

33

Doen beuiel die sake den kinderen van Israhel wel, ende loefden den Godt der kinderen van Israel, ende en seyden niet meer dat si op wilden trecken met eenen heyr teghen hen, om dat lant te verderuen, daer die kinderen Ruben ende Gad inne woonden, ende besaten.

34

Ende dye kinderen Ruben ende Gad hieten den altaer, dat hi ghetuyghe si tusscen ons, ende dat die HEERE Godt si.

§ Hoe Iosue dat volck raet van dat gheselschap der heydenen, op dat si haer afgoderie niet volghen en souden.