De Vorsterman Bijbel

§ Dat .xiij. Cap.

1

⁺DOen nv Iosue oudt was, ende wel bedaecht, so sprack die HEERE tot hem Ghi zijt oudt gheworden ende wel bedaecht, ende daer is noch zeer veel lants ouerghebleuen om inne te nemen,

+ A

2

te weten, dat gheheel Galileen der Philistijnen, ende alle Gessuri,

3

van ^* den verstoorden Turbel ryuiere) die voor Egypten vloeyt, ^* ende dat gheheele lant vochtich ende vruchtbaer maect) tot aen die palen Ackaron teghen dat Noorden die den Cananiten toe gherekent wort, vijf Ouerheeren der Philistijnen, te wetene, der Gasiten, der Asoditen, der Askaloniten, der Gethiten, der Achroniten,

* the. Sehor

* ten is niet int heb.

4

Van dat Zuyden aen zijn die Eueyten, ende dat gheheele lant der Cananiten ende Maara der Sidoniten tot Apheck toe, tot aen die palen der Amoriten,

5

Daer toe dat lant ^* daer bi gheleghen,) ende des gheheelen Libanon teghen der Sonnen opghanck, van BaalGad aen, onder den berch Hermon, tot datmen coemt tot Hemath,

* h. der Gibliten.

6

Alle die op dat gheberchte woonen van Libanon aen, tot aen die ^* wateren Masserephat,) ende alle Sidoniers, Ick ben diese sal wt doen ende verderuen voor die kinderen van Israel, ^* Legghet slechts daer op toe,) dat si comen ten deele om wt te deelen, onder Israel so ick v gheboden hebbe.

* the. warmme wateren

* the. Lotet alleen daer om.

7

Aldus deelt nv dit lant tot een erue onder die neghen gheslachten, ⁺ ende oock mede onder dat halue gheslachte van Manasses,

+ B

8

Want die Rubeniten ende Gadditen hebben met den anderen haluen gheslachte Manasse haer erfdeel ontfaen, dat

[p. n7v]

hen Moyses ghaf, op ghene syde der Iordanen teghen den opganck, so hen dat selue Moyses die knecht des HEEREN ghegheuen heeft,

9

van Aroer aen, die aen den oeuer des waters Arnon leyt, ende die stadt midden int water, ende alle dat lantschap Medaba tot Dibon toe,

10

ende alle die steden ^* Seon) des Conincs der Amoriten die tot Hesebon sadt, tot aen die palen der kinderen Amon,

* th. Sihon.

11

Daer toe ^* Galaad) ende die palen aen Gessuri, ende Machati, ende den gheheelen berch Hermon, ende alle Basan tot Salacha,

* th. Gilead

12

dat gheheele rijck Og tot Basan die tot Astaroth ende Edrai sadt, die welcke noch een van den ouerghebleuenen was vanden Raphaim, Maer Moyses sloechse ende verdreefse.

13

⁺ Die kinderen van Israel en wouden niet verdrijuen die Gessuriten ende Maachathiten, maer Gessur ende Maachat woonen alle beyde onder die kinderen van Israel tot op desen dach.

+ Sapi. x.d.

14

Maer den gheslachten der Leuiten en ghaf hi gheen erfdeel, Want den offere des HEEREN des Gods van Israels is haer erfdeel, so hi hen ghesproken heeft.

15

⁺Ende Moyses ghaf den gheslachte der kinderen Ruben na haer gheslachten,

+ C

16

dat haer palen waren Aroer die aenden ouer des water Arnon leyt, ende die ^* valleye) midden int watere met al den effenen velden die tot Medaba leyden

* the. stadt

17

ende Hesebon, ende alle haer steden die inden effenen velde ligghen, Dibon Bamot Baal, ende BethBal Meon,

18

Iabza Kedemoth, Mephaath,

19

Kiriathaim Sabama, Zaretha, Sahar ^* inder valleyen gheberchte des daels

* the. opt gheberchte Emek Bethpeor, die beke aen Pisga.

20

Betphogor, die beke aen Phasga) ende Beth Iesimoth,

21

ende al die steden opt effen velt, ende dat gheheele rijck ^* Seon) des Conincs der Amoriten die tot Hesebon sadt, dien Moyses sloech metten Vorsten Madian, Eui, Rekem, Zur, Hur, ende Reba, die machtighe des Conincs ^* Seon) die inden lande woonden,

* th. Sihon.

* th. Sihon.

22

Daer toe Balaam den sone Beor den waerseggher dooden die kinderen van Israel metten swaerde metten anderen verslaghenen,

23

ende die pale der kinderen Ruben was die Iordane, Dat is dat erfdeel der kinderen Ruben met haer gheslachten steden ende dorpen.

24

Den gheslachte der kinderen Gad onder haer gheslachten gaf Moyses

25

dat haer palen waren, die palen Iaesar, ende alle steden in ^* Galaad) ende dat halue lant der kinderen Amon, tot Aroer toe, dwelck leyt tegen Rabbath,

* th. Gilead

26

ende van Hesebon tot Ramath Masphe [kolom] tot Betonim, ende van Manahim tot aen die palen Dabir.

27

Maer int dal Beth Haran Beth Nimra, Sucoth, ende Zophon, dat ander deel dat ouerbleuen was vanden rijcke ^* Seon) des Conincs tot Hesebon, ende hier af was deynde tot aen die Iordane, tot aent eynde der zee Cineroth, op dese syde der Iordanen tegent Oosten.

* th. Sihon.

28

Dat is dat erfdeel der kinderen Gad in haer geslachten steden ende dorpen

29

Den haluen geslachte der kinderen Manasses onder haer gheslachten gaf Moyses

30

dat haer palen waren van Machanaim, dat gheheele Basan, dat gheheel rijck Og des Conincx tot Basan ende alle plecken Iair die in Basan liggen te weten .lx. steden,

31

Ende dat half deel van ^* Galaad) Astharoth, Edrai, die steden des Conincrijcs Og tot Basan, den kinderen Machir des soons Manasse, dat is die helft der kinderen Machir na haer gheslachten.

* th. Gilead

32

Dat is dat Moyses wtghedeelt heeft op dat velt Moab op ghene syde der Iordanen voor Iericho teghent Oosten.

33

Maer den gheslachte Leui en gaf Moyses gheen erfdeel, Want die HEERE die God van Israel is haer erfdeel, so hi hen ghesproken heeft.

§ Hoe Chaleb zijn beloefde erffenisse eysschet, ende men gheeft hem Hebron.