De Vorsterman Bijbel

§ Dat .x. Capittel.

1

⁺DOen Adonizedech die coninc van Ierusalem hoorde, dat Iosue Hai gewonnen ende die ^* omgekeert ende neder geworpen) hadde, ende Hai met haeren coninc gedaen hadde, so hi Iericho ende haeren coninc gedaen hadde, ende dat die van Gabaon, vrede gemaect hadden met Israel, ende onder hen comen waren,

+ A

* th. verbant

2

soo

[p. n5v]

vreesden si zeere, Want Gabaon was een groote stadt, gelijc der coninclijcker steden eene, ende grooter dan Hai, ende alle haer borghers waren strijdtbaer zeer vrome mannen,

3

Daerom sandt Adonizedech die coninc van Iersusalem tot Oham den coninc van Hebron, ende tot Pharam den coninck tot Iarmuth, ende tot Iaphia den coninc tot Lachis, ende tot Dabir, den coninc tot Eglon, ende dede hen segghen,

4

Coemt opwaerts tot mi ende helpt mi, dat wi Gabaon slaen, Want si heeft met Iosue ende den kinderen van Israel vrede ghemaect, ^* ende is tot hen ouerghetreden.)

* ten is niet int hebreu.

5

⁺Doen vergaderden ende trocken op die vijf coninghen der Amoriten, die coninck tot Ierusalem, die coninc tot Hebron, die coninck tot Iarmuth, die coninck tot Lachis, die coninc tot Eglon, met alle haer heyrleghers, ende beleyden Gabaon, ende streden daer teghen.

+ B

6

Maer die inwoonders van Gabaon der belegen stadt, sonden tot Iosue, die dier tijt woonde inden heyrlegere in ^* Galgale) ende deden hem segghen, En trect uwe hant niet af van uwen knechten, coemt haestelijck opwaerts tot ons, verlost ende helpt ons, want al die coningen der Amoriten die opt gheberchte woonen, hebben hen teghen ons tesamen gheslaghen.

* th. Gilgal

7

Iosue reysde opwaerts van ^* Galgal) ende al dat heyr vanden oorloochs volc met hem, ende al die strijtbaer mannen, die zeer vroom ende sterck waren,

* th. Gilgal

8

Ende die HEERE sprac tot Iosue, En vreeset voor hen niet, want ick hebse in uwen handen ghegheuen, want niemant van hen en sal voor v staen mogen

9

Also quam Iosue bottelijc ouer hen ende oueruielse, want al den nacht trock hi op van ^* Galgal)

* th. Gilgal

10

Ende de HERE veruaerdese voor Israel ^* ende hi verderfse metter grooter plaghen Gabaon ende wreefse in stucken) ende iaechde hen nae door den wech, daermen ghaet op tot BetHoron, ende sloechse tot Aseka ende Maceda toe.

* theb. dat si eenen grooten slach sloegen tot Gibeon,

11

⁺Ende doen si voor Israhel vloden den wech nederwaerts, soo liet die HEERE ^* groote steenen) vanden hemel op hen vallen tot Aseka toe, ende haerder storuen vele meer vanden haghel steenen dan die kinderen van Israel metten swaerde dooden.

+ C

* theb. hagel steenen.

12

Doen sprack Iosue tot den HEERE, in dien daghe doen die HEERE die Amoriten ouer ghaf voor dat aensichte vanden kinderen van Israel, ende sprack voor de tegenwoordicheyt van Israel, Sonne houdt [kolom] stille, ende en wilt v niet verroeren teghen Gabaon, ende Mane teghen dat dal Haialon.

13

Doen hieldt die sonne stille, ende die mane stont, tot dat hem dat volck aen zijn vianden wreecte. En is dit niet gheschreuen inder rechtueerdighen boeck?, Aldus stont die sonne midden aenden hemel, ende vertrack onder te ghaen, gheduerende den tijt van eenen gheheelen dach,

14

Ende daer en was gheenen dach desen dach ghelijck in lancheden, noch voren, noch daer nae, doen die HEERE der stemmen eens mans gehoorsaem was, want die HEERE strijdet voor Israel.

15

Iosue trock wederom inden legher tot ^* Galgal), ende alle Israel met hem,

* th. Gilgal

16

Maer die vijf coninghen waren gheuloden, ende verstaken hen in die holen der stadt Maceda,

17

ende het wert Iosue te kennen ghegheuen ende ghebootschapt, Wi hebben die vijf coninghen gheuonden verborghen inden hole tot Maceda,

18

Iosue gheboot sinen mede ghesellen segghende, Wentelt groote steenen voor dat ghat des hols, ende stelt daer cloecke wijse, ende neerstighe mannen vore diese bewaren,

19

ende en staet ghy niet stille, maer veriaghet uwe vianden, ⁺ ende houdt daer van achter op, ende slaet doot die laetste vanden vooruluchtighen, ende en laetse in haerder steden stercheyt niet comen, want die HEERE uwe Godt heeftse in uwen handen ghegheuen.

+ D

20

Ende doen Iosue ende die kinderen van Israel voleyndet hadden, den zeer grooten slach aen hen, also dat si ten laetsten verderuende verteert waren, Wat ouer bleef dat Israel mocht ontulieden, dat quam in die vaste steden.

21

Aldus quam alle dat volc weder inden legher tot Iosue tot Maceda ^* ghesont ende met vollen ghetale) ende nyemant en dorste hem voor die kinderen van Israel met zijnder tonghen roeren,

* thebr. met vrede.

22

Ende Iosue gheboot, segghende, Doet dat gat des hols open, ende brenct die vijf coningen hier tot mi, die daer in verborghen zijn.

23

Si deden also ende brachten die vijf coninghen tot hem wt den hole, den coninc van Ierusalem, den coninc van Hebron, den coninc van Iarmuth, den coninc van Lachis, den coninck van Eglon.

24

⁺Doen dese vijf coningen tot hem daer wtgebracht waren, so riep Iosue al die mannen van Israel ende sprack totten ouersten des oorloochs volcks die met hem trocken, Coemt herwaerts ende terdt dese coninghen met voeten op die halsen, ende si quamen toe ende tradense

+ E

[p. n6r]

met voeten op haer halsen,

25

ende Iosue sprack tot hen, En vreest niet, ende en laet v nyet grouwelen, zijt versterct ende vrymoedich Want also sal die HEERE allen uwen vianden doen, tegen die welcke ghi strijden sult.

[afbeelding]

26

Ende Iosue sloechse daer nae ende doodese ende hincse op vijf micken, ⁺ ende si hinghen aen die boomen tot des auonts toe.

+ Da. xiiij.c.

27

Maer doen die sonne onder gheghaen was, gheboodt hy den mede ghesellen, datmense vanden galghen soude nemen, ende worpense in dat hol daer si hen in verborghen hadden, ende leyden groote steenen voor dat gat, die zijn noch daer op desen dach.

28

Opten seluen dach wan Iosue oock Makeda ende sloechse metter scarpten des swaerts daer toe haeren coninck doode hi, ende alle die daer inne woonden, ende en liedt nyemanden ouerbliuen, ende dede den coninc tot Makeda, ghelijck hi den coninck tot Iericho ghedaen hadde.

29

⁺Doen trock Iosue ende alle Israel met hem, van Makeda tot Lebna ende street tegen hen,

+ F

30

Ende dye HEERE gaf die selue oock inden handen van Israel, met haeren coninck, ende hi sloechse metter scarpten des swaerts, ende alle zielen die daer inne waren, ende en lieter niet eenen inne ouerbliuen, ende dede haeren coninck, so hi den coninck tot Iericho ghedaen hadde.

31

Daer na trock Iosue ende alle Israel met hem van Lebna tot Lachis, ende beleydense met een heyr rontsomme, ende bestormdense,

32

ende die HEERE ghaf Lachis ooc in die handen van Israel, also dat sise des anderdaechs wonnen, ende sloeghense metter scharpten des swaerts, ende alle die zielen dye daer inne waren, in alle manieren soo hi Lebna ghedaen hadde.

33

Inder seluer tijt trock Haram die coninck tot Gaser opwaerts, om Lachis te helpen, Maer Iosue sloech hem met allen sinen volcke, tot datter niet een ouer en bleef. [kolom]

34

Ende Iosue trock van Lachis met allen Israel tot Eglon, ende beleydese,

35

ende bestormdese ende wonse inden seluen daghe, ende sloechse metter scarpten des swaerts ^*) alle die zielen die daer in waren opten seluen dach, in alle manieren so hi Lachis gedaen hadde.

* the. en verbande

36

Daer na troc Iosue opwaerts met alle Israel van Eglon tot Hebron, ende bestormdese

37

ende wontse, ende sloechse metter scharpten des swaerts, ende haeren coninck met alle haer steden, ende alle die zielen die daer inne woonachtich waren ende en lieter niet eenen ouer bliuen, in alder manieren so hi Eglon gedaen hadde, ^* ende die zielen die daer in waren, doode hi met den swaerde.)

* the. hi verbandese ende alle die zielen die daer in waren

38

⁺Doen keerde Iosue wederomme met alle Israel tot Dabir,

+ G

39

ende bestormdese ende wondtse,

40

ende haeren coninc, ende daer toe oock alle haer steden, ende sloeghense metter scharpten des swaerts, ende verbanden alle die zielen die daer inne waren, ende en lieter niet eenen ouer bliuen, Ghelijc hi Hebron ghedaen hadde, so dede hy Dabir oock, ende haeren coninck, ende so hi oock Lebna ende haeren coninc ghedaen hadde.

41

Also sloech Iosue alle dat lant, op dat gheberchte, ende teghen dat zuyden, ende inden nederen landen ende aen ^* Reboch), met allen haeren coninghen, ende en lieter niet eenen ouerbliuen, ende doodet al wat den adem hadde, soo die HEERE die God van Israel hem gheboden hadde,

* the. die beben.

42

Ende sloechse van CadesBarnea aen, tot Gasa toe, ende alle dat lant Gosen tot Gabaon toe,

43

ende wan alle dese coninghen met haeren lande teenen male, Want dye HEERE dye God van Israel street voor Israel,

44

Ende Iosue trock weder in den leghere tot ^* Galgal) met alle Israel.

* th. Gilgal.

§ Hoe Iosue streedt teghen menigerley coninghen, ende verwanse, soo hem God beuolen hadde.