De Vorsterman Bijbel

§ Dat .xviij. Capittel

1

⁺ENde die gheheele ghemeynte der kinderen van Israel, verghaderden hen tot Silo, ende rechten aldaer den tabernakele des ghetuyghenissen op, ende dat lant was hen onderworpen,

+ A

2

ende daer waren noch seuen gheslachten der kinderen van Israhel, dien si haer erfdeel niet wt gedeylt en hadden,

3

Ende Iosue sprack totten kinderen van Israhel, Hoe langhe verdwijndy van onse wise traecheyt, dat ghi nyet henen en ghaet, om dat lant inne te nemen, dat v dye HEERE uwer vaderen God ghegheuen heeft?

4

Kiest wt elcken stamme drie mannen, dat icse seynde, ende dat si hen op maken, ende door dat lant ghaen, ende bescriuent na haeren erfdeel, ende comen tot mi, ^* ende vertellent my, wat si ghescreuen hebben)

* ten is nyet int hebre.

5

Deelt dat lant in seuen deelen, Iudas sal blijuen op sine palen vander zuytsiden, ende dat huys Ioseph sal blijuen op sine palen vant noorden aen,

6

maer beschrijft ghi tlant,

[p. o1v]

^* dat hier te midden leyt, in seuen deelen) ende brenctse herwaerts tot mi, so sal ic v dat lot worpen, voor den HERE onsen Godt,

* th. der seuen deelen

7

Want die Leuiten en hebben gheen deel onder v, Maer dat priesterschap des HEEREN is haer erfdeel, Maer Gad ende Ruben, ende dat halue gheslachte Manasse, hebben haer erfdeel ghenomen ouer ghene side des Iordaens, teghent oosten, dat hen Moyses die knecht des HEEREN gegeuen heeft.

8

⁺Doen die mannen op ghestaen waren, op dat si wech souden ghaen, geboot Iosue hen, doen si wilden gaen, om dat lant te bescriuen, ende sprac, gaet henen, ende doorwandelt tlant, ende bescriuet, ende coemt weder tot mi, dat ick v hier dat lodt worpe voor den HERE, tot Silo,

+ B

9

Alsoo ginghen die mannen henen, ende doortrocken tlant, ende bescreuent op eenen brief, na die steden in seuen deelen, ende quamen tot Iosue, inden leghere tot Silo,

10

Doen wierp Iosue dat lot ouer hen tot Silo, voor den HEERE, ende deelden aldaer dat lant wt, onder die kinderen van Israel, eenen yegelijcken zijn deel.

11

Ende dat eerste lot des geslachts der kinderen Ben Iamin viel na haeren geslachten, ende die pale haers lots ginc wt, tusschen den kinderen Iuda, ende den kinderen Iosephs,

12

Ende haeren pale was aen den hoecke teghent noorden, vander Iordanen aen, ende gaet opwaerts aen die side Iericho, van noortwaerts, ende coemt opt geberchte tegent westen waerts, ende ghaet wt der woestinen Beth Auen,

13

ende ghaet van daer tot Lusa aen die side henen, aen Lusa ten tzuytwaerts, dat is, Bethel, ende coemt af tot Ataroth Adar, aen den berge, dye van tzuyden leyt, aen den nederen Beth Horon,

14

daer na neyghet si haer, ende crommet haer om, totten hoecke des westens tegent zuyden vanden berghe, dye voor Beth Horon, zuytwaerts leyt, ende ghaet wt aen Kariath Baal, dat is, Kiriath Iarim, dye stadt der kinderen Iuda, dat is den hoecke tegen dat westen.

15

⁺Maer den hoecke teghen tzuyden is van Kariath Iarim aen, ende gaet wt tegent westen, ende coemt wt totten water fonteynen Nephthoa,

+ C

16

ende daelt neder aen des berchs eynde, die voor den dal des soons ^* Henam) leyt, welc inden nederen lande Raphaim teghen tnoorden leyt, ende daelt af doort dal der kinderen Ennon aender siden der Iebusiten, aenden zuyden, ende coemt neder totter fonteynen Rogel,

* th. Hinnom.

17

ende trect haer vantnoortwaert, ende coemt wt tot Ensenes ^* dat is tot die fonteyne der [kolom] Sonnen)

* ten is nyet int hebre.

18

ende ghaet wt totten hoopen die teghen Adumim opwaerts ligghen, ende coemt nederwaerts totten steen Bohen des soons Ruben, ende gaet ter siden henen, neffens den blacken velde, dat teghent noorden leyt, ende coemt af opt blac velt,

19

Ende gaet aender siden Beth Hagla, die tegent noorden leyt, ende zijn eynde is aender tonghen der souter zee, tegent noorden, aenden canten des Iordaens, ⁺ teghen tzuyden, dat is des zuydens pale.

+ D

20

Maer dye hoecken tegent oosten sal dye Iordane eynden, Dat is dat erfdeel der kinderen Ben Iamin in haeren palen rontsomme, onder haeren geslachten.

21

Dye steden des gheslachts der kinderen Ben Iamin, onder haeren gheslachten waren dese, Iericho, Beth Hagla ^* ende dat dal Casis,)

* the. Emek Kesis

22

Beth Araba, Zemaraim, Beth El,

23

Auim, Haphar, Aphra, Caphar,

24

Amonai, Aphni, Gaba, dat zijn twaelf steden, ende haere dorpen,

25

Gabaon, Rama, Beeroth,

26

Maspe, Caphara, Moza,

27

Rekem Iarepheel, Thareala,

28

Zela, Elephe, ende Iebus dat is, Iherusalem, Gabaath, Kariath, veerthien steden ende haer dorpen, dat is dat erfdeel der kinderen Ben Iamin in haeren geslachten.

§ Hoe dat landt den anderen gheslachten, den geslachte Simeon, Sabulon, Isachar, Aser, Nephthali, ende dan wt ghedeylt wert.