De Vorsterman Bijbel

§ Dat .viij. Capittel.

1

⁺ENde die HEERE sprac tot Iosue, En vreest, noch en verzaghet niet. Neemt met v alle doorloochs volck, ende maect v op, ende trect op tot Hai, Siet daer, ic hebbe den coninck van Hai met sinen volcke, ende zijnder stadt ende lande, in uwen hande ghegheuen,

+ A

2

ende sult met Hai ende haeren coninck doen, alsoo ghi met Iericho ende haeren coninck ghedaen hebt, wt genomen dat ghi haeren roof ende haer vee, onder v deelen sult, maer legt laghen achter die stadt.

3

Doen stont Iosue op, ende al tcrijchs volck om te trecken tot Hai, ende Iosue vercoos dertich duysent strijtbaer mannen, ende santse wt bider nacht,

4

ende gheboot hen, ende sprac, ⁺ Siet toe, ghi sult laghen leggen achter die stadt, maer en maect v niet alte verre vander stadt, ende weest altesamen bereyt,

+ B

5

Ick ende alle dat volck dat met mi is, sullen van teghen dye stadt opclimmen, [kolom] Ende als si teghen ons wtcomen, ghelijck te voren, soo sullen wi voor hen vluchten, ende den rugge keeren,

6

op dat si ons daer wt na volgen, tot dat wise daer wt vander stadt trecken, Want si sullen wanen, dat wi voor hen vlieden, so wi te voren deden,

7

Ende als wi voor hen vlieden, ende si ons naeuolghen, soo sult ghi v op maken wt der laghen, ende die stadt inne nemen, Want die HEERE uwe Godt salse in uwen handen gheuen,

8

Maer als ghi die stadt inghenomen hebt, soo steectse aen met vier, nae den woorde des HEREN doet, Siet, ick hebt v gheboden.

9

Alsoo sandtse Iosue wech, ende si gingen henen totter plaetsen der laghen, ende hieldent tusschen BethEl, ende Hai, teghent westen waert aen Hai, Maer Iosue bleef die nacht onder dat midden vanden volck,

10

Ende stont smorghens vroech op, ende ordineerde dat volck, ende trock opwaerts metten ouden van Israel, voor dat volc henen tot Hai, ende al dat crijchs volc dat bi hem was trock opwaerts,

11

⁺ende si gingen toe, ende quamen teghen die stadt, ende maecten haeren legher teghent noorden, voor Hai, also datter maer een deel en was tusschen hen ende Hai.

+ C

12

Maer hi hadde bi vijfduysent mannen ghenomen, ende in die laghen ghestelt tusschen BethEl ende Hai, westwaert der stadt,

13

ende si hielden dat volck, des gheheelen legers dat tegen tnoorden der stadt was, also dat het laetste reycte tegen dat westen der stadt. Alsoo ghinck Iosue henen inder seluer nacht midden int dal.

14

Als die coninck van Hai dat sach, haestede hi, ende is wtghegaen met alle den heyr vander stadt, om dat volck van Israel ten strijde teghen te gane, met al haeren volcke, recht voor dat velt, Want hi en wist niet dat hem laghen ghestelt waren achter die stadt.

15

Maer Iosue ende alle dat volck van Israel weken die plaetse, ende veynsden te vreesen, ende vloden door den wech der woestinen,

16

Maer si roepende tesamen, ende malcanderen met vermanen verweckende, veruolchdense, Ende als si wech ghetrocken waren vander stadt,

17

ende daer niemant binnen ghebleuen en was van BethEl ende Hai, ⁺ die niet wt en trock om Israel na te iagen, so lieten si die stadt open staen, ^* alleens ghelijck si wtghetoghen waren.)

+ D

* th. om Israel na te iaghen.

18

Doen sprac die HEERE tot Iosue, heft op den schilt, die ghi in v hant hebt teghen Hai, want ick hebse in uwen handen ghe-

[p. n4v]

geuen,

19

Ende doe Iosue ^* den schilt) tegen die stadt verheuen hadde, doen brack die laghe haestelic op wt haerder plaetsen, ende liep, nae dien dat hi zijn hant wtrechte, ende si quamen in die stat ende wonnense, ende haesteden, ende stakense met vier aen,

* th. die lancie die in sine hant was

20

Ende die mannen van Hai keerden hen, ende saghen achter hen, ende saghen den roock der stadt op ghaen ten hemel toe, ende si en hadden gheen ruymte te vlieden noch herwaerts noch derwaerts, om dat volck datter te voren die vluchte veynsde, ende reysde ter woestinen, keerde hem omme, ende weerde hem sterckelick.

21

⁺Ende doen Iosue, ende alle dat volc van Israel sach, dat die laghe die stadt ghewonnen hadde, want den rooc der stadt opginc soo keerden si wederomme, ende sloegen de mannen van Hai,

+ E

22

Ende die de stadt inghenomen hadden, quamen oock wt hen teghen, ende begonsten te slaen, die int middele van haeren vianden waren, Ende als si nv aen beyde siden herwaerts ende derwaerts vielen haere vianden ende werden verslagen, so sloeghen sise, tot datter niemandt onder hen ouer en bleef, noch en ontquam,

23

Doen grepen si den coninck van Hai leuende, ende si brachten hem tot Iosue.

24

^* Ende doen si al gedoot waren, die dat volck van Israel totter woestinen eynde veruolcht hadden, ende op der seluer plaetsen met den swaerde vielen) Doen keerde hem alle dat volck van Israel tot Hai, ende sloegense metter scharpte des swaerts,

* th. doen Israel alle de inwoonders van Hai gedoot hadde opten velde, ende inder woestinen, die hen veruolcht hadden, ende vielen alle door die scerpte des swaerts, totdat si al te niet waren.

25

Ende alle die op dien dach inder seluer plaetse vielen, van mannen tot vrouwen toe, die waren twaelf duysent, altemael luyden der stadt van Hai.

26

Maer Iosue en trac zijn hant niet weder af, daer mede hi ^* den schilt) wtrecte, tot dat al die inwoonders van Hai ^* verslegen) werden,

* th. die lancie.

* th. verbant.

27

Maer dat vee, ende den roof der stadt deelde Israel wt onder hen, na den woorde des HEEREN, dat hi Iosue geboden hadde.

28

Ende Iosue verbrande Hai wt, ende maecter eenen eewighen hoop af, ⁺ die noch huyden daer is,

+ F

29

Ende hinc den coninck van Hai aen een galge, tot tsauonts toe, Maer doen die sonne onder was gegaen, doen geboot hi datmen zijn lichaem vander galge doen soude, ende worpen hem onder der stadt poorte, ende maecten daer eenen grooten steenhoop op hem, die tot huyden desen daghe toe daer is.

30

Doen stichte Iosue den HEERE den Gode van Israel eenen altaer opten berch [kolom] Hebal,

31

soo Moyses die knecht der HEEREN gheboden hadde, den kinderen van Israel, alsoo in dat boec der wet Moysi geschreuen staet, ⁺ eenen altaer van gheheelen steenen daer ouer men met gheenen yseren en quam, ende offerden den HEERE daer op brantoffer, ende vreedsamen offer,

+ Exo. xx.b. Deu. xxvij a.

32

ende screef aldaer op die steenen die tweede wet, Moysi, die hi voor die kinderen van Israel ^* by een vergadert) hadde.

* th. ghsecreuen.

33

Ende alle dat volck van Israel met sinen ouders, ende die leydtsmannen, ende die rechteren, stonden tot beyde siden der arcken, teghen dat aenghesichte der priesteren van Leui, die die arcke des verbonts des HEEREN droeghen, die vremdelingen alsoowel als die ingheseten, haer helfte neffens den berch Garisim, ende die ander helft neffens den berch Hebal, so Moysis die knecht des HEEREN te voren gheboden hadde, Ten eersten soe ghebenedide hi dat volck van Israel,

34

Daer nae liet hi wtroepen al de woorden der wet vander ghebenedijnge ende vermaledijnge, soo dat gheschreuen staet in den wetboeck.

35

Daer en was gheen woort dat Moyses geboden hadde, dat Iosue niet wt en hadde laten roepen, maer hi verhaeldet al tegader voor die geheele gemeynte van Israel, ende voor die vrouwen, ende voor die kinderen, ende vremdelinghen die onder hen wandelden.

§ Hoe die Gabaoniten met Israel door subtijlheyt ende list een verbont maecten.